Afi 2008 Yehowa Odasefoi a-Kpokpaa Wulu nɔ Kpee
1. (a) Mɛni hewɔ ŋaawoo ni Paulo kɛha Hebri Kristofoi lɛ he hiaa waa ŋmɛnɛ lɛ? (Nyɛkanea Hebribii 10:24, 25.) (b) Mɛɛ hegbɛ wɔbaaná ní wɔkɛ Paulo ŋaawoo lɛ atsu nii?
1 Bɔfo Paulo wo Hebri Kristofoi lɛ hewalɛ ni amɛbua amɛhe naa ni amɛwowoo amɛhe hewalɛ “titrii lɛ” akɛni amɛnaa akɛ gbi lɛ miibɛŋkɛ nɛɛ hewɔ. (Heb. 10:24, 25) Odaseyelii babaoo miitsɔɔ akɛ “gbi” ni Paulo wie he lɛ ebɛŋkɛ kpaakpa! No hewɔ lɛ, wɔmiikpa be ni wɔkɛ wɔnyɛmimɛi hii kɛ yei lɛ baabua wɔhe naa kɛha mumɔŋ tsɔsemɔ ni baanyɛ atsɔɔ wɔ gbɛ yɛ nɛkɛ “naagbee gbii” ni mli wa nɛɛ mli lɛ gbɛ. (2 Tim. 3:1) Wɔbaaná nakai hegbɛ lɛ yɛ afi 2008 kpokpaa wulu nɔ kpeei ni abaafee lɛ ashishi.
2. (a) Mɛni hewɔ ehe miihia ni wɔya kpee lɛ gbii etɛ lɛ fɛɛ lɛ? (b) Mɛɛ gbɛjianɔ esa akɛ wɔbɔi too koni wɔnyɛ wɔya kpee lɛ?
2 Yaa Gbii Etɛ lɛ Fɛɛ: Wɔmiiwo bo hewalɛ ni oya gbii etɛ lɛ fɛɛ. Kɛ́ ‘wɔkwaaa wɔhe naabuamɔ lɛ,’ mumɔŋ niyenii ni he hiaa waa nɛɛ eko eŋmɛŋ wɔ. (Heb. 10:25) Jee shishi obɔi gbɛjianɔtoo amrɔ nɔŋŋ. Kɛ́ ahako obii lɛ skul gbɛ yɛ kpee be lɛ mli lɛ, ha amɛtsɔɔlɔi lɛ ale gbɛjianɔ ni oto lɛ. Ekolɛ ehe baahia ní owó onitsumɔtsɛ lɛ toi nɔ mra koni ele nɔ ni ebaafee.
3. Mɛni hewɔ esaaa akɛ ewaa kɛhaa wɔ akɛ wɔbaabi gbɛ koni wɔnyɛ wɔya nifeemɔ ni he hiaa nɛɛ shishi lɛ?
3 Bei komɛi lɛ nyɛmimɛi komɛi shashaoɔ shi akɛ amɛkɛ amɛnitsumɔtsɛmɛi lɛ aaawie, ejaakɛ amɛsusuɔ akɛ amɛnitsumɔtsɛmɛi lɛ eŋmɛŋ amɛ gbɛ ni amɛya kpee lɛ kɔkɔɔkɔ. Shi kɛ́ ebalɛ akɛ aya henaabuamɔi komɛi tamɔ yara loo yookpeemɔ shishi lɛ, ewaaa ehaaa nyɛmimɛi babaoo akɛ amɛaaha amɛnitsumɔtsɛmɛi lɛ ale nɔ ni amɛtao ní amɛfee lɛ. Esa akɛ wɔbi wɔhe akɛ: Kɛ́ wɔnaanyo ko ní wɔsumɔɔ esane miibote gbalashihilɛ mli yɛ he kroko lɛ, wɔyabiŋ wɔnitsumɔtsɛ lɛ gbɛ koni wɔnyɛ wɔya yookpeemɔ lɛ? Ni kɛ́ eshashao shi akɛ ebaaŋmɛ wɔ gbɛ lɛ, ani wɔjɛŋ bulɛ mli wɔgbálaŋ nɔ hewɔ ni esa akɛ wɔya lɛ mli wɔtsɔŋ lɛ? Ekã shi faŋŋ akɛ kpee ni wɔbaaya koni Yehowa ayatsɔɔ wɔ nii lɛ he miihia kwraa fe henaabuamɔi krokomɛi ashishi ni wɔɔya! Kɛ́ wɔheɔ wɔyeɔ lɛlɛŋ akɛ nibii ni baaya nɔ yɛ kpee lɛ shishi lɛ he miihia kɛha wɔmumɔŋ hiɛyaa lɛ, no lɛ ewaŋ kɛhaŋ wɔ akɛ wɔɔkɔne wɔnitsumɔtsɛ lɛ yiŋ koni eŋmɛ wɔ gbɛ ni wɔya kpee lɛ. (Yak. 1:7, 8) Ha amɛle akɛ kpee lɛ ji ojamɔ lɛ fã ni he hiaa waa. Obaanyɛ oná nɔmimaa akɛ Yehowa baajɔɔ mɔdɛŋ ni obɔɔ koni okɛ Maŋtsɛyeli lɛ he nibii aye klɛŋklɛŋ gbɛhe lɛ nɔ. —Mat. 6: 33.
