Kristofoi Asɔɔmɔ Nitsumɔ Lɛ—Wɔnitsumɔ Titri
1 Wɔ fɛɛ wɔyɛ nitsumɔi srɔtoi ni esa akɛ wɔtsu. Mɔ diɛŋtsɛ shiabii ni eeekwɛ lɛ ji ŋwɛi taomɔ nii. (1 Tim. 5:8) Shi kɛlɛ, esaaa akɛ nitsumɔ ni fata nakai ŋwɛi taomɔ nii lɛ he lɛ bafeɔ nɔ ni he hiaa fe Maŋtsɛyeli shiɛmɔ kɛ kaselɔ feemɔ nitsumɔ lɛ.—Mat. 24:14; 28:19, 20.
2 Yesu fee nɔkwɛmɔnɔ efɔ shi eha wɔ ni wɔnyiɛ sɛɛ yɛ ‘maŋtsɛyeli lɛ ni wɔɔtao klɛŋklɛŋ’ lɛ mli. (Mat. 6:33; 1 Pet. 2:21) Eyɛ mli akɛ heloonaa nibii fioo pɛ eyɔɔ moŋ, shi ekɛ ehe wo e-Tsɛ lɛ suɔmɔnaa nifeemɔ mli jogbaŋŋ kɛmɔ shi. (Luka 4:43; 9:58; Yoh. 4:34) Ebɔ mɔdɛŋ waa yɛ odaseyeli mli yɛ hegbɛ fɛɛ hegbɛ ni eeená lɛ mli. (Luka 23:43; 1 Tim. 6:13) Ewo ekaselɔi lɛ hewalɛ koni amɛná miishɛɛ ni mli wa waa ni tamɔ nakai nɔŋŋ yɛ nikpamɔ nitsumɔ lɛ mli.—Mat. 9:37, 38.
3 Yesu Kasemɔ Ŋmɛnɛ: Wɔbaanyɛ wɔkase Yesu nɔkwɛmɔnɔ lɛ kɛtsɔ mɔdɛŋ ni wɔɔbɔ akɛ wɔɔha wɔshihilɛ afee nɔ ni yɔɔ mlɛo ni damɔ Kristofoi asɔɔmɔ nitsumɔ lɛ nɔ lɛ nɔ. Kɛ wɔyɛ shihilɛ mli nibii ni he hiaa titri lɛ, belɛ nyɛhaa wɔkɛ Biblia mli ŋaawoo lɛ atsua nii akɛ wɔyaŋ nɔ wɔtaoŋ je nɛŋ nibii babaoo wɔhaŋ wɔhe. (Mat. 6:19, 20; 1 Tim. 6:8) Kwɛ bɔ ni eji nɔ ni sa jogbaŋŋ akɛ wɔɔtao gbɛ̀i anɔ ni wɔɔtsɔ ni wɔkɛlɛɛ gbɛfaŋnɔ ni wɔnáa yɛ shiɛmɔ nitsumɔ lɛ mli lɛ mli! Eba akɛ, wɔɔkanya wɔhe taakɛ Yesu fee lɛ, kɛji akɛ wɔkɛ shihilɛi ni mli wawai kpe, ni wɔkaha shihilɛ mli yeyeeyefeemɔ miifee nɔ ni he miihia fe wɔnitsumɔ titri ni ji Maŋtsɛyeli sanekpakpa jajemɔ lɛ.—Luka 8:14; 9:59-62.
4 Mɛi po ni gbɛnaa nii babaoo kã amɛnɔ lɛ kɛ shiɛmɔ nitsumɔ lɛ yeɔ klɛŋklɛŋ gbɛhe. Nyɛmi nuu ko ni yɔɔ weku ni da ni tsuɔ nitsumɔ ko ni ehe gbɛnaa nii tsii, ni sɔmɔɔ akɛ onukpa yɛ Kristofoi asafo lɛ mli lɛ kɛɛ akɛ: “Mibuɔ sɔɔmɔ nitsumɔ lɛ akɛ minitsumɔ ni fe fɛɛ.” Nyɛmi yoo gbɛgbalɔ ko kɛɛ akɛ: “Gbɛgbamɔ nitsumɔ lɛ he yɛ sɛɛnamɔ aahu fe heloonaa nitsumɔ ko ni eye omanye.”
5 Bɔ fɛɛ bɔ ni wɔshihilɛi ji ha lɛ, eba akɛ wɔɔnyiɛ Yesu nɔkwɛmɔnɔ lɛ sɛɛ. Yɛ mɛɛ gbɛ nɔ? Kɛtsɔ Kristofoi asɔɔmɔ nitsumɔ lɛ ni wɔɔha efee wɔnitsumɔ titri lɛ nɔ.