Skul ní Yeɔ Buaa Wɔ ní Wɔkɛ Nɔ ni Wɔkaseɔ lɛ Atsu Nii
1 Kɛ́ wɔmiikase saji ni ato naa yɛ Teokrase Sɔɔmɔ Skul He Gbɛjianɔtoo Kɛha 2006 lɛ mli lɛ, esa akɛ wɔbɔ mɔdɛŋ ní wɔkɛto wɔsɔɔmɔ krɔŋkrɔŋ lɛ kɛ wɔ daa gbi shihilɛ he koni no aha wɔná tsɔɔmɔi ni jɛ Ŋmalɛi lɛ amli lɛ ahe sɛɛ. Esa akɛ wɔbɔ mɔdɛŋ ní wɔkɛ nɔ ni wɔkaseɔ lɛ atsu nii.—Yoh. 13:17; Fil. 4:9.
2 Sane Hetoohamɔ: Akɛ miniti kome efata be ni ahaa toibolɔi kɛ amɛhe woɔ Biblia mli saji otii anɔmimaa lɛ mli lɛ he yɛ afi nɛɛ gbɛjianɔtoo lɛ mli. Enɛ tsɔɔ akɛ esa akɛ nyɛmi nuu ni tsuɔ fã nɛɛ he nii lɛ akwɛ jogbaŋŋ koni etsu he nii yɛ minitii enumɔ mli, shi jeee minitii ekpaa mli. Esa akɛ toibolɔi hu ni haa sane hetoo lɛ ahiɛ ahi be ni esa akɛ amɛkɛwie lɛ nɔ. Kɛ mɔ ni haa sane hetoo lɛ tsɔ hiɛ esusu nɔ ni ebaawie lɛ he jogbaŋŋ lɛ, ebaanyɛ ewie hewalɛwoo wiemɔ ko ni sɛɛnamɔ yɔɔ he yɛ hiŋmɛitswai 30 loo nɔ ni shɛɛɛ nakai mli. Mɛi aaafee nyɔŋma baanyɛ awie wiemɔi ni he yɔɔ sɛɛnamɔ yɛ minitii enumɔ ni ashi koni toibolɔi kɛ amɛhe awo sanegbaa lɛ mli lɛ mli.
3 Wiemɔi ni Tsɔɔ Mɔ Nii: Esa akɛ Biblia mli saji otii anɔmimaa lɛ kɛ tsɔsemɔ wiemɔ lɛ amamɔ saji otii pɔtɛɛ ni wɔbaanyɛ wɔkɛtsu nii yɛ shiɛmɔ nitsumɔ lɛ kɛ wɔshihilɛ gbɛ̀i krokomɛi amli lɛ anɔ mi. Esaaa akɛ wielɔ lɛ haa etoibolɔi lɛ naa hiɛdɔɔ ní yɔɔ sane lɛ ni amɛkɛaatsu nii lɛ he lɛ kɛkɛ. Esa akɛ etsɔɔ nɔ ni esa akɛ afee, etsɔɔ bɔ ni abaafee lɛ aha, koni egbala jwɛŋmɔ kɛya sɛɛnamɔi ni yɔɔ gbɛ ni tamɔ nɛkɛ ni aaakɔ lɛ nɔ. Ebaanyɛ ekɛɛ akɛ, “Naa gbɛtsɔɔmɔ ni ŋmalɛ nɛɛ kɛhaa wɔ” aloo “Nɛkɛ ji bɔ ni wɔbaanyɛ wɔkɛ kukuji nɛɛ atsu nii yɛ shiɛmɔ nitsumɔ lɛ mli.” Esa akɛ Onukpai kɛ asafoŋ sɔɔlɔi ni le nibii ni yaa nɔ yɛ amɛsafo lɛ mli lɛ abɔ mɔdɛŋ ní amɛha sane lɛ akɔ nibii pɔtɛɛ komɛi ni yaa nɔ yɛ jɛmɛ lɛ ahe.
4 Biblia mli nɔkwɛmɔnii ni akɛaatsu nii kɛji aatsɔɔ bɔ ni abaafee akɛ sane ni asusuɔ he lɛ atsu nii yɛ shihilɛ mli lɛ baanyɛ afee gbɛ ni mɔɔ shi waa. Be mli ni wielɔ lɛ etsĩ Ŋmalɛ mli nɔkwɛmɔnɔ ko tã lɛ, ebaanyɛ ekɛɛ akɛ, “Bo hu obaanyɛ okɛ shihilɛ ko ni tamɔ nɛkɛ akpe.” Esa akɛ ekwɛ koni Biblia mli nɔkwɛmɔnɔ ni ekɛbaatsu nii lɛ kɛ ŋmalɛ mli wiemɔi ni tsɔ nakai nɔkwɛmɔnɔ lɛ hiɛ kɛ nɔ ni nyiɛ sɛɛ, nɔ ni Biblia muu lɛ fɛɛ kɛɔ, kɛ nɔ ni “tsulɔ anɔkwafo kɛ nilelɔ” lɛ ekala lɛ hu akpa gbee.—Mat. 24:45.
5 Ŋaalee shishi ji nilee kɛ saneshishinumɔ ni akɛtsuɔ nii jogbaŋŋ. ‘Ŋaalee he hiaa waa diɛŋtsɛ.’ (Abɛi 4:7) Eba akɛ be mli ni wɔyaa nɔ wɔtaoɔ nilee kɛtsɔ Teokrase Sɔɔmɔ Skul lɛ mli nikasemɔ nɔ lɛ, wɔhe baasa koni wɔnyɛ wɔkɛ nakai nilee lɛ atsɔɔ mɛi krokomɛi anii.