4. Mɛɛ gbɛ̀i anɔ wɔɔtsɔ wɔjie mɔhesusumɔ kpo wɔtsɔɔ?
4 Ye Obua Mɛi Krokomɛi ni Amɛya: Agbɛnɛ hu Paulo wo enyɛmimɛi lɛ hewalɛ ni ‘amɛyɔseyɔsee’ amɛhe. (Heb. 10:24) Ani yelikɛbuamɔ ko he miihia nyɛmimɛi hii kɛ yei ni yɔɔ Osafo Woloŋ Nikasemɔ kuu lɛ mli lɛ bɔni afee ni amɛnyɛ kpee lɛ amɛya? Ani obaanyɛ oye obua o-Biblia kaselɔi lɛ ni amɛya kpee lɛ, kɛ́ hooo kwraa lɛ, gbi kome? Kɛ́ oha owekumɛi ni amɛjeee heyelilɔi lɛ le gbɛjianɔ ni otoɔ kɛha kpee lɛ, fɔ̃ɔ amɛ nine koni amɛkɛ bo aya kpee lɛ. Omɔdɛŋbɔɔ ni suɔmɔ yɔɔ mli lɛ kɛ yibiiwoo ni okpaaa gbɛ baaba.
5. Mɛni hewɔ awoɔ wɔ hewalɛ koni wɔya kpee ni ato ni wɔsafo lɛ aya lɛ?
5 Kɛ́ Obaaya Kpee Kroko: Bɔni afee ni aná shitaramɔhei, woji, wɔɔhei, kɛ nibii krokomɛi ni fá bɔ ni sa lɛ, aawo bo hewalɛ ni oya kpee ni ato he gbɛjianɔ ni nyɛsafo lɛ aya lɛ. Kɛ́ shihilɛ lɛ ha eba lɛ akɛ obaaya kpee kroko lɛ, ofainɛ kwɛmɔ nɔ ni aŋma ahɔ Wɔ Maŋtsɛyeli Sɔɔmɔ nɛɛ mli lɛ baafa 6 lɛ.
6. Mɛɛ be esa akɛ asafo ko aya kpee ni jeee amɛ ato he gbɛjianɔ aha lɛ?
6 Yɛ asafoi ni yɔɔ akrowai lɛ ekomɛi amli lɛ agbɛfaŋ lɛ, nibii komɛi tamɔ wiemɔ, gbɛ jɛkɛmɔ, kɛ tsɔne ni anáaa lɛ baanyɛ eha efee mlɛo kɛha amɛ akɛ amɛbaaya kpee lɛ yɛ he kroko. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ akɛ amɛyaa kpokpaa wulu nɔ kpee kroko. Esaaa akɛ amɛŋmaa nitsumɔhe nine lɛ gbɛbimɔ wolo dani amɛya kpee kroko lɛ. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee ni jeee amɛsafo lɛ ato he gbɛjianɔ aha lɛ aha amɛ kpokpaa nɔkwɛlɔ lɛ ale enɛ mra kɛtsɔ hiɛ koni ekato gbɛjianɔ kɛha amɛsaramɔ nakai otsi lɛ.
7. Mɛni esa akɛ nyɛmimɛi ni nyiɛɔ hiɛ lɛ aha ehi amɛjwɛŋmɔ mli?
7 Tsɔne he Gbɛjianɔtoo: Esa akɛ nyɛmimɛi ni toɔ tsɔne he gbɛjianɔ lɛ abɔ mɔdɛŋ akɛ tsɔne ni amɛbaawo lɛ yɛ hewalɛ ni ekɛ gbɛfaa hu baafee shweshweeshwe. Esa akɛ asafoŋ onukpai lɛ akwɛ ni mɛi ayibɔ ni baatara tsɔne lɛ mli lɛ akafá fe bɔ ni tsɔne lɛ woɔ, koni akatɔ̃ maŋ lɛ mla nɔ.
