Ní Aaaye Odase Kɛtsɔ Jeŋba Kpakpa Nɔ
1 Yɛ ŋmɛnɛ jeŋ ni ŋmɛɔ nɔ fɛɛ nɔ feemɔ gbɛ lɛ mli lɛ, obalahii kɛ obalayei babaoo kɛ anyagbafeemɔ fiteɔ amɛshihilɛ gbɛi kɛtsɔ tsofai, jeŋba shara, atuatsemɔ, kɛ basabasafeemɔ nɔ. Nɔ ni tamɔɔɔ nakai lɛ, obalahii kɛ obalayei ni yɔɔ Kristofoi asafo lɛ mli lɛ ajeŋba kpakpa he nɔkwɛmɔnɔ lɛ haa mɔ tsui nyɔɔ emli akɛ aaana, ni eji nii ni feɔ Yehowa fɛo lɛɛlɛŋ. Ebafeɔ odaseyeli ni hewalɛ yɔɔ mli ni baanyɛ agbala mɛi krokomɛi kɛba anɔkwale lɛ he.—1 Pet. 2:12.
2 Niiashikpamɔi babaoo etsɔɔ akɛ Kristofoi obalahii kɛ obalayei ajeŋba kpakpa lɛ ená mɛi ni yɔɔ sɛɛ lɛ anɔ hewalɛ diɛŋtsɛ. Beni ewieɔ Odasefonyo gbekɛ yoo ko ni ji enikaselɔ lɛ he lɛ, skul tsɔɔlɔ ko kɛɛ klasbii lɛ fɛɛ akɛ nɛkɛ gbekɛ yoo nɛɛ Nyɔŋmɔ, ni ji Yehowa lɛ ji anɔkwa Nyɔŋmɔ lɛ. Ekɛɛ enɛ ejaakɛ gbekɛ yoo lɛ baa ejeŋ jogbaŋŋ daa. Tsɔɔlɔ kroko ŋma Asafo lɛ akɛ: “Masumɔ ni majie nyɛyi yɛ obalahii kɛ obalayei kpakpai ni nyɛyɔɔ yɛ nyɛ asafo lɛ mli lɛ hewɔ. . . . Nyɛ obalahii kɛ obalayei lɛ ji nɔkwɛmɔnɔ lɛɛlɛŋ. Amɛbuɔ amɛ onukpai lɛ, amɛhe jɔ, ni amɛkɛ hiɛshikamɔ saa amɛhe. Ni kwɛ bɔ ni amɛle amɛ Biblia lɛ jogbaŋŋ ha! Enɛ ji jamɔ lɛɛlɛŋ!”
3 Odasefonyo ko ni eye afii kpawo lɛ jeŋba kpakpa lɛ ná skul tsɔɔlɔ kroko ni eyɔɔ eklas lɛ nɔ hewalɛ. Gbekɛ nuu lɛ he jɔ, ni subaŋ kpakpa ni eyɔɔ, ní ha ebasoro lɛ yɛ gbekɛbii hii krokomɛi lɛ ahe lɛ gbala lɛ. Bɔ ni ehiɛ dɔɔ yɛ ejamɔ mli hemɔkɛyelii lɛ ahe—ni ehiɛ gbooo akɛ esoro lɛ yɛ nɔ ni eheɔ eyeɔ lɛ hewɔ lɛ ná enɔ hewalɛ waa. Ena akɛ atsɔse ehe nilee lɛ waa, ni akɛ enyɛɔ ‘ekpaa ekpakpa kɛ efɔŋ mli.’ (Heb. 5:14) Naagbee lɛ, gbekɛ nuu lɛ nyɛ yasara tsɔɔlɔ lɛ, ni aje Biblia mli nikasemɔ shishi. Yɛ be ni sa mli lɛ, abaptisi tsɔɔlɔ lɛ, ni sɛɛ mli lɛ ebatsɔ daa gbɛgbalɔ!
4 Odasefonyo ko jeŋba kpakpa lɛ ná obalanyo ko ni yɔɔ eskul lɛ nɔ hewalɛ. Eyɛ sɔrɔto lɛɛlɛŋ—ehe jɔ waa, ekaseɔ nii, ni ekɛ hiɛshikamɔ saa ehe daa; agbɛnɛ hu, nɔ ni tamɔɔɔ gbekɛbii yei krokomɛi lɛ, ekɛ ehe ebɔɔɔ gbekɛbii hii lɛ ahe gbagbalii. Ena akɛ eehi shi yɛ Biblia shishitoo mlai anaa. Obalanyo lɛ bi lɛ ejamɔ mli hemɔkɛyeli lɛ he saji, ni nɔ ni ekase lɛ ná enɔ hewalɛ waa. Ebɔi nikasemɔ, etsɛɛɛ ni abaptisi lɛ, ni naagbee lɛ ekɛ ehe wo gbɛgbamɔ nitsumɔ lɛ mli kɛ Betel sɔɔmɔ mli.
5 Kɛ́ oji Kristofonyo gbekɛ ni miisumɔ koni eye mɛi krokomɛi odase kpakpa lɛ, belɛ kwɛmɔ ohe nɔ yɛ ojeŋba he yɛ gbɛ fɛɛ gbɛ nɔ. Kaaha ohe nɔ kwɛmɔ lɛ miiba shi kɔkɔɔkɔ kɛtsɔ ohe ni okɛaawo je lɛ sui, susumɔi, loo shihilɛ gbɛ mli nɔ fɛɛ nɔ gbɛ ni eŋmɛ lɛ hewɔ. Feemɔ nɔkwɛmɔnii ni nɔ kwɔlɔ yɛ owiemɔ, otadewoo, kɛ ohesaamɔ mli, jeee yɛ be mli ni okɛ ohe woɔ shiɛmɔ nitsumɔ lɛ mli kɛ beni oyaa asafoŋ kpeei pɛ, shi agbɛnɛ hu beni oyɔɔ skul kɛ beni okɛ ohe ewo hiɛtserɛjiemɔ mli lɛ. (1 Tim. 4:12) Kɛ́ mɔ ko ná anɔkwale lɛ he miishɛɛ lɛ, obaaná miishɛɛ diɛŋtsɛ ejaakɛ ‘ooha ola lɛ miitso’ kɛtsɔ ojeŋba kpakpa lɛ nɔ.—Mat. 5:16.