Okɛ Wɔ-Biblia Kasemɔ Woji lɛ Atsu Nii yɛ Nilee Mli
1, 2. Mɛɛ su mɛi babaoo jieɔ lɛ kpo yɛ wɔwoji lɛ ahe, ni mɛɛ sane enɛ haa abiɔ?
1 “Mibɔi nyɛwoji lɛ kanemɔ kɛjɛ afi 1965 tɔ̃ɔ. Kɛ́ miikane nyɛwoji lɛ ni etsɛ ŋmalɛ ko yisɛɛ lɛ, migbeleɔ Biblia lɛ ni mikaneɔ, ni nɔ fɛɛ nɔ ni yɔɔ nyɛwoji lɛ amli lɛ kɛ Biblia lɛ kpaa gbee. Mishweɔ daa nɛɛ akɛ male anɔkwale ni kɔɔ Nyɔŋmɔ kɛ Yesu he, ni yɛ anɔkwale mli lɛ nyɛwoji lɛ kɛ Biblia lɛ miiha miiná misanebimɔi lɛ ahetooi.” Wiemɔi nɛɛ ji nɔ ni nuu ko ŋma kɛyaha Yehowa Odasefoi anitsumɔhe yitso lɛ. Nuu lɛ bi yɛ nakai wolo lɛ nɔŋŋ mli koni akɛ lɛ abakase Biblia lɛ.
2 Taakɛ nakai nuu ni yɔɔ hiɛsɔɔ lɛ ji lɛ, gbɔmɛi akpekpei abɔ ni yɔɔ jeŋ fɛɛ lɛ hiɛ sɔɔ Biblia kasemɔ woji ni “tsulɔ anɔkwafo kɛ nilelɔ” lɛ feɔ lɛ. (Mat. 24:45) Akalaa woji babaoo daa afi ní akɛye abua mɛi ni yɔɔ tsui ni ja lɛ koni “amɛshɛ anɔkwale lɛ lee mli.” (1 Tim. 2:4) Mɛɛ gbɛ nɔ wɔbaanyɛ wɔtsɔ wɔkɛ wɔ-Biblia kasemɔ woji lɛ atsu nii yɛ nilee mli?
3. Mɛni wɔbaanyɛ wɔfee koni wɔkakpata wɔwoji lɛ ahiɛ?
3 Kaakɔlɔ Nɔ ni Fa Fe Nine: Beni be shwieɔ mli lɛ, ebaanyɛ eba akɛ wɔbaatĩa woji babaoo anaa fe bɔ ni wɔbaanyɛ wɔkɛha. Mɛni wɔbaanyɛ wɔfee koni wɔkakpata wɔwoji ni he yɔɔ sɛɛnamɔ lɛ ahiɛ? Kɛji akɛ wɔmiikɔlɔ woji ni wɔkɛbaaha yɛ shiɛmɔ nitsumɔ lɛ mli lɛ, ehe miihia ni wɔkɛ sɛɛyoomɔ atsu nii. Yɛ nɔ najiaŋ ni wɔɔkɔlɔ woji ni wɔkɛbaaha lɛ babaoo lɛ, wɔbaanyɛ wɔkɔ ekome loo enyɔ pɛ, koni kɛ́ wɔkɛyaha lɛ wɔbakɔlɔ ekrokomɛi wɔfata he. Enɛ haŋ wɔtĩa woji babaoo anaa yɛ wɔshĩai amli. Nakai nɔŋŋ kɛji akɛ wɔyɛ woji tɛtrɛbii babaoo yɛ wɔshĩai amli ni wɔkɛhako lɛ, ebaafee nɔ ni hi akɛ wɔkɛ enɛɛmɛi baaha dani wɔyakɔlɔ ekrokomɛi.
4. Kɛji akɛ asafo ko yɛ woji pii lɛ, mɛni abaanyɛ afee yɛ he?
4 Woji ni Nyɛyɔɔ Pii yɛ Nyɛsafo lɛ Mli: Kɛ́ asafo ko yɛ wolo ko babaoo lɛ, no lɛ mɔ ni shɛɔ woji haa asafoi lɛ baanyɛ abi asafoi krokomɛi ni yɔɔ akutso lɛ mli lɛ kɛji akɛ amɛbaanyɛ amɛkɛ woji ni eshwɛ lɛ atsu nii lo. Shiɛlɔi baanyɛ amɛkɛ woji memeji lɛ aha amɛwekumɛi ni heee yeee, Biblia mli nikaselɔi, kɛ mɛi krokomɛi. Ekolɛ mɛi ni kpaako amɛkɛ asafo lɛ ebɔi bɔɔ lɛ baasumɔ ní amɛná woji memeji nɛɛ eko ní amɛkɛwo he ni amɛkɛ teokrase woji toɔ lɛ.
5. Mɛɛ gbɛ nɔ wɔɔtsɔ wɔtsɔɔ yɛ akɛ wɔhiɛ sɔɔ wɔwoji lɛ?
5 Wɔmiisumɔ ni wɔkɛ wɔwoji lɛ atsu yiŋtoo hewɔ ni afee, ni ji koni akɛye abua mɛi ni hiɛ tsui ni ja lɛ ni amɛkase Yehowa yiŋtoo ni yɔɔ naakpɛɛ lɛ he nii lɛ he nii. Beni Yesu fee naakpɛɛ nii ni ekɛlɛ asafo babaoo lɛ, ehaaa niyenii fufuji ni shwɛ lɛ afite, nakai nɔŋŋ esa akɛ efee oti ni ma wɔhiɛ akɛ wɔkɛ Biblia kasemɔ woji ni he yɔɔ sɛɛnamɔ ni afeɔ ahaa wɔ lɛ baatsu nii jogbaŋŋ. (Yoh. 6:11-13) Kɛji akɛ wɔwoji lɛ hi wɔwojiatoohei loo wɔbaagii amli lɛ, no lɛ shɛɛ sane ni hereɔ mɔ yiwala ni yɔɔ mli lɛ nyɛŋ ata mɛi ni miisumɔ ni amɛfee nɔ ni ja lɛ atsui he. No hewɔ lɛ esa akɛ wɔkɛ nilee atsu nii kɛ́ wɔmiikɔlɔ woji ni wɔkɛbaaya shiɛmɔ lɛ, ní wɔkɛtsu nii hu yɛ nilee mli koni ehe aba sɛɛnamɔ kɛha mɛi krokomɛi.—Fil. 4:5.