‘Nyɛhaa Wɔ Fɛɛ Wɔwoa Egbɛi lɛ Hiɛ Nyam’
1. Mɛɛ hegbɛ wɔbaaná kɛwo Nyɔŋmɔ gbɛi lɛ hiɛ nyam, ni mɛni wɔbaanyɛ wɔfee amrɔ nɛɛ kɛsaa wɔhe?
1 Lalatsɛ lɛ lá akɛ: ‘Nyɛkɛ mi akafoa Yehowa, ni nyɛhaa wɔ fɛɛ wɔwoa egbɛi lɛ hiɛ nyam.’ (Lala 34:4) “Okɛ Nyɔŋmɔ Anyiɛ” Kpokpaa Wulu nɔ Kpee ni wɔbaafee lɛ baaha wɔná hegbɛ koni wɔkɛ wɔnyɛmimɛi hii kɛ yei ni jɛ asafoi srɔtoi amli lɛ awo Yehowa gbɛi lɛ hiɛ nyam. Ani oto gbɛjianɔ kɛha tsu ni obaawɔ mli, tsɔne ni obaata mli, kɛ gbɛ ni obaabi yɛ onitsumɔtsɛ lɛ dɛŋ? Ebaafee nɔ ni nilee yɔɔ mli akɛ wɔɔtsɔ hiɛ wɔtsu enɛɛmɛi ahe nii.—Abɛi 21:5.
2. Mɛni hewɔ sɛɛnamɔ yɔɔ he akɛ oooto gbɛjianɔ ni oyashɛ kpee lɛ shishi mra lɛ?
2 Kpee lɛ Shishi ni Wɔɔshɛ Jɛmɛ: Nibii babaoo yɛ ni wɔbaatsu kɛsaa wɔhe kɛya kpee lɛ. Shia ni wɔɔshi mra lɛ baaye abua wɔ koni wɔtsu nibii ni akpaaa gbɛ ni baanyɛ aha wɔkpe sɛɛ lɛ ahe nii, ni ebaaha wɔná heko wɔta yɛ be naa, ni wɔjɛ wɔtsui muu fɛɛ mli wɔkɛ wɔhe awo lala kɛ sɔlemɔ ni akɛjeɔ shishi lɛ mli. (Lala 69:31) Kɛ́ eshwɛ minitii fioo ni abaaje nifeemɔ lɛ shishi lɛ, sɛinɔtalɔ lɛ baaba ebata shi yɛ wiemɔ kpoku lɛ nɔ, be ni atswaa Maŋtsɛyeli lalai kɛtsɔɔ kpee lɛ hiɛ lɛ. Esa akɛ wɔ fɛɛ wɔtara shi yɛ nakai be lɛ mli, bɔni afee ni akɛ bulɛ aje kpee lɛ shishi.—1 Kor. 14:33, 40.
3. Mɛɛ gbɛ nɔ wɔɔtsɔ wɔsusu mɛi krokomɛi ahe be ni wɔtaoɔ heko wɔta lɛ?
3 Nyɔŋmɔ Wiemɔ lɛ bɔɔ wɔ kɔkɔ koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Mɛi krokomɛi ahe ni wɔɔsusu lɛ baaye abua wɔ koni wɔkawó foi, wɔkafee gidigidi, wɔkatsirɛ mɛi, loo ni wɔye wɔhe oyai kɛyaje mɛi krokomɛi ahiɛ, ni wɔkɛbɔ mɔdɛŋ kɛyata shi yɛ he ko ni wɔsumɔɔ, dani mɛi krokomɛi afee nakai kɛ́ wɔyashɛ jɛmɛ leebi. Wɔbaanyɛ wɔmɔ gbɛ wɔha mɛi ni wɔkɛ amɛ jɛ shia loo wɔkɛ amɛ ta kar kometoo lɛ nɔŋŋ mli lɛ pɛ.—1 Kor. 13:5; Fil. 2:4.
