Yelikɛbuamɔ ni Abaanyɛ Aná Be Fɛɛ Be
1. Mɔ ko baanyɛ agbɔjɔ yɛ mumɔŋ yɛ mɛɛ gbɛ nɔ?
1 Anna ni eji nyɛmi yoo ni tsuɔ nitsumɔ ko ni heɔ ebe babaoo, ní ewu jeee heyelilɔ lɛ yɔse akɛ ebɛ mlɛo kɛha lɛ akɛ eeeya Kristofoi akpeei daa, ní ekɛ ehe awo shiɛmɔ nitsumɔ lɛ mli ní ekase Nyɔŋmɔ Wiemɔ lɛ. Eyɛ mli akɛ esumɔɔ Yehowa lolo moŋ, shi ekpa shiɛmɔ yaa. Miishɛɛ sane ji akɛ, ená mumɔŋ yelikɛbuamɔ kɛjɛ onukpai ni susuɔ mɔ he lɛ adɛŋ.
2. Kristofoi fɛɛ baanyɛ amɛfee amɛhe mɛi ni kɛ yelikɛbuamɔ haa be fɛɛ be yɛ mɛɛ gbɛ nɔ?
2 Ní aaakpɛlɛ yelikɛbuamɔ ni Kristofoi asafo lɛ kɛhaa yɛ mumɔŋ lɛ nɔ lɛ tsɔɔ hekɛnɔfɔɔ ni ayɔɔ yɛ Yehowa diɛŋtsɛ mli. Asafo lɛ mli onukpai lɛ taoɔ hegbɛi, ni amɛkɛ hewalɛwoo kɛ yelikɛbuamɔ ni hi jogbaŋŋ haa mɛi ni ewa kɛha amɛ akɛ amɛaatiu mumɔŋ nibii asɛɛ lɛ, ni amɛkɛ enɛ feemɔ kaseɔ suɔmɔ mli ni Yesu Kristo jɛɔ esusuɔ mɔ he lɛ. (1 Tes. 5:14) Bei pii lɛ, hewalɛwoo wiemɔ ni mlihilɛ yɔɔ mli ni jɛ Ŋmalɛ lɛ mli ni tswaa mɔ emaa shi lɛ baanyɛ afee nɔ̃ pɛ ni he hiaa. Hegbɛ ni aaaŋɔ ni akɛye abua mɛi ni egbɔjɔ yɛ mumɔŋ yɛ be kukuoo mli lɛ ji Kristofoi fɛɛ anitsumɔ, shi jeee onukpai lɛ pɛ kɛkɛ. Ŋwanejee ko kwraa bɛ he akɛ wɔteŋ mɔ fɛɛ mɔ ená hewalɛ ni “wiemɔ” kpakpa “ni awie yɛ be ni sa mli lɛ” náa yɛ mɔ nɔ lɛ he sɛɛ.—Abɛi 25:11; Yes. 35:3, 4.
3, 4. Mɛni ehe baahia ni afee ni akɛye abua mɛi krokomɛi, ni mɛɛ gbɛ nɔ wɔɔtsɔ wɔfee nakai?
3 Bo Klɛŋklɛŋ Ŋɔɔ Hegbɛ Lɛ: Suɔmɔ mli ni aaajɛ asusu mɛi ni yelikɛbuamɔ he hiaa amɛ lɛ ahe lɛ biɔ ni wɔ klɛŋklɛŋ wɔŋɔ hegbɛ lɛ ni wɔjie mlihilɛ ní osato bɛ mli kpo wɔtsɔɔ amɛ. Beni Yonatan ná ele haomɔ shihilɛ ni David yɔɔ mli lɛ, ‘ete shi ni eyiŋ etee David ŋɔɔ yɛ koo lɛ mli, ni eyawo lɛ hewalɛ.’ (1 Sam. 23:15, 16) Okɛ mlihilɛ aye abua mɛi krokomɛi. Yibiiwoi kpakpai jɛɔ mɔ hesusumɔ ni osato bɛ mli ní akɛaawie lɛ mli kɛbaa. Kɛfata he lɛ, Yesu tsɔɔ faŋŋ akɛ, kɛji nine aaanyɛ ashɛ nyɛmi nuu loo nyɛmi yoo ko nɔ ekoŋŋ lɛ, ehe baahia ni akɛ yiŋtoo kpakpa abɔ mɔdɛŋ waa ni akɛye abua mɔ lɛ. (Luka 15:4) Suɔmɔ diɛŋtsɛ ni aaaná akɛ aye abua mɔ kroko lɛ baakanya wɔ ni wɔkã he wɔye wɔbua mɔ lɛ, kɛ́ mɔ lɛ eyaaa ehiɛ oyayaayai po.
4 Kwɛ hewalɛwoo ni eji kɛ́ wɔ klɛŋklɛŋ wɔŋɔ hegbɛ lɛ kɛfɔ̃ mɛi krokomɛi tamɔ mɛi ni wɔkɛ amɛ yɔɔ asafo woloŋ nikasemɔ kuu mli lɛ anine koni amɛfata wɔhe kɛya shiɛmɔ! Be mli ni wɔyeɔ wɔbuaa naanyo ko ni ji Yehowa tsulɔ koni ekɛ ehe awo shiɛmɔ nitsumɔ lɛ mli lɛ, wɔbaanyɛ wɔkɛ hegbɛ lɛ atsu nii ni wɔkɛwo nakai mɔ lɛ hewalɛ. Miishɛɛ bei ni tamɔ nɛkɛ ni wɔkɛ ekomefeemɔ náa mli gbɛfaŋnɔ yɛ Yehowa sɔɔmɔ mli lɛ woɔ mɛi ni ebɔi hiɛyaa ekoŋŋ yɛ mumɔŋ lɛ hewalɛ waa.
