Aagbala Jwɛŋmɔ Babaoo Kɛmiiba Biblia lɛ Nɔ!
1. Shishijee mli lɛ namɛi afee Buu-Mɔɔ lɛ aha titri, ni namɛi afee The Golden Age lɛ aha?
1 Akala wolo tɛtrɛɛ ni ji The Golden Age lɛ klɛŋklɛŋ nɔ̃ lɛ yɛ October 1, afi 1919. Ebafee dɛŋdade ni he ba sɛɛnamɔ waa diɛŋtsɛ yɛ shiɛmɔ nitsumɔ lɛ mli. Mɛni hewɔ? Ejaakɛ ato he gbɛjianɔ ahã maŋbii lɛ titri. Jeee nakai eji yɛ Buu-Mɔɔ lɛ gbɛfaŋ, ejaakɛ akɛ afii babaoo ebu lɛ akɛ eji wolo tɛtrɛɛ kɛha “asafoku bibioo” lɛ titri. (Luka 12:32) Maŋtsɛyeli shiɛlɔi nyá The Golden Age wolo hee nɛɛ he aahu akɛ yibɔ ni ajara lɛ fa kwraa fe Buu-Mɔɔ lɛ yibɔ ni ajara yɛ afii ni eho lɛ amli lɛ.
2. Mɛni ji The Golden Age lɛ gbɛi ŋmɛnɛ, ni mɛɛ yiŋtoo hewɔ abɔi kalamɔ?
2 Akala The Golden Age wolo tɛtrɛɛ lɛ koni etsɔɔ mɛi akɛ Kristo Afii Akpe Nɔyeli lɛ ji adesai anaagbai lɛ anaa tsabaa diɛŋtsɛ ni kɛ shihilɛ kpakpa baaba abaha adesai. Yɛ afii nyɔŋmai abɔ ni nyiɛ sɛɛ kɛba lɛ amli lɛ, afee tsakemɔi babaoo yɛ The Golden Age lɛ he koni etsu hiamɔ nii ni yɔɔ yɛ nakai beaŋ lɛ he nii. Yɛ afi 1937 lɛ, atsake egbɛi lɛ ni atsɛ́ lɛ akɛ Consolation. Yɛ afi 1946 lɛ, atsake gbɛi lɛ ni atsɛ́ lɛ akɛ Awake!, ni ji gbɛi ni akɛtsɛɔ lɛ ŋmɛnɛ lɛ.
3. Awake! lɛ ebafee wolo ni akɛtsuɔ nii waa kɛha mɛɛ gbalɛ mlibaa?
3 Kɛjɛ beni abɔi wolo tɛtrɛɛ nɛɛ kalamɔ yɛ afi 1919 lɛ, eha anyɛ aye odase jogbaŋŋ kɛmɔ shi. (Mat. 24:14) Shi kɛlɛ, akɛni hiamɔ yɛ wɔbei nɛɛ ahe hewɔ lɛ, nilee yɛ mli akɛ aaaya nɔ afee tsakemɔi yɛ Awake! lɛ he.
4. (a) Kɛ́ abaaŋɔ mɔ ko atee yɛ “Yehowa mlifu gbi lɛ nɔ” lɛ, mɛni ehe hiaa ni efee? (b) Taakɛ Kpojiemɔ 14:6, 7 lɛ tsɔɔ lɛ, mɛni ‘bɔfo ni filikiɔ yɛ ŋwɛi teŋ’ lɛ biɔ ni mɛi fɛɛ afee?
4 Akɛni Awake! lɛ tsɔɔ gbɛ ni yɔɔ miishɛɛ nɔ ewieɔ saji srɔtoi ni kɔɔɔ jamɔŋ saji ahe hewɔ lɛ, mɛi akpekpei abɔ náa ekanemɔ he miishɛɛ. Ŋwanejee ko bɛ he akɛ mɛi ni baa Kaimɔ lɛ daa afi lɛ ateŋ mɛi babaoo ji mɛi ni kaneɔ Awake! lɛ daa. Shi kɛlɛ, kɛ́ mɔ ko miisumɔ ni aŋɔ lɛ atee yɛ “Yehowa mlifu gbi lɛ nɔ” lɛ, no lɛ ehe miihia ni aye abua lɛ ní efee babaoo fe wɔwoji lɛ ni eeekane daa kɛkɛ.—Zef. 2:3; Kpoj. 14:6, 7.
5. (a) Kɛjɛ January afi 2006 kɛyaa lɛ, mɛni abaawie he titri yɛ Awake! lɛ mli? (b) Enɛ baatsirɛ mɛi babaoo koni amɛfee mɛni, ní amɛkɛha mɛɛ gbalɛ aba mli?
