Nyɛfea Krɔŋkrɔŋ yɛ Nyɛjeŋba Fɛɛ Mli
1. Mɛni hewɔ ehe hiaa ni wɔfee krɔŋkrɔŋ yɛ wɔjeŋba fɛɛ mli lɛ?
1 Ákɛ Yehowa, Nyɔŋmɔ ni yɔɔ krɔŋkrɔŋ lɛ tsuji lɛ, wɔbɔɔ mɔdɛŋ ni wɔfee krɔŋkrɔŋ yɛ wɔjeŋba fɛɛ mli. (1 Pet. 1:15, 16) Enɛ tsɔɔ akɛ wɔbɔɔ mɔdɛŋ koni wɔfi Yehowa shishitoo mlai lɛ asɛɛ ni wɔkɛtsu nii yɛ wɔshihilɛ mli nifeemɔi fɛɛ amli. Kpokpaa wulu nɔ kpee ni abaafee afi nɛɛ lɛ baaha wɔná hegbɛ krɛdɛɛ kɛjie jeŋba kpakpa kpo.
2. Mɛɛ gbɛ nɔ wɔɔtsɔ wɔjie jeŋba kpakpa kpo yɛ gbɔiatoohei?
2 Yɛ Gbɔiatoohei kɛ Wɔɔhei Krokomɛi: Gbɔiatoohe ko ni kpeeyalɔi yato gbɔ yɛ jɛmɛ nyɛsɛɛ afi lɛ nɔkwɛlɔ ko kɛɛ akɛ: “Yehowa Odasefoi ji gbɔmɛi kpakpai ni ebato gbɔ yɛ biɛ. . . . Nyɛji mɛi ni wɔtaoɔ akɛ amɛbato gbɔ yɛ biɛ.” Kaimɔi ni nyiɛ sɛɛ nɛɛ ni wɔkɛaatsu nii lɛ baaye abua wɔ koni wɔhiɛ wɔgbɛi kpakpa ni wɔyɔɔ lɛ mli: (1) Kaaha mɛi ni fa fe nine miihi otsu lɛ mli fe bɔ ni akpaa gbɛ. (2) Kaahoo niyenii yɛ tsũi ni ahooo niyenii yɛ mli lɛ amli. (3) Kaaloo nibii ni akɛhaa gbɔi lɛ fe nine. (4) Jiemɔ mumɔ lɛ yibii lɛ akpo yɛ bɔ ni okɛ mɔ ni oyato lɛ gbɔ kɛ mɛi ni tsuɔ nii yɛ gbɔiatoohe kɛ skul lɛ yeɔ haa lɛ mli, titri lɛ be ni dekã bɛ jɛmɛ kwraa lɛ.—Gal. 5:22, 23.
3. Gbekɛbii ni ji Odasefoi lɛ ajeŋba baanyɛ aná mɛi krokomɛi anɔ hewalɛ yɛ mɛɛ gbɛ nɔ?
3 Jeŋba kpakpa kpo ni wɔjieɔ lɛ baanyɛ aye odase ni mɔɔ shi jogbaŋŋ. Nyɛsɛɛ afi lɛ, oblanuu ko ni ji Odasefonyo lɛ kɛ heshibaa bi mɔ ko ni hereɔ mɛi gbɔ lɛ koni ebaha lɛ pɛŋ kɛ ehenɔi, ni no sɛɛ lɛ eda lɛ shi. Enɛ ha mɔ ni hereɔ gbɔi lɛ naa kpɛ ehe ni ekɛɛ akɛ: “Yɛ anɔkwale mli lɛ, oblahii kɛ oblayei ni yɔɔ jeŋba kpakpa tamɔ nɛkɛ bɛ dɔŋŋ.” Shi yɛ shihilɛi fioo komɛi amli lɛ, anaa akɛ gbekɛbii komɛi ni akwɛɛɛ amɛnɔ lɛ yawúɔ nu ni yɔɔ jɛmɛ lɛ, amɛshwɛɔ gidigidi, amɛbolɔɔ, ni amɛjoɔ foi yɛ ablanaai lɛ anɔ. Esaaa akɛ fɔlɔi ŋmɛɔ amɛbii lɛ agbɛ ni amɛfeɔ nɔ ni amɛsumɔɔ, shi esa akɛ amɛkwɛ amɛnɔ koni amɛjeŋba kɛ yijiemɔ aha Yehowa.—Abɛi 29:15.
