Ná Mɛni Biblia lɛ Tsɔɔ Diɛŋtsɛ? Wolo lɛ ni Wɔbaakase lɛ He Miishɛɛ
1 “Nyɔŋmɔ Toi ni Aaabo” Kpokpaa Wulu nɔ Kpeei lɛ mli nifeemɔ ko ni ha aná miishɛɛ waa ji Mɛni Biblia lɛ Tsɔɔ Diɛŋtsɛ? wolo lɛ kpo ni ajie lɛ. Etsɛŋ ni wɔkɛbaatsu nii waa yɛ wɔshiɛmɔ nitsumɔ lɛ mli, titri lɛ kɛ́ wɔmiifee shĩa Biblia mli nikasemɔi. Enɛ hewɔ lɛ, ehe miihia ni wɔle wolo hee nɛɛ mli saji lɛ jogbaŋŋ. Akɛni wɔbaakase wolo nɛɛ yɛ Asafo Woloŋ Nikasemɔ lɛ shishi kɛjɛ April 17, 2006 otsi lɛ hewɔ lɛ, wɔbaale emli saji lɛ jogbaŋŋ.
2 Asafo Woloŋ Nikasemɔ nɔkwɛlɔ lɛ baagbala jwɛŋmɔ kɛya sanebimɔi ni jeɔ kpo yɛ yitso fɛɛ yitso shishijee lɛ nɔ. Yɛ no sɛɛ lɛ, akɛ sanebimɔi ni yɔɔ baafa fɛɛ baafa naagbee gbɛ lɛ baatsu nii koni akɛkwɛ nikasemɔ lɛ nɔ. Abaakane ŋmalɛi ni kɔɔ saji otii titrii lɛ ahe lɛ ni abaasusu he, ni akrabatsa ni yitso ji “Nɔ ni Biblia lɛ Tsɔɔ” ni yɔɔ yitso fɛɛ yitso naagbee lɛ baaye abua ni akɛtĩ nikasemɔ lɛ mli, ejaakɛ Ŋmalɛ naa hetooi kɛha sanebimɔi ni yɔɔ yitso lɛ shishijee lɛ yɛ akrabatsa lɛ mli. Akɛni wolo nɛɛ wieɔ saneyitsei lɛ ahe yɛ gbɛ ni yɔɔ faŋŋ, ní yɔɔ mlɛo, ní yɔɔ miishɛɛ hu nɔ hewɔ lɛ, obaaná saji ahetoo ni oooha lɛ he miishɛɛ waa.
3 Saji krokomɛi ni fata he, ní yɔɔ wolo nɛɛ mli lɛ wieɔ saneyitsei srɔtoi ahe fitsofitso. Wɔbaanyɛ wɔkɛ saji nɛɛ atsu nii kɛ́ ehe miihia ni Biblia mli nikaselɔi ale saneyitso ko he saji babaoo lɛ. Bei komɛi lɛ, abaakase saji krokomɛi ni fata he lɛ fãi komɛi yɛ Asafo Woloŋ Nikasemɔ lɛ shishi. Mɔ ni kaneɔ wolo lɛ mli yɛ woloŋ nikasemɔ lɛ shishi lɛ baakane saji krokomɛi ni fata he ní wieɔ saneyitso ko he lɛ fɛɛ, ni abaanyɛ akane saji ni sɛɛ kɛlɛ lɛ fiofio. Nikasemɔ he sanebimɔi bɛ saji krokomɛi ni fata he lɛ amli. Shi nɔkwɛlɔ lɛ baanyɛ ebibii saji ni baama saji otii lɛ anɔ mi, koni mɛi ni eba lɛ aha hetoo.
4 Biblia lɛ Tsɔɔ wolo lɛ mli nikasemɔ baaya nɔ oyayaayai yɛ Asafo Woloŋ Nikasemɔ lɛ shishi. Shi kɛ́ wɔkɛ mɛi krokomɛi miikase wolo nɛɛ lɛ, titri lɛ mɛi ni bɛ Biblia lɛ he nilee tsɔ̃ loo amɛbɛ eko kwraa lɛ, esaaa akɛ wɔkɛ amɛ kaseɔ wolo nɛɛ yɛ nakai gbɛ nɔ nɔŋŋ. (Bɔf. 26:28, 29) Kɛ wɔkɛ mɛi miifee shĩa Biblia mli nikasemɔi lɛ, esa akɛ wɔkɛ amɛ asusu ŋmalɛi lɛ ahe jogbaŋŋ kɛmɔ shi, ni wɔgbála mfonirii lɛ kɛ nibii krokomɛi amli. No hewɔ lɛ, okɛfee oti ni ma ohiɛ akɛ obaaya nikasemɔ lɛ daa otsi ní okɛ ohe awo Mɛni Biblia lɛ Tsɔɔ Diɛŋtsɛ? wolo lɛ ni wɔbaakase lɛ mli jogbaŋŋ kɛmɔ shi.