Wolo ni Jɛ Nitsumɔhe Nine

Maŋtsɛyeli Shiɛlɔi ni Asumɔɔ:

Kɛjɛ beni aje sɔɔmɔ afi hee nɛɛ shishi lɛ, atse kpokpai etɛ yɛ Ghana, ni kɛ́ enɛ fata he lɛ atse kpokpai heei ni naa shɛɔ 13 yɛ afii enumɔ ni ho lɛ amli. Amrɔ nɛɛ Ghana nitsumɔhe nine lɛ kwɛɔ kpokpai 61 kɛ kpokpaa wuji 5 anɔ.

Abɔi shiɛmɔ yɛ tsuŋwoohei yɛ nyɛsɛɛ afii fioo nɛɛ amli. Yɛ kpeei ni afee kɛtsara nɔ yɛ afi nɛɛ mli lɛ, Nsawam tsuŋwoohe lɛ nɔkwɛlɔi lɛ ŋmɛ gbɛ ni gboklɛfoi ekpaa komɛi ní etsɔmɔ shiɛlɔi lɛ ná baptisimɔ yɛ tsuŋwoohe lɛ.

Nyɛsɛɛ nɛɛ, agbele United States nitsumɔhe nine lɛ mli. Agbe nitsumɔ lɛ naa ni ajɔɔ nɔ yɛ May 16, afi 2005. Gbɔi babaoo fãa gbɛ kɛyakwɛɔ woji akalamɔhe ni ágbe naa etsɛko, ní ama kɛfata Wallkill nitsumɔhe lɛ he lɛ. Beni nyɛmi yoo ko ni eda lɛ yashara shi yɛ jɛi klɛŋklɛŋ kwraa lɛ, ekɛɛ akɛ: “Shisharamɔ nɛɛ yɛ miishɛɛ ni ekanyaa mɔ! Miná nibii babaoo ni magba nyɛmimɛi lɛ kɛ́ miku misɛɛ mitee shĩa. Kɛ́ Yehowa aaasumɔ lɛ, mato gbɛjianɔ ni mabasara biɛ daa afi.”

Shidaa aha Regional Building Committee lɛ mli bii ni fa fe 1,500 ni kɛ amɛhe ha kɛye bua ni anyɛ agbe United States woji akalamɔhe lɛ mligbelemɔ kɛ Betel tsumaa nitsumɔi krokomɛi lɛ anaa lɛ. Nyɛmi nuu ni kwɛɔ tsumaa nitsumɔ lɛ nɔ lɛ kɛɛ akɛ: “Shwelɛ ni mɛi ni afɔ̃ amɛ nine lɛ jie lɛ kpo kɛtsu nitsumɔ lɛ sa kadimɔ waa, ni amɛhesaai lɛ ahe ba sɛɛnamɔ waa diɛŋtsɛ. Wɔhiɛ sɔ amɛyelikɛbuamɔ lɛ waa.”

Ebaafee nyɛ miishɛɛ akɛ nyɛaale akɛ, nyɛmimɛi hii kɛ yei akpei abɔ ní jɛ United States maji 45 mli lɛ baye bua mɛi ni lasuogbelei ni ba yɛ Florida lɛ fite amɛshiai lɛ. Kwɛ hegbɛ ni wɔná akɛ wɔfata Kristofoi anyɛmimɛi ni yɔɔ suɔmɔ lɛ ahe!—1 Pet. 2:17.

Nitsumɔi ni akɛ ekãa tsuɔ koni akɛha Maŋtsɛyeli lɛ he nibii aya hiɛ nɛɛ sa yijiemɔ! Hiɛ sɔɔ suɔmɔ mli ni ojɛɔ okɛ oshika yeɔ buaa nitsumɔ lɛ hu waa diɛŋtsɛ. (Abɛi 3:9, 10) Eba akɛ, Yehowa aaaya nɔ ajɔɔ mɔdɛŋ ni wɔbɔɔ ‘kɛsɔmɔɔ kɛha enunyam lɛ yijiemɔ’ yɛ ekomefeemɔ mli lɛ nɔ.—Efe. 1:12.

Nyɛnyɛmimɛi,

Ghana Nitsumɔhe Nine