Bɔ ni Aaafee Aje Nikasemɔi Ashishi yɛ Biblia lɛ Tsɔɔ Wolo lɛ Mli

Wɔteŋ mɛi babaoo baaná he miishɛɛ akɛ wɔkɛ mɛi aaafee Biblia mli nikasemɔ kɛji wɔɔnyɛ wɔje nikasemɔ lɛ shishi. Wolo hee ni ji Mɛni Biblia lɛ Tsɔɔ Diɛŋtsɛ? lɛ baanyɛ aye abua wɔ ni wɔfee enɛ. Ato hiɛkpamɔ wiemɔ ni yɔɔ baafa 3-7 lɛ he gbɛjianɔ koni eha anyɛ akɛ wolo lɛ atsu nii ní akɛ shiatsɛ lɛ aje Biblia mli sanegbaa shishi. Ebaafee mlɛo eha mɛi po ni bɛ niiashikpamɔ tsɔ̃ yɛ shiɛmɔ nitsumɔ lɛ mli lɛ akɛ amɛkɛ wolo lɛ aaatsu nii kɛje nikasemɔi ashishi.

◼ Obaanyɛ okɛ baafa 3 lɛ atsu nii kɛka shiɛmɔ wiemɔ nɛɛ okwɛ:

Beni otsĩ adafitswaa sane ko loo naagba ko ni gbaa mɛi ni yɔɔ nyɛshikpɔŋkuku lɛ mli lɛ anaa lɛ tã sɛɛ lɛ, gbalamɔ shiatsɛ lɛ jwɛŋmɔ kɛya sanebimɔi ni akɛ niŋmaai ni mli ti eŋmala ni yɔɔ baafa 3 lɛ anɔ, ni oha ewie he. No sɛɛ lɛ gbelemɔ baafa 4-5 lɛ.

◼ Aloo obaasumɔ ni oma saji otii ni yɔɔ baafa 4-5 lɛ anɔ mi kɛje shishi:

Obaanyɛ okɛɛ akɛ, “Ani efeŋ nɔ ni yɔɔ miishɛɛ kɛ́ tsakemɔi ni yɔɔ mfoniri nɛɛ mli lɛ ba mli diɛŋtsɛ?” Aloo obaanyɛ obi akɛ, “Te shiwoi nɛɛ ateŋ nɔ ni obaasumɔ ni eba mli lɛ?” Bó hetoo ni mɔ lɛ baaha lɛ toi jogbaŋŋ.

Kɛ́ shiatsɛ lɛ ná ŋmalɛi lɛ ateŋ ekome he miishɛɛ waa lɛ, okɛ lɛ asusu wolo lɛ mli kukuji ní wieɔ nakai ŋmalɛ lɛ he lɛ ahe koni okɛtsɔɔ lɛ nɔ ni Biblia lɛ kɛɔ yɛ nakai sane lɛ he. (Kwɛmɔ akrabatsa ni yɔɔ nɔ ni aŋma ahɔ mli yɛ baafa nɛɛ mli lɛ.) Okɛ mɔ lɛ asusu sane lɛ he taakɛ obaafee kɛ́ okɛ mɔ ko miifee Biblia mli nikasemɔ lɛ. Abaanyɛ akɛ minitii enumɔ kɛyashi minitii nyɔŋma afee enɛ yɛ klɛŋklɛŋ saramɔ lɛ mli yɛ mɔ lɛ shinaa lɛ naa.

◼ Gbɛ kroko ji ni okɛ baafa 6 lɛ atsu nii ni oha mɔ lɛ atsɔɔ ejwɛŋmɔ yɛ he:

Gbalamɔ shiatsɛ lɛ jwɛŋmɔ kɛya sanebimɔi ni yɔɔ baafa lɛ shishigbɛ lɛ anɔ, ni obi akɛ, “Ani osusu sanebimɔi nɛɛ ateŋ eko he pɛŋ?” Kɛ́ ejie miishɛɛ kpo yɛ sanebimɔi lɛ ateŋ ekome he lɛ, gbelemɔ wolo lɛ mli kukuji ni haa sanebimɔ lɛ hetoo lɛ. (Kwɛmɔ akrabatsa ni yɔɔ nɔ ni aŋma ahɔ mli yɛ baafa nɛɛ mli lɛ.) Kɛ́ okɛ lɛ fee ekome kɛsusu sane lɛ he lɛ, no lɛ oofee Biblia mli nikasemɔ.