5. Yɛ shihilɛi komɛi amli lɛ, mɛɛ yelikɛbuamɔ onukpai lɛ baanyɛ amɛkɛha?
5 Gbɛjianɔtoo ni Suɔmɔ Yɔɔ Mli: Ekolɛ yelikɛbuamɔi krokomɛi hu he baahia mɛi ni ekpa shiɛmɔ yaa etsɛ lɛ loo mɛi ni ekpa asafoŋ kpeei yaa yɛ be ko mli lɛ bɔni afee ni akɛtswa amɛhemɔkɛyeli lɛ ama shi. Ekolɛ nɔ ni he baahia nɔŋŋ ji ní akɛ amɛ afee Biblia mli nikasemɔ kɛtsɔ wolo tamɔ Já Anɔkwa Nyɔŋmɔ Kome Lɛ, Tsi Obɛŋkɛ Yehowa, loo Mɛni Biblia lɛ Tsɔɔ Diɛŋtsɛ? wolo ní akɛaafee nakai lɛ nɔ. Akɛni abaptisi mɔ lɛ momo hewɔ lɛ, bei pii lɛ ehe ehiaaa ni aya nɔ akɛ lɛ akase nii lɛ yɛ be kpalaŋŋ mli. Esa akɛ Asafoŋ Sɔɔmɔ Ajinafoi Akuu lɛ aje gbɛ akwɛ akɛ namɛi gbɛjianɔtoo nɛɛ he baaba sɛɛnamɔ kɛha amɛ.—Kwɛmɔ Sanebimɔ Hei ni je kpo yɛ November 1998 kɛ November 2000 Wɔ Maŋtsɛyeli Sɔɔmɔ lɛ mli lɛ.
6. Te fee tɛŋŋ ni nyɛmi yoo ko saa ená hewalɛ ekoŋŋ yɛ mumɔŋ lɛ?
6 Anna ni atsĩ etã kɛtsɔ hiɛ lɛ kɛ miishɛɛ kpɛlɛ yelikɛbuamɔ ni onukpai lɛ kɛha lɛ bɔni afee ni nyɛmi yoo ko ni eda yɛ mumɔŋ lɛ kɛ lɛ afee Biblia mli nikasemɔ lɛ nɔ. Akɛ lɛ kase nii lɛ shii ejwɛ pɛ kɛkɛ ni esaa etsi ebɛŋkɛ Yehowa ekoŋŋ. Ebɔi asafoŋ kpeei yaa ni ewo shwelɛ ni eyɔɔ akɛ ejie Yehowa Nyɔŋmɔ yi yɛ faŋŋ mli lɛ mli hewalɛ ekoŋŋ. Nyɛmi yoo ni eda yɛ mumɔŋ lɛ ye ebua lɛ yɛ shiɛmɔ nitsumɔ lɛ mli hu kɛtsɔ Biblia mli nikasemɔi krokomɛi ni ekɛ lɛ yafeɔ lɛ nɔ kɛyashi beni Anna ná ekãa bɔ ni sa ni ekɛaashiɛ yɛ shĩa kɛ shĩa. Yelikɛbuamɔ ni mlihilɛ yɔɔ mli lɛ ji nɔ̃ tuuntu ni he hiaa lɛ koni eya ehiɛ ekoŋŋ!
7. Mɛɛ sɛɛnamɔi jɛɔ mumɔŋ hewalɛwoo ni akɛhaa mɛi krokomɛi lɛ mli kɛbaa?
7 Hewalɛwoo ni akɛhaa mɛi ni ehia amɛ lɛ kɛ jɔɔmɔi bahaa mɛi fɛɛ. Mɔ ni ayeɔ abuaa lɛ lɛ tsiɔ ebɛŋkɛɔ Yehowa ni ekɛ ehe woɔ nitsumɔi ni Yehowa asafo lɛ tsuɔ lɛ mli, ni enɛ haa enáa miishɛɛ babaoo. Onukpai lɛ amli filiɔ amɛ kɛ́ amɛna akɛ mɛi miiná mumɔŋ hiɛyaa ni tamɔ nɛkɛ. (Luka 15:5, 6) Kɛ asafoŋbii lɛ fɛɛ jie mɔ hesusumɔ ni suɔmɔ yɔɔ mli lɛ kpo amɛtsɔɔtsɔɔ amɛhe lɛ, enɛ haa ekomefeemɔ ni yɔɔ amɛteŋ lɛ mli waa. (Kol. 3:12-14) Kwɛ bɔ ni wɔyɔɔ yiŋtoi kpakpai ni wɔɔdamɔ nɔ wɔkase Yehowa, ni enɛ ji yelikɛbuamɔ ni abaanyɛ aná be fɛɛ be!—Efe. 5:1.