4. Mɛɛ gbɛjianɔi ato kɛha shwane hejɔɔmɔ lɛ, ni te enɛ he yɔɔ sɛɛnamɔ ha tɛŋŋ?
4 Ofainɛ ni okɛ shwane niyenii aba, fe nɔ ni oooshi kpee lɛ shishi ni oyatao niyenii be ni aba shwane hejɔɔmɔ lɛ. Enɛ baaha wɔ hegbɛ koni wɔná naanyobɔɔ ni tswaa mɔ kɛmaa shi mli ŋɔɔmɔ, koni wɔhi jɛmɛ be ni ajeɔ shwane nifeemɔ lɛ shishi lɛ. Kɛ ebaahi lɛ, abaanyɛ akɛ nɔ ko bibioo ni akɛ nibii ni mli ejɔ woɔ mli koni emli akadɔ lɛ aba ni akɛwo sɛi lɛ shishi. Akɛ nibii agboi ni akɛ mɛi babaoo aniyenii woɔ mli, glase nibii ni jwaraa, kɛ dãai ni wa akaba he ni afeɔ kpee lɛ yɛ lɛ.
5. Mɛɛ he kroko hu ehe hiaa ni wɔfee ekome kɛjie anɔkwayeli kpo?
5 Eyɛ mli akɛ mɛi komɛi kɛ niyenii jɛɔ shĩa kɛbaa koni amɛbaye shwane moŋ, shi ayɔse akɛ amɛ loo amɛbii lɛ kã he amɛyaa agbo lɛ naa koni amɛyahe nu ni mli ejɔ, aiskrim, loo dɔkɔdɔkɔ nibii. Yɛ amɛhe rɔbai ni batsɔmɔɔ jwɛi yɛ agba lɛ shishi sɛɛ lɛ, nifeemɔ nɛɛ woɔ nihɔɔlɔi lɛ hewalɛ koni amɛkɛ wɔkpeehei lɛ afee jarayelihei. Nyɛhaa wɔkɛ wɔbii lɛ fɛɛ abɔa mɔdɛŋ koni ‘wɔye’ sane nɛɛ mli ‘nɔ ko bibioo mli anɔkwa.’—Luka 16:10.
6. Mɛɛ gbɛ nɔ wɔɔtsɔ wɔsaa wɔtsuii kɛha tsɔsemɔ ni akɛbaaha wɔ lɛ?
6 Asaa Mumɔŋ Niyenii ko Ato Wɔ: Maŋtsɛ Yehoshafat ji mɔ ko ni ‘saa etsui koni etao Nyɔŋmɔ sɛɛ gbɛ.’ (2 Kron. 19:3) Mɛɛ gbɛ nɔ wɔɔtsɔ wɔsaa wɔtsui dani kpee be lɛ ashɛ? Saji ni aŋma yɛ Awake! ni je kpo yɛ May 22 kɛ June 8 lɛ asɛɛ lɛ etsɔ hiɛ amɛkɛ mumɔŋ okpɔlɔ ni abaaŋmɛ wɔ lɛ he hiɛkpamɔ wiemɔi eha. Mɛni hewɔ oheee be koni okɛsusu nakai saji lɛ ahe, koni eha oná shwelɛ kɛha nɔ ni Yehowa esaa eto wɔ lɛ? Wɔtsui ni wɔɔsaa kɛha kpee lɛ hu biɔ ni wɔbi Yehowa koni eye ebua wɔ ni wɔnu tsɔsemɔ ni akɛbaaha wɔ lɛ shishi, ni wɔkɛtsu nii.—Lala 25:4, 5.
7. Mɛni ji nɔ ni wɔshweɔ, ni mɛni hewɔ?
7 Wɔ fɛɛ wɔmiishwe koni wɔkase nii babaoo kɛjɛ Nyɔŋmɔ Wiemɔ lɛ mli, ejaakɛ wɔle akɛ no feemɔ baaha wɔdara kɛná yiwalaheremɔ. (1 Pet. 2:2) No hewɔ lɛ, nyɛhaa wɔyaa “Okɛ Nyɔŋmɔ Anyiɛ” Kpokpaa Wulu nɔ Kpee lɛ, koni ‘wɔ fɛɛ wɔkɛ ekomefeemɔ awoa Yehowa gbɛi lɛ hiɛ nyam.’—Lala 34:4.
[Caption on page 3]
Gbɛ̀i Anɔ ni Wɔɔtsɔ Wɔwo Nyɔŋmɔ Gbɛi lɛ Hiɛ Nyam
◼ Saamɔ ohe kɛtsɔ hiɛ
◼ Jiemɔ suɔmɔ kpo otsɔɔ mɛi krokomɛi
◼ Saamɔ otsui kɛha kpee lɛ