◼ Abaanyɛ akɛ baafa 7 lɛ atsu nii ni akɛfee Biblia mli nikasemɔ he nɔkwɛmɔnɔ:

Kanemɔ baafa lɛ mli klɛŋklɛŋ saji etɛ lɛ, koni no sɛɛ lɛ ogbele yitso 3 lɛ, ni okɛ kuku 1-3 lɛ atsu nii kɛfee nikasemɔ he nɔkwɛmɔnɔ. Too gbɛjianɔ ni oku osɛɛ okɛ lɛ ayasusu sanebimɔi ni yɔɔ kuku 3 lɛ mli lɛ ahe.

◼ Bɔ ni aaafee ato gbɛjianɔ kɛha sɛɛkuu-kɛsaramɔ:

Beni omuɔ klɛŋklɛŋ nikasemɔ lɛ naa lɛ, too gbɛjianɔ kɛha sanegbaa lɛ nɔtsamɔ. Obaanyɛ okɛɛ kɛkɛ akɛ: “Wɔkase nɔ ni Biblia lɛ tsɔɔ yɛ sane ni he hiaa lɛ he yɛ minitii fioo pɛ mli. Wɔbaanyɛ wɔsusu [tsĩi sanebimɔ ni nyɛbaasusu he lɛ tã] he be kroko. Ofainɛ ani manyɛ maba biɛ yɛ be ni tamɔ nɛkɛ nɔŋŋ mli wɔsɛɛ otsi?”

Yɛ be mli ni Yehowa be ní eto lɛ bɛŋkɛɔ nɛɛ lɛ, Yehowa yaa nɔ ewajeɔ wɔ kɛha nitsumɔ ni akɛwo wɔdɛŋ lɛ. (Mat. 28:19, 20; 2 Tim. 3:17) Nyɛhaa wɔkɛ wolo hee ni hi waa nɛɛ atsua nii jogbaŋŋ kɛjea Biblia mli nikasemɔi ashishi.

[Caption on page 3]

Ŋmalɛi ni Yɔɔ Baafa 4-5 lɛ Ahe Susumɔ

◻ Kpojiemɔ 21:4 (bf. 27-28, kk. 1-3)

◻ Yesaia 33:24; 35:5, 6 (bf. 36, kk. 22)

◻ Yohane 5:28, 29 (bf. 72-73, kk. 17-19)

◻ Lala 72:16 (bf. 34, kk. 19)

Hetooi Kɛha Sanebimɔi ni Yɔɔ Baafa 6 Lɛ

◻ Mɛni hewɔ wɔpiŋɔ? (bf. 108, kk. 6-8)

◻ Mɛɛ gbɛ nɔ wɔɔtsɔ wɔdamɔ shihilɛ mli yeyeeyefeemɔi anaa? (bf. 184-185, kk. 1-3)

◻ Mɛɛ gbɛ nɔ wɔɔtsɔ wɔha miishɛɛ babaoo ahi wɔweku shihilɛ mli? (bf. 142-143, kk. 20)

◻ Mɛni baa wɔnɔ yɛ gbele mli? (bf. 58-59, kk. 5-6)

◻ Ani be ko baashɛ ni wɔbaana wɔsuɔlɔi ni egboi lɛ ekoŋŋ? (bf. 72-73, kk. 17-19)

◻ Te wɔɔfee tɛŋŋ wɔná nɔmimaa akɛ Nyɔŋmɔ baaha eshiwoi kɛha wɔsɛɛ lɛ aba mli? (bf. 25, kk. 17)