Feemɔ Nɔkwɛmɔnɔ yɛ Nitsumɔi Kpakpai Amli
1. Mɛni hewɔ ehe hiaa ni wɔhiɛ ahi wɔhe nɔ jogbaŋŋ yɛ wɔjeŋbai amli yɛ kpokpaa wulu nɔ kpee lɛ shishi lɛ?
1 Kɛ́ wɔbua wɔhe naa babaoo yɛ kpokpaa wulu nɔ kpeei ashishi lɛ, bɔ ni wɔfeɔ wɔnii kɛ bɔ ni wɔkɛ mɛi krokomɛi yeɔ haa lɛ bafeɔ nɔ titri ni mɛi ni naa wɔ lɛ yɔseɔ. Belɛ, ehe miihia ni wɔteŋ mɔ fɛɛ mɔ asusu Biblia mli ŋaawoo nɛɛ he jogbaŋŋ akɛ: ‘Ha ojwɛŋmɔ akã bo shi, ni nii fɛɛ gbɛfaŋ lɛ, ŋɔɔ bo diɛŋtsɛ ohe oto amɛ nitsumɔi kpakpai ahe okadi.’ (Tito 2:6, 7) Ekolɛ, mɔdɛŋbɔɔ babaoo he baahia bɔni afee ni ‘mɔ akafo lɛ pɛ enɔ mli, shi moŋ efó enaanyo nɔ hu mli.’ (Fil. 2:4) Nyɛhaa wɔsusua gbɛ̀i komɛi ni wɔbaanyɛ wɔtsɔ nɔ wɔkɛ hewalɛwoo nɛɛ atsu nii yɛ “Okɛ Anunyam Aha Nyɔŋmɔ” Majimaji Ateŋ Kpeei kɛ Kpokpaa Wulu nɔ Kpeei ni kã wɔhiɛ lɛ shishi lɛ ahe wɔkwɛa.
2. Mɛni esa akɛ wɔha ehi wɔjwɛŋmɔ mli yɛ tsũ taomɔ he gbɛjianɔtoi amli?
2 Tsũ Taomɔ He Gbɛjianɔtoi: Hegbɛ ni hi fe fɛɛ ni wɔnáa koni wɔkɛjie nitsumɔi kpakpai akpo lɛ ji be mli ni wɔtoɔ tsũ taomɔ he gbɛjianɔi lɛ. Ofainɛ ni oha ashi tsũ ni oto oyiŋ akɛ obaawɔ mli lɛ pɛ afɔ̃ shi aha bo. Kaakpa gbɛ akɛ kpee he gbɛjianɔtoo lɛ baanyɛ aha bo wɔɔhe kɛji akɛ obiii ni atao tsũ aha bo. Ebaafee nɔ ni sa jogbaŋŋ kɛji akɛ wɔɔjie Nyɔŋmɔ mumɔ lɛ yibii lɛ akpo yɛ be mli ni aŋmalaa gbɛi kɛ ŋmɛlɛtswaa ni akɛbaa gbɔiatoohe loo akɛshiɔ jɛmɛ ni dekã bɛ kwraa lɛ mli. (Gal. 5:22, 23) Ofainɛ ni oye mlai fɛɛ ni yɔɔ he ni obaahi lɛ nɔ yɛ bɔ ni abaasumɔ ni akɛ jɛmɛ atsu nii aha lɛ mli.
3. Mɛɛ gbɛ nɔ wɔɔtsɔ ‘wɔfee mɛi fɛɛ ejurɔ’ yɛ gbɔiatoohe lɛ?
3 Esa akɛ ana akɛ wɔsusuɔ mɛi krokomɛi ahe yɛ bɔ ni wɔkɛ leebi niyenii he gbɛjianɔtoi fɛɛ ni abaajɛ suɔmɔ mli akɛha lɛ baatsu nii wɔha lɛ mli. Esaaa ákɛ akɛ niyenii ni akɛha gbɔi ni eba gbɔiatoohe lɛ yaa kpee lɛ shishi. Hiɛ baasɔ jogbaŋŋ kɛji akɛ wɔbɔ mɔdɛŋ ni wɔye gbɔiatoohe lɛ mlai anɔ, ni wɔjie mɔ he susumɔ kpo wɔtsɔɔ nitsulɔi lɛ taakɛ afɔɔ feemɔ lɛ, kɛtsɔ nikeenii ko ni wɔɔha amɛ lɛ nɔ. Kɛtsɔ gbɛ̀i nɛɛ anɔ lɛ, ‘wɔfeɔ mɛi fɛɛ ejurɔ’ ni no bafeɔ odaseyeli ni sa kɛhaa mɛi krokomɛi.—Gal. 6:10.