8. Mɛɛ gbɛ nɔ atsɔɔ atsuɔ wolo ni aŋmalaa nɔ nii kɛbiɔ wɔɔhe lɛ he nii ni akɛmajeɔ?
8 Wɔɔhei: Akɛ Room Request woji miimaje asafoi fɛɛ. Kɛ́ obaasumɔ ni mɛi ni toɔ kpee lɛ he gbɛjianɔ lɛ atao wɔɔhe aha bo lɛ, ofainɛ ni oŋmala Room Request wolo lɛ eko nɔ nii ni okɛha osafo lɛ mli woloŋmalɔ lɛ ni ekwɛ, koni no sɛɛ lɛ okɛmaje mɛi ni toɔ kpee lɛ he gbɛjianɔ yɛ heni otaoɔ ni oya yɛ lɛ. Kɛ́ abaafee kpokpaa nɔ kpee ni fá fe ekome yɛ maŋ lɛ mli lɛ, tsɔɔmɔ be ni akɛbaafee kpee ni obaaya lɛ. ESAAA ni akɛ Room Request wolo lɛ kɛ woji krokomɛi ni abaaŋmala kɛbi kpee lɛ he saji lɛ majeɔ nitsumɔhe nine ni yɔɔ Accra lɛ.
9. Mɛɛ gbɛjianɔ ato koni akɛye abua mɛi ni wɔɔhe he baahia amɛ lɛ ateŋ mɛi komɛi?
9 Kɛ́ shiɛlɔ ko ni yɔɔ hiamɔnii pɔtɛɛ ko lɛ ŋmala Room Request wolo lɛ eko nɔ nii lɛ, esa akɛ Asafoŋ Sɔɔmɔ Ajinafoi Akuu lɛ akwɛ akɛ eshɛɔ taomɔnii kɛha mɛi ni esa akɛ aye abua amɛ ni aŋmala awo wolo lɛ nɔ lɛ he lo. Gbɛjianɔtoo nɛɛ yɛ kɛha shiɛlɔi ni yɔɔ shidaamɔ kpakpa yɛ asafo lɛ mli kɛ amɛbii ni baa amɛjeŋ jogbaŋŋ lɛ pɛ.
10. Kɛ́ aha wɔyahi mɛi komɛi ashĩai amli lɛ, mɛɛ gbɛ nɔ wɔbaanyɛ wɔtsɔɔ yɛ akɛ wɔji gbɔi kpakpai ni hiɛ sɔɔ nii?
10 Mɛi komɛi baaná wɔɔhe yɛ mɛi komɛi ashĩai amli. Shĩai nɛɛ baanyɛ afee nyɛmimɛi ashĩai loo mɛi krokomɛi anɔ̃. Akɛ tsũi nɛɛ haa yɛ kpee be lɛ mli PƐ. Esa akɛ mɛi ni nine shɛɔ wɔɔhei ni tamɔ nɛkɛ nɔ lɛ kɛ amɛbii lɛ abɔ mɔdɛŋ akɛ amɛbaajie bulɛ kpo amɛtsɔɔ mɛi ni feɔ amɛ gbɔ lɛ, ni esaaa akɛ amɛfiteɔ shiatsɛmɛi lɛ anibii, amɛdamɔɔ amɛtsũ mli sɛii anɔ, loo amɛyaa shĩa lɛ mli hei ni ahako amɛ hegbɛ akɛ amɛya lɛ. Wɔbaanyɛ wɔjie bulɛ kpo kɛtsɔ tsũi lɛ amli ni wɔɔhiɛ lɛ falefale ni wɔha jɛmɛ atse gbi fɛɛ gbi lɛ nɔ. Kɛ́ shiatsɛmɛi lɛ ná naagba yɛ nibii ni awie he nɛɛ eko he lɛ, esa akɛ aha nɔkwɛlɔ ni kwɛɔ wɔɔhe he gbɛjianɔtoo lɛ nɔ lɛ ale enɛ yɛ kpee lɛ shishi amrɔ nɔŋŋ, ni ebaaná he miishɛɛ akɛ ebaaye ebua. Kɛ́ wɔji gbɔi kpakpai lɛ, wɔŋmɛŋ gbɛ ni wɔ shiatsɛmɛi lɛ asɔmɔ wɔ yɛ nɔ fɛɛ nɔ mli.
