Wolo ni Jɛ Nitsumɔhe Nine

Maŋtsɛyeli Shiɛlɔi ni Asumɔɔ:

Kɛ́ wɔkwɛ bɔ ni nitsumɔ lɛ tee nɔ eha yɛ Ghana yɛ afi 2007 sɔɔmɔ afi lɛ mli lɛ, ehaa wɔnáa miishɛɛ waa diɛŋtsɛ! Akɛni atsu nii waa yɛ April nyɔɔŋ lɛ mli hewɔ lɛ, aná shiɛlɔi 83,293, kɛ gbɛgbalɔi awalɔi 9,109, ni afee shĩa Biblia mli nikasemɔi 218,180. Yibɔi nɛɛ fɛɛ ji yifalɛ heei. Yifalɛ hee hu ni sa kadimɔ ji mɛi 284,245 ni ba Kaimɔ lɛ.

Afee Sɔɔmɔ Tsɔsemɔ Skul lɛ srɔtoi etɛ yɛ sɔɔmɔ afi lɛ mli, ni nikaselɔi ni ba lɛ jɛ Benin, Côte d’Ivoire, Ghana, Liberia, Sierra Leone, kɛ Togo. Ekã shi faŋŋ akɛ nyɛmimɛi hii nɛɛ miiye miibua waa yɛ shikpɔŋkukuji ni amɛsɔmɔɔ yɛ mli lɛ amli. Wɔmiiwo nyɛmimɛi oblahii fɛɛ hewalɛ ni amɛkaha teokrase tsɔsemɔ hegbɛ fɛfɛo nɛɛ ní fe heloonaa nitsumɔ fɛɛ nitsumɔ ni yɔɔ je lɛ mli lɛ miiŋmɛɛ amɛ. (Yes. 48:17; 1 Kor. 1:19-21) Wɔhiɛ sɔɔ onia ni nyɛyaa nɔ nyɛtsuɔ kɛfiɔ jeŋ muu fɛɛ nitsumɔ lɛ sɛɛ ní fiɔ skul nɛɛ feemɔ hu sɛɛ yɛ Ghana lɛ waa.

Aja Maŋtsɛyeli Sane ni ji 37, ni yitso ji “Apasa Jamɔ Naagbee Ebɛŋkɛ!” lɛ aaashɛ akpekpei etɛ yɛ Ghana, ni onukpai kɛ gbekɛbii fɛɛ ni ji shiɛlɔi ni yɔɔ miishɛɛ lɛ kɛ amɛhe wo nitsumɔ lɛ mli kɛmɔ shi. Yiŋtoo ni yɔɔ nifeemɔi nɛɛ asɛɛ ji koni akɛye abua mɛi ni hiɛ tsui ni ja lɛ ni amɛkase nɔ ni Biblia lɛ tsɔɔ diɛŋtsɛ. (Mat. 28:19, 20) Be mli ni oshiɛɔ lɛ, kaimɔi ni oŋmala mɛi ni baajie miishɛɛ kpo lɛ ahe saji, ni oku osɛɛ kɛ yiŋtoo lɛ akɛ obaayaje Biblia mli nikasemɔ shishi. Wɔyɛ he miishɛɛ akɛ wɔkɛ nyɛ efee ekome kɛmiitsu nitsumɔ ni he hiaa nɛɛ, ni wɔkɛ wɔ-Kristofoi asuɔmɔ ŋamɔi miimaje nyɛ.

Nyɛnyɛmimɛi,

Ghana Nitsumɔhe Nine