4. Mɛɛ gbɛ nɔ wɔɔtsɔ wɔjie mɔ hesusumɔ kpo wɔtsɔɔ mɛi krokomɛi be ni wɔyeɔ nii yɛ niyelihe ko lɛ?
4 Yɛ Niyelihei: Mɔ ko ni ŋmɛɔ mɛi okpɔlɔ yɛ niyelihe ko ni bɛŋkɛ he ko ni afee kpee yɛ lɛ kɛɛ akɛ: “Odasefoi yɛ srɔto. Amɛbuɔ mɛi krokomɛi.” Nibii ni fata jeŋba kpakpa he ji ni aaakwa bolɔmɔ kɛ ŋmɔ ni aŋmɔɔ waa, ni baanyɛ agba mɛi krokomɛi ni yeɔ niyenii anaa lɛ. Esa akɛ wɔkai hu akɛ eji kusum ni afeɔ yɛ heei komɛi akɛ ake nii, ni enɛ damɔ sɔɔmɔ ni akɛha mɔ lɛ nɔ. Kɛ́ wɔmiiye nii loo wɔmiinu nii po lɛ, esa akɛ wɔtao gbɛ ni wɔɔtsɔ nɔ wɔfee nɔ fɛɛ nɔ kɛwo Nyɔŋmɔ hiɛ nyam.—1 Kor. 10:31.
5. Mɛni fata jeŋba kpakpa kpo ni aaajie yɛ kpee lɛ shishi lɛ he?
5 Yɛ Kpee lɛ Shishi: Esa akɛ wɔjie wɔjeŋba kpakpa lɛ kpo titri yɛ kpee lɛ shishi. Ofainɛ ni okɛ mɛi ni kwɛɔ shitaramɔ nɔ lɛ agbɛtsɔɔmɔ lɛ atsu nii, yɛ he ni akɛ tsɔji mamɔɔ lɛ kɛ asa lɛ nɔ fɛɛ. (Heb. 13:17) Esa akɛ fɔlɔi kɛ amɛbii ata he kome akɛ weku, moŋ fe ni amɛaaŋmɛ amɛbii bibii kɛ oblahii kɛ oblayei bibii lɛ agbɛ ni amɛkɛ oblahii kɛ oblayei krokomɛi ayata he kome akɛ kuu. Esaaa ákɛ akɛ tsɔji ni akɛmɔmɔɔ wiemɔi ko kwraa tsaa asafo lɛ sarawa hewalɛ kpãa loo nɔ ni wiemɔi tsɔɔ mli lɛ nɔ, ni abaanyɛ akɛtsu nii yɛ gbɛ pɛ ni gbaŋ mɛi krokomɛi anaa lɛ nɔ. Esa akɛ afee tsɔji bibii ni akɛ shɛɛ haa kɛtsɔɔ nɔ, kɛ tɛlifon ni kpãa bɛ sɛɛ lɛ bɔ ni egbalaŋ mɛi ajwɛŋmɔ. Kɛ́ oshara ko ba yɛ kpee lɛ shishi lɛ, ofainɛ wó First Aid Department lɛ toi nɔ. Akɛ helatsamɔ mli yelikɛbuamɔ ni sa baaha yɛ kpee lɛ shishi.
6. Mɛni hewɔ ejaaa akɛ aaasha mfoniri kɛye jara yɛ Kristofoi ahenaabuamɔi ashishi lɛ?
6 Kɛ́ oosumɔ ni osha mfoniri lɛ, esaaa akɛ oshaa kɛyeɔ jara. “Yehowa Odasefoi akpeei jeee he ni mɔ kɛaawie ejarayeli saji ahe yɛ. . . . Kɛ́ wɔkɛ jarayeli wo Kristofoi amumɔŋ naanyobɔɔ ni yɔɔ fɛo lɛ muji lɛ, no tsɔɔ akɛ wɔhiɛ esɔɔɔ mumɔŋ nibii kwrakwra.”—w84 7/1 bf. 25, kk. 7; kwɛmɔ Our Ministry wolo lɛ baafa 134, kuku 3 lɛ hu.
7. Wɔjeŋba yɛ kpeei lɛ ashishi lɛ baanyɛ awo Nyɔŋmɔ hiɛ nyam yɛ mɛɛ gbɛ nɔ?
7 Wɔjeŋba haa wɔfeɔ srɔto yɛ mɛi krokomɛi ahe, ni ewoɔ Nyɔŋmɔ hiɛ nyam. (1 Pet. 2:12) Mɛi baana Yehowa Odasefoi lɛ anifeemɔi yɛ kpee lɛ shishi. No hewɔ lɛ, tswaa ofai shi ni ofee krɔŋkrɔŋ yɛ ojeŋba fɛɛ mli.
[Caption on page 5]
Jiemɔ Jeŋba ni Yɔɔ Krɔŋkrɔŋ Kpo Otsɔɔ
◼ Ye wɔɔhe lɛ mlai fɛɛ anɔ
◼ Kwɛmɔ gbekɛbii lɛ anɔ jogbaŋŋ
◼ Naa mli oha mɛi krokomɛi