11. Kɛ́ wɔyahi gbɔi atoohe lɛ, mɛɛ gbɛ nɔ wɔɔtsɔ wɔjie Kristofoi asuɔmɔ kɛ bulɛ kpo wɔtsɔɔ mɛi krokomɛi?
11 Kɛ́ okpɛ oyiŋ akɛ obaaya oyahi gbɔiatoohe lɛ, ha ehi ojwɛŋmɔ mli akɛ obaanyɛ otsɔ ojeŋba, owiemɔ, kɛ ohesaamɔ nɔ oye odase. Ekɛba kɔkɔɔkɔ akɛ wɔkɛ mɛi ni bahaa wɔ niyenii loo mɛi ni basaa wɔtsũi lɛ amli lɛ aaaye yɛ gbɛ ni bulɛ bɛ mli nɔ. Eyɛ mli akɛ wɔmiiwo amɛ nyɔmɔ yɛ sɔɔmɔ ni amɛkɛhaa wɔ lɛ he moŋ, shi esa akɛ wɔjie bulɛ kɛ woo kpo wɔtsɔɔ nitsulɔi nɛɛ. Enɛ tsɔɔ akɛ esoro Yehowa webii lɛ kwraa kɛ́ akɛ amɛ to mɛi ni nuuu Biblia lɛ shishi ní amɛjieee suɔmɔ kɛ bulɛ ni tamɔ nɛkɛ kpo amɛtsɔɔɔ mɛi krokomɛi lɛ ahe.
12. (a) Mɛni akpaa mɛi fɛɛ ni baaba kpee lɛ gbɛ ni amɛfee kɛba gbii etɛ lɛ fɛɛ, ni mɛni hewɔ? (b) Mɛni wɔbaanyɛ wɔkɛ be kɛha shwane hejɔɔmɔ lɛ afee, ni te enɛ ni wɔɔfee lɛ baaye abua wɔ tɛŋŋ?
12 Shwane Hejɔɔmɔ: Aabi ni mɛi fɛɛ ni baaba kpee lɛ kɛ niyenii ni mli etsiii ní amɛbaaye loo amɛbaanu kɛ́ atee shwane hejɔɔmɔ lɛ ajɛ shĩa kɛba. Enɛ haa wɔhiɔ kpee agba lɛ shishi ni wɔkɛ mɛi ni eba kpee lɛ bɔɔ, ni wɔwoɔ wɔhe hewalɛ moŋ fe ní wɔbaashi ni wɔyatao niyenii yɛ he kroko akɛni wɔkɛ niyenii eyaaa kpee lɛ hewɔ. Kɛ́ wɔfã gbɛ kɛtee maŋ ni afeɔ kpee lɛ yɛ mli po lɛ, esa akɛ daa gbi lɛ wɔtsɔ hiɛ wɔto gbɛjianɔ ní wɔná niyenii ni mli etsiii tsɔ ni wɔkɛ mɛi ni wɔbaafɔ̃ amɛ nine lɛ baaye kɛ́ atee shwane hejɔɔmɔ lɛ. Enɛ baaha wɔhi kpee lɛ shishi koni wɔkɛ mɛi ni eba lɛ aná naanyobɔɔ mli ŋɔɔmɔ. Kɛ́ wɔfee enɛ lɛ wɔtsɔɔ akɛ wɔhiɛ sɔɔ mumɔŋ nibii ni he hiaa titrii lɛ.
13. (a) Mɛɛ gbɛi anɔ wɔɔtsɔ wɔjie Yehowa yi beni wɔyaa kpee lɛ? (b) Mɛni mɛi ni tsuɔ nii yɛ gbɔiatoohei lɛ ewie yɛ jeŋba kpakpa ni wɔnyɛmimɛi lɛ jieɔ lɛ kpo lɛ he?
