Nitsumɔ Mli Hejɔɔmɔ—Gbɛ ni Kɛ Mɔ Yaa Nitsumɔ Babaoo Mli?

¹ Mɛi babaoo ni tsuɔ nii dɛŋdɛŋ lɛ shweɔ be ni nitsumɔ mli hejɔɔmɔ baaha amɛye amɛhe kɛjɛ tɔlɛ kɛ nɔnyɛɛi ni yɔɔ heloonaa nitsumɔ mli lɛ mli. Shi, bei pii lɛ, nɔ ni jɛɔ nitsumɔ mli hejɔɔmɔ mli kɛbaa ji shikpilikpiifeemɔ, shoofeemɔ, kɛ shá ni asháa agbɔɔ. Nitsumɔ ni yiŋtoo yɔɔ sɛɛ ni abɛ lɛ baanyɛ aha jwɛŋmɔ lɛ mli ayi obɔ kɛ mɔ lɛ diɛŋtsɛ he tsuiyeli. Brazil adafitswaa wolo ko bɔ amaniɛ akɛ maŋ nitsulɔi ni eba nitsumɔ mli hejɔɔmɔ lɛ ewie naagbai ni amɛkɛkpeɔ ni jɛ ‘tsui ni enyɔɔɔ mɔ mli, mlifu, shweshweeshwe ni bɛ, kɛ he ni atsiɔ kɛjɛɔ amɛhe lɛ kɛyashi nɔnyɛɛ, kɛ henumɔ ni anáa akɛ yiŋtoo bɛ amɛshihilɛ mli lɛ nɔ.’

² Nɔ ni tamɔɔɔ nakai lɛ, Kristofoi babaoo buɔ shihilɛ hee nɛɛ akɛ gbɛ ni kɛ mɔ yaa mumɔŋ nitsumɔ babaoo mli. Nyɛmi nuu ko ni je gbɛgbamɔ nitsumɔ lɛ shishi beni eye afii 65 lɛ nɔ otsii enyɔ sɛɛ lɛ kɛɛ akɛ: “Mináko be ko ni eyi obɔ kɛ jɔɔmɔi babaoo tamɔ nɛkɛ pɛŋ tamɔ bɔ ni miná yɛ afii nyɔŋma ni eho lɛ mli lɛ ni mikɛtsu gbɛgbamɔ nitsumɔ lɛ.” Gbalashihilɛ mli hefatalɔi komɛi ŋma akɛ: “Wɔgbɔlɛ be afii ni hi fe fɛɛ lɛ diɛŋtsɛ je shishi be mli ni wɔje gbɛgbamɔ nitsumɔ lɛ shishi lɛ.” Hɛɛ, kɛha mɛi babaoo lɛ, nitsumɔ mli hejɔɔmɔ haa amɛnáa hegbɛ ni hi fe fɛɛ ni amɛkɛlɛɛɔ amɛsɔɔmɔ nitsumɔ lɛ mli ni amɛnáa jɔɔmɔi babaoo kɛjɛɔ Yehowa dɛŋ.

³ Odekã Fɛɛ ni Okɛaatsu Nii Koni Okɛwo Yibii: Mɛi babaoo ni amrɔ nɛɛ amɛba nitsumɔ mli hejɔɔmɔ lɛ badara ni amɛleee ogbɔjɔ shihilɛ ni yɔɔ bianɛ lɛ, ni amɛkase nitsumɔ dɛŋdɛŋ kɛjɛ amɛshishijee afii lɛ amli. Eyɛ mli akɛ amɛbɛ hewalɛ ni oblahii kɛ oblayei lɛ yɔɔ lɛ dɔŋŋ moŋ, shi amɛkã he amɛji nitsulɔi ni woɔ yibii waa diɛŋtsɛ. Yɛ nitsumɔhe shikpɔŋkuku ko mli lɛ, gbɛgbalɔi 100 mlijaa 22—aaafee nyɛmimɛi hii kɛ yei 20,000—eye kɛ hooo lɛ, afii 60. Nɛkɛ mɛi ni edara nɛɛ tsuɔ nii babaoo yɛ shiɛmɔ nitsumɔ lɛ mli. Niiashikpamɔ kɛ Nyɔŋmɔjamɔ sui ni amɛyɔɔ lɛ kanyaa asafoi ni amɛsɔmɔɔ yɛ mli lɛ.—Yak. 3:17, 18.

