Odase ni Ayeɔ Kɛtsɔ Jeŋba Nɔ
1 Yehowa adebɔɔ nii lɛ gbaa ehe nii ni anaaa lɛ, ni amɛfeɔ enɛ ní anuuu amɛgbee. (Lala 19:1-3; Rom. 1:20) Nakai nɔŋŋ wɔjeŋba kpakpa, Kristofoi asui, kɛ wɔhesaamɔ ni hi lɛ yeɔ odase beni wɔgbeleko wɔnaa po. (1 Pet. 2:12; 3:1-4) Esa akɛ efee wɔteŋ mɔ fɛɛ mɔ shwelɛ akɛ ebaatsɔ bɔ ni ebaa ejeŋ ehaa lɛ nɔ ‘ewula Nyɔŋmɔ ni ji wɔyiwalaherelɔ lɛ tsɔɔmɔ lɛ yɛ nibii fɛɛ mli.’—Tito 2:10.
2 Te aaafee tɛŋŋ ni adesai ni yeee emuu aaaha Biblia mli tsɔɔmɔi lɛ ahe aba nyam hu? Gbɛ pɛ ni abaanyɛ atsɔ nɔ afee enɛ ji kɛtsɔ gbɛtsɔɔmɔ ni Nyɔŋmɔ Wiemɔ lɛ kɛhaa lɛ kɛ mumɔ krɔŋkrɔŋ lɛ hewalɛ nɔ. (Lala 119:105; 143:10) Nyɔŋmɔ wiemɔ lɛ “hiɛ kã ni eyɛ hewalɛ ni enaa ba fe klante kɛ enaa ŋta fɛɛ.” (Heb. 4:12) Egbuɔ kɛboteɔ wɔmli tɔ̃ɔ, ni eyeɔ kɛbuaa wɔ koni wɔwo gbɔmɔ hee lɛ. (Kol. 3:9, 10) Mumɔ krɔŋkrɔŋ lɛ haa wɔwoɔ sui ni hi jogbaŋŋ tamɔ mlihilɛ, ejurɔfeemɔ, mlijɔlɛ, kɛ henɔyeli. (Gal. 5:22, 23) Ákɛ aŋkroaŋkroi lɛ, ani wɔmiiŋmɛ Nyɔŋmɔ wiemɔ lɛ kɛ emumɔ lɛ gbɛ koni etsu nii yɛ wɔshihilɛ mli?—Efe. 4:30; 1 Tes. 2:13.
3 Mɛi Yɔseɔ Wɔjeŋba: Kɛ́ wɔhi shi yɛ Yehowa taomɔ nii lɛ anaa ni wɔbɔ mɔdɛŋ akɛ wɔɔjie esui lɛ akpo lɛ, mɛi krokomɛi yɔseɔ enɛ. Ákɛ nɔkwɛmɔnɔ lɛ, nuu ko nitsulɔi fɔɔ ehe fɛoyeli akɛni eji nuu kpitioo lɛ hewɔ. Shi nyɛmi yoo ko ni kɛ lɛ tsuɔ nii lɛ kɛ woo haa lɛ be fɛɛ be, ni ebuɔ lɛ hu. Enɛ tsirɛ lɛ ni ebi nyɛmi yoo lɛ nɔ hewɔ ni esoro lɛ nakai lɛ. Nyɛmiyoo lɛ gbála mli etsɔɔ lɛ akɛ Biblia mli shishitoo mlai ni ekɛtsuɔ nii yɛ eshihilɛ mli lɛ hewɔ ebuɔ mɔ lɛ. Ekɛ lɛ gba Maŋtsɛyeli hiɛnɔkamɔ ni yɔɔ miishɛɛ lɛ hu he sane. Nuu lɛ bɔi Biblia lɛ kasemɔ, ni etee ehiɛ fiofio kɛyashi abaptisi lɛ. Beni eku esɛɛ kɛtee maŋ nɔ he ni ejɛ lɛ, ewekumɛi lɛ ahiɛ sɔ ejeŋba kpakpa lɛ, ni amɛteaŋ mɛi babaoo hu kpɛlɛ anɔkwale lɛ nɔ.
4 Beni wɔyɔɔ wɔnitsumɔ he, skul, aloo be mli ni wɔkɛ wɔwekumɛi kɛ wɔkutsoŋbii shãraa lɛ, wɔbaanyɛ wɔkɛ wɔjeŋba kpakpa kɛ wɔshiɛmɔ nitsumɔ lɛ akanya mɛi krokomɛi koni amɛwo Nyɔŋmɔ hiɛ nyam.—Mat. 5:16.