5 Enɛ hewɔ lɛ, kɛjɛ January afi 2006 lɛ kɛyaa lɛ, Awake! lɛ baagbala jwɛŋmɔ kɛya Nyɔŋmɔ Maŋtsɛyeli lɛ nɔ titri. Ebaawo mɛi ni kaneɔ lɛ hewalɛ jogbaŋŋ kɛmɔ shi koni amɛkɛ amɛhe afɔ̃ Biblia lɛ nɔ kɛha amɛnaagbai lɛ anaa tsabaa, ni ebaama nibii ni yaa nɔ amrɔ nɛɛ lɛ amlitsɔɔmɔ ni Biblia lɛ kɛhaa lɛ nɔ mi titri. Enɛ baaha mɛi ni kaneɔ lɛ aná nibii ni yaa nɔ amrɔ nɛɛ ahe shishinumɔ kpakpa, ni ekolɛ nɔ ni amɛkaneɔ lɛ baatsirɛ amɛ koni amɛkase Yehowa he nii babaoo.—Zak. 8:23.
6, 7. (a) Mɛɛ gbɛ nɔ Awake! lɛ baatsɔ koni eye ebua mɛi ni amɛkɛ 1 Tesalonikabii 2:13 lɛ atsu nii? (b) Shii enyiɛ abaakala Awake! lɛ, ni tsakemɔ nɛɛ baasa wiemɔi enyiɛ ahe?
6 Awake! wolo tɛtrɛɛ lɛ baaya nɔ awie saji ni mɛi yɔɔ he miishɛɛ lɛ ahe. Shi kɛlɛ, ebaagbala jwɛŋmɔ babaoo kɛba Biblia lɛ nɔ. (1 Tes. 2:13) Akɛni Buu-Mɔɔ lɛ wieɔ Biblia mli saji babaoo ahe, ni Awake! lɛ hu baawie saji babaoo ni damɔ Ŋmalɛ lɛ nɔ hewɔ lɛ, etamɔ nɔ ni ehe ebahiaŋ ni daa nyɔŋ nɔ lɛ, akala Awake! lɛ enyɔ. Enɛ hewɔ lɛ, abaakala Awake! lɛ ekome daa nyɔŋ nɔ kɛjɛ January afi 2006 nɔ̃ lɛ nɔ kɛyaa. Enɛ baaha wɔwoji lɛ aŋmalamɔ, amɛshishitsɔɔmɔ kɛ amɛmajemɔ afee mlɛo.
7 Nɛkɛ tsakemɔ nɛɛ baasa wiemɔi aaafee 100 mlijaa 40 ni akalaa Awake! lɛ yɛ mli lɛ ahe. Aakala Awake! lɛ ekome daa nyɔŋ nɔ loo ekome daa nyɔji etɛ nɔ yɛ wiemɔi babaoo amli momo. Afeŋ tsakemɔ ko kwraa yɛ Buu-Mɔɔ lɛ kalamɔ mli.
8. Shiɛlɔi baanyɛ amɛkɛ Awake! lɛ afata Buu-Mɔɔ lɛ he kɛtsu nii yɛ mɛɛ gbɛ nɔ?
8 Shiɛlɔi baanyɛ amɛkɛ Buu-Mɔɔ srɔtoi ni jeɔ kpo yɛ nyɔŋ ko nɔ lɛ afata Awake! kɛha nakai nyɔŋ lɛ he koni amɛkɛha. Mɛi ni kɛ Awake! lɛ haa lɛ baanyɛ amɛkɛ ekome lɛ nɔŋŋ atsu nii yɛ nyɔŋ muu lɛ fɛɛ mli, ni ehe ebahiaŋ akɛ amɛtsake amɛshiɛmɔ wiemɔ lɛ yɛ nyɔŋ lɛ teŋ taakɛ wɔfeɔ amrɔ nɛɛ.
9. Mɛɛ nitsumɔ Awake! lɛ baaya nɔ atsu?
9 Wolo tɛtrɛɛ ni atsɛ́ lɛ akɛ The Golden Age, kɛ sɛɛ mli lɛ Consolation, ni amrɔ nɛɛ atsɛ́ɔ lɛ akɛ Awake! lɛ eye ebua waa yɛ shiɛmɔ nitsumɔ lɛ mli kɛjɛ beni afee klɛŋklɛŋ nɔ̃ lɛ yɛ afi 1919 kɛbaa nɛɛ lɛ. Wɔsɔlemɔ ji akɛ Yehowa baaya nɔ ajɔɔ wolo tɛtrɛɛ lɛ ni atsake emli saji nɛɛ ajaramɔ lɛ nɔ, ni ebaaye ebua mɛi babaoo ni jɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi” amli lɛ koni amɛkɛ amɛhiɛ afɔ̃ Nyɔŋmɔ Maŋtsɛyeli lɛ nɔ akɛ amɛhiɛnɔkamɔ kome pɛ.—Kpoj. 7:9.