Yelikɛbuamɔ yɛ Be ni Sa Mli
1 Beni bɔfo Petro na akɛ ehe miihia ni ewo nanemɛi heyelilɔi lɛ hewalɛ lɛ, sane nɛɛ hesusumɔ tsirɛ lɛ ni ekɛ kaimɔi kɛ hewalɛwoo ni suɔmɔ yɔɔ mli ha amɛ. (2 Pet. 1:12, 13; 3:1) Ewo ‘mɛi ni nine eshɛ hemɔkɛyeli nɔ lɛ’ hewalɛ koni amɛya nɔ amɛdara yɛ mumɔŋ sui amli bɔni afee ni amɛkatsɔmɔ “hejɔ̃lɔi aloo mɛi ni wooo yibii yɛ wɔ-Nuŋtsɔ Yesu Kristo he nilee lɛ gbɛfaŋ.” (2 Pet. 1:1, 5-8) Oti ni ma Petro hiɛ ji ni eye ebua amɛ ni amɛná nɔmimaa diɛŋtsɛ yɛ amɛtsɛmɔ kɛ halamɔ ni amɛnine shɛ nɔ kɛjɛ Yehowa ŋɔɔ lɛ he, bɔni afee ni ‘ana amɛ ní muji loo kpa ko bɛ amɛhe yɛ ehiɛ, yɛ hejɔlɛ mli.’ (2 Pet. 1:10, 11; 3:14) Kɛha mɛi babaoo lɛ, ehewalɛwoo lɛ bafee yelikɛbuamɔ yɛ be ni sa mli.
2 Ŋmɛnɛ, Kristofoi nɔkwɛlɔi susuɔ Nyɔŋmɔ webii lɛ ahe nakai nɔŋŋ. Yɛ nɛkɛ “jaramɔ bei” nɛɛ amli lɛ, esa akɛ Yehowa tsuji babaoo aŋmɛ amɛtsui shi yɛ shihilɛi ni mli wawai ashishi. (2 Tim. 3:1) Yɛ shika, weku, loo aŋkroaŋkro naagbai ni yaa nɔ lɛ hewɔ lɛ, ekolɛ mɛi komɛi baanu he taakɛ David nu he lɛ nɔŋŋ akɛ: “Efɔji ni anyɛŋ akane ebɔle mi kɛkpe; minishaianii lɛ etsɔ mimli, ni minyɛɛɛ mihiɛ nɔ mawo; amɛfa fe miyiteŋ tsɔii, ni mitsui efã yɛ mimli po.” (Lala 40:13) Nɛkɛ nɔnyɛɛi nɛɛ amli baanyɛ awa aahu akɛ ebaaha mɔ aku ehiɛ eshwie mumɔŋ saji ni he hiaa lɛ anɔ, ni ekɛ ehe woŋ Kristofoi asɔɔmɔ nitsumɔ lɛ mli kɛ ekãa. Shi kɛlɛ, yɛ amɛnaagbai lɛ fɛɛ sɛɛ lɛ, ‘amɛhiɛ kpako Yehowa diɛŋtsɛ kitai lɛ anɔ.’ (Lala 119:176) Be ni sa akɛ onukpai lɛ aye abua nakai gbɔmɛi lɛ nɛ.—Yes. 32:1, 2.
3 Bɔni afee ni onukpai lɛ atsu enɛ he nii lɛ, aawo amɛ hewalɛ koni amɛbɔ mɔdɛŋ jogbaŋŋ ni amɛye amɛbua mɛi ni kɛ amɛhe wooo shiɛmɔ nitsumɔ lɛ mli amrɔ nɛɛ lɛ. Mɔdɛŋ diɛŋtsɛ ni abɔɔ koni anyɛ akɛtsu enɛ he nii lɛ miiya nɔ amrɔ nɛɛ, ni ebaaya nɔ kɛyashi March nyɔŋ lɛ naagbee. Aabi ni woloŋ nikasemɔ nɔkwɛlɔi asara mɛi ni ekpa shiɛmɔyaa lɛ koni amɛye amɛbua amɛ yɛ mumɔŋ kɛ oti ni ma amɛhiɛ akɛ amɛbaaye amɛbua amɛ koni amɛje nii ni amɛkɛ asafo lɛ tsuɔ lɛ shishi ekoŋŋ. He ni hiamɔ yɔɔ lɛ, onukpai lɛ baanyɛ ato Biblia mli nikasemɔ he gbɛjianɔ. Abaanyɛ abi ni mɛi krokomɛi aye abua. Kɛ abi bo ni obaye obua lɛ, mɔdɛŋ ni obaabɔ lɛ he baanyɛ aba sɛɛnamɔ diɛŋtsɛ, titri lɛ kɛ́ okɛ hewalɛwoo ha yɛ mlihilɛ, kɛ shishinumɔ gbɛ nɔ.
4 Yiŋtoo yɛ ni wɔ fɛɛ wɔɔdamɔ nɔ wɔná miishɛɛ kɛji mɔ ko bɔi nii ni ekɛ asafo lɛ tsuɔ lɛ tsumɔ ekoŋŋ. (Luka 15:6) Nɔ diɛŋtsɛ ni baajɛ mɔdɛŋ ni wɔɔbɔ koni wɔwo mɛi ni ekpa shiɛmɔyaa lɛ hewalɛ lɛ mli kɛba ji “wiemɔ ni awie yɛ be ni sa mli.”—Abɛi 25:11.