13 Nitsumɔi Kpakpai: Toiboo ni wɔfeɔ kɛha Yehowa famɔ akɛ wɔbua wɔhe naa kutuu kɛha jamɔ lɛ yeɔ ebuaa wɔ ni wɔnáa nii ‘ni hi ha wɔ.’ Nɔ ni fe fɛɛ lɛ, ehaa wɔnáa hegbɛ kɛjieɔ Yehowa gbɛi lɛ yi. (Yes. 48:17) Mɛi naa ‘wɔnitsumɔi kpakpai lɛ’ yɛ kpokpaa wulu nɔ kpeei ashishi, ni eha mɛi komɛi etsɔɔ amɛsusumɔi yɛ enɛ he. (1 Tim. 5:25) Gbɔiatoohe nɔkwɛlɔ ko ni yɔɔ maŋ ko ni akɛ afii babaoo efee wɔkpeei nɛɛ eko yɛ jɛmɛ lɛ mli lɛ kɛɛ akɛ: “Mɛi babaoo ni yɔɔ maŋ nɛɛ mli lɛ wieɔ Yehowa Odasefoi lɛ kɛ bɔ ni amɛkpeei lɛ ahe baa sɛɛnamɔ kɛhaa wɔ lɛ he waa. Wɔle bɔ ni nyɛwebii lɛ saa hei ni nyɛfeɔ kpeei lɛ yɛ lɛ, ni wɔnaa ni nyɛmiisaa tsɔji amaamɔ hei lɛ. Kɛ́ nyɛwebii lɛ ba biɛ yɛ hulutsoo be lɛ mli lɛ, wɔnáa he miishɛɛ waa. Wɔyɛ hekɛnɔfɔ̃ɔ akɛ nɛkɛ naanyobɔɔ nɛɛ baakã he ahi shi daa.” Beni nuu ko ni ji gbɔiatoohe nɔkwɛlɔ lɛ etsɔɔ naagbai ni ekɛkpe beni kui krokomɛi kɛ hiɛtserɛjielɔi ba egbɔi atoohe lɛ sɛɛ lɛ, ewie ekomefeemɔ kɛ tsuishitoo ni wɔnyɛmimɛi ni bato egbɔiatoohe lɛ jie lɛ kpo lɛ he. Ekɛɛ akɛ: “Wɔná ni kulɛ gbɔi fɛɛ ni baa biɛ lɛ tamɔ Yehowa Odasefoi!” Ekã shi faŋŋ akɛ, wɔnyɛmimɛi nɛɛ ajeŋba hewɔ ní awie wiemɔi nɛɛ kɛ wiemɔi krokomɛi ni tamɔ nakai lɛ ha Yehowa, wɔ-Nyɔŋmɔ lɛ ná miishɛɛ waa!
14. Mɛɛ gbɛ nɔ Mateo 4:4 lɛ maa sɛɛnamɔ ni yɔɔ bɔ ni ehe miihia ni wɔbo nifeemɔi fɛɛ ni baaya nɔ yɛ kpee lɛ shishi lɛ toi jogbaŋŋ lɛ nɔ mi?
14 Yesu kɛɛ akɛ wɔwala damɔ toiboo ni wɔɔfee wɔha “wiemɔ fɛɛ wiemɔ ni jɛɔ Nyɔŋmɔ daaŋ lɛ” nɔ. (Mat. 4:4) Yɛ kpeei ni wɔfeɔ daa afi lɛ ashishi lɛ, Yehowa tsɔɔ “tsulɔ anɔkwafo kɛ nilelɔ” lɛ nɔ etoɔ mumɔŋ ‘niyenii’ ahe gbɛjianɔ ehaa ‘yɛ be ni sa mli.’ (Mat. 24:45) Akɛ mɔdɛŋbɔɔ babaoo toɔ mumɔŋ niyenii ni wɔnine shɛɔ nɔ nɛɛ he gbɛjianɔ. Eba akɛ wɔbaaya kpee lɛ gbii etɛ lɛ fɛɛ, ní wɔbo nifeemɔi ni baaya nɔ lɛ fɛɛ toi jogbaŋŋ, ní wɔkɛ nakai feemɔ atsɔɔ akɛ wɔhiɛ sɔɔ suɔmɔ mli ní Yehowa jɛɔ ekwɛɔ wɔ lɛ.
[Akrabatsa ni yɔɔ baafa 3]
Nifeemɔ Bei:
Sohaa kɛ Hɔɔ
Leebi 9:20 – Shwane 4:55
Hɔgbaa
Leebi 9:20 – Shwane 4:00
[Akrabatsa ni yɔɔ baafa 5]
Jee Shishi Obɔi Gbɛjianɔtoo Kɛha Kpee Lɛ
• Too gbɛjianɔ jogbaŋŋ koni onyɛ oya kpee lɛ gbii etɛ lɛ fɛɛ.
• Bi onitsumɔtsɛ lɛ gbɛ bianɛ.
• Jee shishi obɔi shika ni he baahia bo kɛha kpee lɛ naa buamɔ.
• Okɛ niyenii kɛ nu aba daa gbi bɔni afee ni okashi heni afeɔ kpee lɛ yɛ lɛ akɛ oyaahe niyenii loo nu.
• Too gbɛjianɔ koni oweku lɛ mlibii lɛ FƐƐ anyɛ aya kpee lɛ gbii etɛ lɛ fɛɛ.