Kpokpaa nɔ Kpee He Gbɛjianɔtoo Hee

Akɛni wɔyɛ jeŋ momo ní mɛi ajeŋba efite yɛ mli nɛɛ lɛ naagbee gbii lɛ amli hewɔ lɛ, ehe miihia waa ní wɔya nɔ wɔha wɔmumɔŋ atadei lɛ ahe atse, ní wɔbu nɔ ni haa ayɔseɔ wɔ ákɛ Kristofoi lɛ he. (Kpoj. 16:15) Enɛ hewɔ lɛ, kpokpaa nɔ kpee ni abaafee yɛ afi 2006 sɔɔmɔ afi lɛ mli lɛ saneyitso ni ji “Nyɛwoa Gbɔmɔ Hee Lɛ” ji nɔ ni sa jogbaŋŋ.—Kol. 3:10.

Klɛŋklɛŋ Gbi: Klɛŋklɛŋ wiemɔ ni abaaha kɛtsara nɔ, ní yitso ji “Gbɔmɔ Hee lɛ Sui ní Wɔɔjie lɛ Kpo” lɛ baama bɔ ni gbɔmɔ hee lɛ sui srɔtoi lɛ ahe baa sɛɛnamɔ kɛhaa wɔ yɛ wɔshihilɛ nifeemɔi fɛɛ amli lɛ anɔ mi. Te wɔɔfee tɛŋŋ wɔwo gbɔmɔ hee lɛ? Abaasusu sanebimɔ nɛɛ he yɛ klɛŋklɛŋ gbi lɛ naagbee wiemɔi enyɔ ni ji “Tsɔsemɔ Ohe Koni Onyɛ Ojwɛŋ Nii Anɔ Jogbaŋŋ” kɛ “Wolokasemɔ ní Tsuuɔ Gbɔmɔ Hee lɛ He” lɛ amli.

Gbi ni Ji Enyɔ: Abaasusu bɔ ni gbɔmɔ hee lɛ náa bɔ ni wɔkɛ wɔlilɛi tsuɔ nii wɔhaa lɛ nɔ hewalɛ lɛ he yɛ wiemɔ ni ahaa kɛtsaraa nɔ lɛ mli nɔ ni ji enyɔ, ní yitso ji “Ní Wɔɔná Nilelɔi Alilɛi” lɛ mli. Maŋshiɛmɔ ni abaaha lɛ yitso ji “Ani Ooye Mɔ Fɔŋ lɛ Nɔ Kunim?,” ni ebaama bɔ ni ehe hiaa ni wɔhiɛ ahi wɔhe nɔ yɛ Satan ŋaatsɔi lɛ ahe lɛ nɔ mi. Kpee lɛ naagbee wiemɔi enyɔ ni ji “Too Ohe Kɛjɛ Je Nɛŋ, Koni Okawo Ohe Muji” kɛ “Ní Wɔɔha Wɔmligbɛ Gbɔmɔ lɛ Atsɔ Ehee Gbi Fɛɛ Gbi” lɛ baaye abua wɔ ní wɔkpoo sui kɛ jeŋbai ni kɛ Nyɔŋmɔ jalɛ gbɛ̀i kpãaa gbee lɛ, koni wɔya nɔ wɔfĩ shi yɛ jamɔ ni wɔkɛhaa Yehowa lɛ mli.

Kwɛ bɔ ni wɔkpaa hewalɛwoo ni akɛbaaha wɔ koni wɔwo gbɔmɔ hee lɛ, ni wɔya nɔ wɔhi shi akɛ gbɔmɛi heei lɛ gbɛ wɔhaa!