Gbi Kome Kpee Krɛdɛɛ He Gbɛjianɔtoo Hee

Kɛ wɔna okadi ko ni miibɔ oshara ko ni baa he kɔkɔ, loo wɔnu he ni wɔtsuuu he nii lɛ, hiɛkpatamɔ baanyɛ ajɛ mli kɛba. Mumɔŋ gbɛtsɔɔmɔ ni Yehowa kɛhaa lɛ he nii ni aaatsu lɛ he miihia waa fe enɛ. Abaama enɛ nɔ mi yɛ gbi kome kpee krɛdɛɛ he gbɛjianɔtoo kɛha sɔɔmɔ afi ni baa nɛɛ lɛ mli. Saneyitso lɛ ji, ‘Nyɛkwɛa Bɔ ni Nyɛboɔ Sane Toi Nyɛhaa lɛ Jogbaŋŋ.’—Luka 8:18.

Gbɔ ni baaba lɛ baatsɔɔ bɔ ni wolo ni akɛ mumɔ kanya Paulo ni eŋma kɛyaha Hebribii lɛ mli shishijee yitsei lɛ mli ŋaawoo lɛ kɔɔ wɔhe ŋmɛnɛ lɛ mli yɛ wiemɔ ni ebaaha kɛje shishi lɛ mli. Yɛ naagbee wiemɔ ni ji, “Bó Nyɔŋmɔ Nitsɔɔmɔ Toi Be Fɛɛ Be” lɛ mli lɛ, gbɔ ni baaba lɛ baaye ebua mɛi fɛɛ koni amɛpɛi amɛmli amɛkwɛ kɛji ákɛ yɛ anɔkwayeli mli lɛ amɛmiibo Yehowa, e-Bi lɛ, kɛ “tsulɔ anɔkwafo kɛ nilelɔ” lɛ toi lo.—Mat. 24:45.

Gbɛjianɔtoo lɛ mli wiemɔi srɔtoi babaoo he baaba sɛɛnamɔ eha wekui lɛ titri. Wiemɔ ni yitso ji, “Wekui ni Boɔ Nyɔŋmɔ Wiemɔ Toi ni Nɔ ko Gbalaaa Amɛjwɛŋmɔ” lɛ baaye ebua wɔ koni wɔkaha je lɛŋ nibii miiba wɔmumɔŋ nɔyaa lɛ shi. Nɔ ni baafata he ji saji ni abaabibii mɛi ni efee tsakemɔi koni amɛkɛ mumɔŋ nibii aye klɛŋklɛŋ gbɛhe lɛ. Yɛ wiemɔ ni ji, “Bɔ ni Nyɔŋmɔ Wiemɔ lɛ Toiboo Jogbaŋŋ Wajeɔ Wɔ Oblahii kɛ Oblayei Bibii Lɛ” mli lɛ, abaabibii oblahii kɛ oblayei bibii ni ekɔ shidaamɔ amɛha anɔkwale lɛ yɛ skul, yɛ amɛkɛ amɛtipɛŋfoi asharamɔ mli, loo yɛ sɔɔmɔ nitsumɔ lɛ mli lɛ saji. Wiemɔ ni ji, “Gbekɛbii ni Boɔ Nyɔŋmɔ Toi ni Kaseɔ Nii” lɛ baaye ebua wɔ koni wɔkabu akɛ gbekɛbii bibii bɛ nyɛmɔ tsɔ ni amɛkɛaakase nii. Saji ni abaabibii gbekɛbii kɛ amɛfɔlɔi lɛ baaye ebua wɔ koni wɔna sɛɛnamɔ ni yɔɔ he ákɛ akɛ Yehowa gbɛtsɔɔmɔi aaatsɔse gbekɛbii kɛjɛ amɛgbekɛbiiashi.

Yɛ be mli ni Satan “shishiuɔ jeŋ muu lɛ fɛɛ” lɛ, belɛ Yehowa miitsɔɔ enɔkwa tsuji lɛ gbɛ ni esa akɛ amɛtsɔ nɔ. (Kpoj. 12:9; Yes. 30:21) Eŋaawoo lɛ toi ni wɔboɔ jogbaŋŋ ni wɔkɛtsuɔ nii jogbaŋŋ yɛ wɔshihilɛi amli hu lɛ haa wɔleɔ nii, ni ehaa wɔnáa miishɛɛ, ni ehaa anáa naanɔ wala.—Abɛi 8:32-35.