Ani Obaaje Biblia Mli Nikasemɔ Shishi yɛ October Mli?
1 Wɔkɛ Buu-Mɔɔ kɛ Awake! woji tɛtrɛbii lɛ baaha yɛ October mli. Kɛ́ wɔmiiku wɔsɛɛ wɔyasara mɛi ni jie miishɛɛ kpo lɛ, aawo wɔ hewalɛ ni wɔkɛ dɛhiɛmɔ wolo ni ji Ani Obaasumɔ ní Ole Anɔkwale Lɛ? aha amɛ, ni wɔbɔ mɔdɛŋ wɔkɛ amɛ aje Biblia mli nikasemɔ shishi. Te wɔɔfee tɛŋŋ wɔfee nakai kɛ́ wɔmiifee sɛɛkuu-kɛsaramɔ lɛ?
2 Bɔ ni Ooofee Okɛ Dɛhiɛmɔ Wolo lɛ Atsu Nii: Wɔbaanyɛ wɔkɛɛ akɛ: “Woji tɛtrɛbii ni mishi miha bo lɛ woɔ mɛi ni yɔɔ shihilɛi srɔtoi kɛ jamɔi srɔtoi amli lɛ hewalɛ ni amɛkase Biblia lɛ. [Okɛ dɛhiɛmɔ wolo ni ji Le Anɔkwale Lɛ aha shĩatsɛ lɛ, ni okɛ sanebimɔi ni yɔɔ hiɛgbɛ lɛ atsɔɔ lɛ.] Naa sanebimɔi komɛi ni obaaná he miishɛɛ ni Biblia lɛ haa amɛhetoi yɛ gbɛ ni haa mɔ tsui nyɔɔ emli nɔ. Ani obi saji nɛɛ ateŋ eko pɛŋ?” Beni shĩatsɛ lɛ eha hetoo sɛɛ lɛ, okɛ lɛ fɛɛ asusu sanebimɔi ni etsɔɔ lɛ ateŋ ekome he kɛjɛ dɛhiɛmɔ wolo lɛ mli, ni okane ŋmalɛi ni atsɛ yisɛɛ lɛ ateŋ ekome. No sɛɛ lɛ, ha ele akɛ enɛ ji nɔ ni Biblia lɛ tsɔɔ lɛ he nɔkwɛmɔnɔ ko kɛkɛ, ni oha lɛ Biblia lɛ Tsɔɔ wolo lɛ eko. No sɛɛ lɛ, wɔbaanyɛ wɔkɛ lɛ asusu yitso ko ni ebaahala kɛjɛ he ni ato saneyitsei lɛ anaa yɛ lɛ amli klɛŋklɛŋ kukuji lɛ ahe. Aloo wɔbaanyɛ wɔkɛ lɛ asusu saneyitso ko ni wieɔ sane ni wɔkɛ lɛ susu he yɛ dɛhiɛmɔ wolo lɛ mli lɛ he babaoo lɛ he. Naa hei komɛi ni wɔbaana saji nɛɛ ekomɛi yɛ:
● Ani Nyɔŋmɔ susuɔ wɔhe lɛɛlɛŋ? (bf. 9-11, kk. 6-10)
● Ani ta kɛ amanehulu sɛɛ baafo be ko? (bf. 12, kk. 12-13)
● Mɛni baa wɔnɔ kɛ́ wɔgboi? (bf. 59-60, kk. 7-8)
● Ani hiɛnɔkamɔ ko yɛ kɛha mɛi ni egboi lɛ? (bf. 71, kk. 13-15)
● Mɛɛ gbɛ nɔ matsɔ masɔle ní Nyɔŋmɔ abo mi toi? (bf. 166-167, kk. 5-8)
● Te mafee tɛŋŋ maná miishɛɛ yɛ shihilɛ mli? (bf. 9, kk. 4-5)
3 Shi kɛ́ shihilɛ lɛ eŋmɛɛɛ gbɛ ni wɔkɛ Biblia lɛ Tsɔɔ wolo lɛ afee nikasemɔ lɛ he nɔkwɛmɔnɔ wɔtsɔɔ mɔ lɛ ni wɔkɛ lɛ aje shishi beni wɔku wɔsɛɛ wɔyasara lɛ klɛŋklɛŋ kwraa lɛ, wɔbaanyɛ wɔto gbɛjianɔ be fɛɛ be ni wɔku wɔsɛɛ ni wɔkɛ lɛ ayatsa sane ni wɔkɛ lɛ gba lɛ nɔ. Ni kɛ́ mɔ lɛ jie miishɛɛ babaoo kpo lɛ, be fɛɛ be ni wɔbaayasara lɛ lɛ, wɔbaanyɛ wɔkɛ lɛ asusu sanebimɔi krokomɛi ahe yɛ dɛhiɛmɔ wolo lɛ mli dani sɛɛ mli lɛ wɔkɛ lɛ abɔi Biblia lɛ Tsɔɔ wolo lɛ kasemɔ. Eba akɛ wɔkɛ dɛhiɛmɔ wolo ni he yɔɔ sɛɛnamɔ nɛɛ baatsu nii jogbaŋŋ yɛ October mli kɛje Biblia mli nikasemɔ shishi, ni wɔye wɔbua mɛi ni hiɛ tsui kpakpa lɛ ni ‘amɛle anɔkwale lɛ.’—Yoh. 8:31, 32.
[Nikasemɔ lɛ he Sanebimɔi]
1. Mɛɛ woji akɛbaaha yɛ October mli?
2. Te wɔɔfee tɛŋŋ wɔkɛ Le Anɔkwale Lɛ dɛhiɛmɔ wolo lɛ atsu nii kɛ́ wɔmiiku wɔsɛɛ wɔyasara mɔ ko ni wɔha lɛ woji tɛtrɛbii lɛ eko lɛ?
3. Te wɔɔfee tɛŋŋ wɔtsake gbɛ ni wɔkɛtsuɔ nii lɛ mli yɛ bɔ ni shihilɛ lɛ ji lɛ naa lɛ?