4, 5. Mɛɛ gbɛ nɔ gbekɛbii baanyɛ atsɔ ni amɛjie Yehowa yi, ni mɛɛ sɔ̃ kã fɔlɔi anɔ?
4 Fɔlɔi kɛ Gbekɛbii: Yɛ jeŋ ni oblahii kɛ oblayei babaoo ajeŋba bɛ hiŋmɛi nɔ nɛɛ mli lɛ, anaa wɔbii lɛ akɛ mɛi ni esoro amɛ, ni enɛ kɛ yijiemɔ bahaa Yehowa kɛ egbɛjianɔtoo lɛ. Shi kɛlɛ, naagbai eba yɛ bei komɛi amli, yɛ be mli ni akwɛɛɛ gbekɛbii anɔ jogbaŋŋ lɛ. (Abɛi 29:15) Esaaa akɛ fɔlɔi ŋmɛɛɔ amɛbii ahe yɛ tsũi lɛ amli, kɛ nubui ni awuɔ lɛ anaa, loo yɛ kpee lɛ shishi ni akwɛɛɛ amɛnɔ.
5 Dani kpee be lɛ aaashɛ lɛ, fɔlɔi komɛi ena akɛ eji nɔ ni yeɔ ebuaa waa akɛ amɛkɛ amɛbii lɛ atĩ subaŋi ni akpaa gbɛ kɛjɛɔ amɛdɛŋ lɛ mli. (Efe. 6:4) Amɛyeɔ amɛbuaa gbekɛbii lɛ ní amɛnu shishi akɛ Kristofoi anɔkwa suɔmɔ “efeee nii ni esaaa,” loo ni ‘eeepele lɛ diɛŋtsɛ enɔ̃ mli.’ (1 Kor. 13:5) Kpee ji be ni ato bɔni afee ni Yehowa atsɔɔ wɔ nii, ni gbekɛbii kɛ onukpai fɛɛ baanyɛ ajie bulɛ kpo atsɔɔ gbɛjianɔtoo nɛɛ kɛtsɔ amɛjeŋba nɔ yɛ kpee lɛ shishi kɛ hei krokomɛi hu.—Yes. 54:13.
6. Mɛɛ hewalɛ wɔjeŋbai kpakpai lɛ baanyɛ aná yɛ mɛi krokomɛi anɔ?
6 Wɔjeŋba kpakpa lɛ baanyɛ afee babaoo kɛku susumɔi fɔji ni mɛi hiɛ lɛ anaa ni ebaagbala amɛ kɛba anɔkwa jamɔ mli. (Mat. 5:16; 1 Pet. 2:12) Eba akɛ, wɔɔye mɛi fɛɛ ni wɔkɛshãraa yɛ wɔ kpee lɛ shishi lɛ odase ni sa kɛtsɔ bɔ ni wɔfeɔ wɔnii kɛ bɔ ni wɔkɛ amɛ yeɔ wɔhaa lɛ nɔ. Kɛtsɔ nɛkɛ gbɛ nɔ lɛ, ‘wɔbaafee nɔkwɛmɔnɔ kpakpa yɛ nitsumɔi kpakpai amli’ ni wɔkɛ anunyam baaha Yehowa.—Tito 2:7.
[Akrabatsa ni yɔɔ baafa 4]
Susumɔ Mɛi Krokomɛi Ahe
▪ Ha ashĩ tsu ni oto oyiŋ akɛ obaawɔ mli lɛ pɛ afɔ̃ shi aha bo
▪ Jiemɔ tsuishitoo kpo yɛ be mli ni aŋmalaa gbɛi kɛ ŋmɛlɛtswaa ni akɛbaa gbɔiatoohe loo ashiɔ jɛmɛ lɛ mli
▪ Okɛ leebi niyenii he gbɛjianɔtoi akatsu nii yɛ gbɛ ni ejaaa nɔ
▪ Kwɛmɔ obii lɛ anɔ jogbaŋŋ
▪ Shi nikeenii ko ni sa yɛ gbɔiatoohei kɛ niyelihei