⁴ Kɛ́ akɛ dekã fɛɛ ni anáa lɛ wo Kristofoi asɔɔmɔ nitsumɔ lɛ mli lɛ, ehaa anáa gbɔmɔtsoŋ hewalɛ, ni shihilɛ hu yaa hiɛ. Nyɛmi yoo ko ni eye afii 84 ní je gbɛgbamɔ nitsumɔ lɛ shishi beni eba nitsumɔ mli hejɔɔmɔ lɛ kɛɛ akɛ: “Biblia mli nikasemɔi babaoo ni mikɛ mɛi ni yɔɔ he miishɛɛ lɛ feɔ lɛ eye ebua mi ni mihi shi akɛ mɔ ni jwɛŋmɔ mli tse. Mibɛ kar, no hewɔ lɛ, minyiɛɔ babaoo. No haa mináa hewalɛ.” Gbɛgbalɔi komɛi ni ji gbalashihilɛ mli hefatalɔi ni edara yɛ afii amli lɛ wie akɛ: “Bei pii lɛ wɔnaa mɛi ni tamɔ wɔ yɛ wɔshikpɔŋkuku lɛ mli—ni amɛhe ejɔ amɛ yɛ shia, ni amɛmiishwishwii kɛkɛ, amɛmiigbɔlɔ kɛkɛ, ni amɛmiifee shɔ̃ɔ kɛkɛ. Sɔɔmɔ nitsumɔ lɛ haa wɔyaa nɔ wɔnáa jwɛŋmɔŋ kɛ gbɔmɔtsoŋ hewalɛ. Wɔ fɛɛ wɔhiɔ he kome be fɛɛ be. Wɔŋmɔɔ babaoo ni wɔnáa shihilɛ mli miishɛɛ.”

⁵ Sɔɔmɔ ni Akɛhaa yɛ He ni Hiamɔ lɛ Yɔɔ: Kristofoi komɛi ni eba nitsumɔ mli hejɔɔmɔ ní shika gbɛfaŋ shihilɛ hi lɛ efã kɛtee ni amɛyasɔmɔ yɛ hei ni Maŋtsɛyeli shiɛlɔi ahe ehia babaoo yɛ. Mɛi krokomɛi hu elɛɛ amɛsɔɔmɔ nitsumɔ lɛ mli koni amɛyasɔmɔ yɛ shikpɔŋ ni awieɔ maŋsɛɛ wiemɔ yɛ mli lɛ mli. Taakɛ bɔfo Paulo ji lɛ, nɛkɛ shiɛlɔi ni yɔɔ ekãa nɛɛ ‘feɔ nɔ fɛɛ nɔ yɛ sanekpakpa lɛ hewɔ, beni afee ni amɛ hu amɛná emli nii lɛ eko.’—1 Kor. 9:23.

⁶ Gbalashihilɛ mli hefatalɔi komɛi je gbɛgbamɔ nitsumɔ lɛ shishi beni amɛkwɛ amɛbihii enyɔ amɛgbe naa. Beni amɛkɛ afii babaoo etsu gbɛgbamɔ nitsumɔ lɛ, amɛkɛfɔ amɛhiɛ akɛ amɛbaakase China wiemɔ lɛ. Amrɔ nɛɛ ni amɛbote amɛ afi 70 afii lɛ amli nɛɛ, amɛná miishɛɛ akɛ amɛaana akɛ China kuu ni amɛkɛ amɛ tsuɔ nii lɛ ebatsɔ asafo nyɛsɛɛ nɛɛ. Mɛɛ jɔɔmɔi gbalashihilɛ mli hefatalɔi ni tamɔ mɛnɛɛmɛi ebafee nɛkɛ!

⁷ Nitsumɔ Mli Hejɔɔmɔ ko Bɛ yɛ Sɔɔmɔ Nitsumɔ lɛ Mli: Yɛ be mli ni yɛ naagbee lɛ gbɔmɛi babaoo baa hejɔɔmɔ kɛjɛɔ heloonaa nitsumɔ mli lɛ, nitsumɔ mli hejɔɔmɔ bɛ kɛha Kristofonyo yɛ Nyɔŋmɔ sɔɔmɔ mli. Esa akɛ mɛi fɛɛ kɛ anɔkwayeli ahiɛ mli ‘kɛyawula shi.’ (Mat. 24:13, 14) Eji anɔkwale akɛ, yɛ afii ni yaa hiɛ lɛ hewɔ lɛ, mɛi komɛi nyɛɛɛ afee babaoo taakɛ amɛfeɔ tsutsu yɛ Yehowa sɔɔmɔ lɛ mli lɛ dɔŋŋ. Shi kwɛ bɔ ni ewoɔ mɔ hewalɛ akɛ aaana amɛ ni amɛmiifee nɔ ni amɛbaanyɛ kɛ amɛtsui fɛɛ! Nyɔŋmɔ Wiemɔ lɛ maa nɔ mi ehaa amɛ akɛ Yehowa hiɛ kpaŋ amɛnitsumɔ kɛ suɔmɔ ni amɛjieɔ lɛ kpo yɛ egbɛi lɛ ahewɔ lɛ nɔ.—Luka 21:1-4; Heb. 6:10.

⁸ Kɛ́ eshwɛ fioo ni obaaba nitsumɔ mli hejɔɔmɔ lɛ, mɛni hewɔ okɛ sɔlemɔ susuuu bɔ ni obaanyɛ okɛ oshihilɛ mli tsakemɔi lɛ atsu nii jogbaŋŋ kɛmɔ shi lɛ he? Kɛtsɔ Nyɔŋmɔ yelikɛbuamɔ nɔ lɛ, ekolɛ obaana akɛ nitsumɔ mli hejɔɔmɔ gbeleɔ gbɛ ehaa bo kɛha nitsumɔ babaoo ni kɛ yijiemɔ bahaa Yehowa, ni ekɛ jɔɔmɔi babaoo baa.—Lala 148:12, 13.