Kasemɔ Kristo yɛ Oshiɛmɔ Nitsumɔ lɛ Mli
1 Yesu fee nɔkwɛmɔnɔ efɔ̃ shi eha wɔ ni wɔnyiɛ sɛɛ yɛ wɔshiɛmɔ nitsumɔ lɛ mli. Enifeemɔ yɛ shihilɛ srɔtoi amli kɛ gbɛ̀i srɔtoi anɔ tsɔɔ akɛ eyɛ suɔmɔ ni mli kwɔ waa kɛha Nyɔŋmɔ kɛ gbɔmɛi. Etsɔɔ mɛi ni baa amɛhe shi lɛ anɔkwale lɛ, ni eye ebua mɛi ni ehao ni amɛfee gbedee lɛ.—Mat. 9:35.
2 Yesu Shihilɛ kɛ Enitsɔɔmɔi: Yesu haaa maŋkwramɔŋ saji loo nitsumɔi ni akɛɛ atsuɔ kɛyeɔ buaa adesai koni amɛshihilɛ ahi lɛ ahé ejwɛŋmɔ. Ni asaŋ ehaaa nibii krokomɛi ni akɛ yiŋtoo kpakpa tsuɔ he nii lɛ ahé ejwɛŋmɔ loo ní no aha ekɛ nitsumɔ titri ni akɛwo edɛŋ lɛ aye gbɛhe ni ji enyɔ. (Luka 8:1) Ekɛ ejwɛŋmɔ ma Nyɔŋmɔ Maŋtsɛyeli lɛ he sanekpakpa lɛ shiɛmɔ nɔ akɛ no pɛ ji adesai anaagbai lɛ anaa tsabaa. Yesu nitsumɔ lɛ he hiaa waa, shi no mli lɛ be kukuoo pɛ eyɔɔ ni ekɛaatsu he nii. Beni mɛi ni yɔɔ Kapernaum lɛ sumɔɔɔ ni Yesu shiɔ amɛ lɛ, ekɛɛ ekaselɔi lɛ akɛ: “Nyɛhaa wɔyaa maji ní jwere wɔhewɔhewɔ nɛɛ amli, koni mayashiɛ yɛ jɛi hu; ejaakɛ no hewɔ miba.”—Mar. 1:38.
3 Beni Yesu tsɔse ekaselɔi lɛ sɛɛ lɛ, etsu amɛ ni ekɛ gbɛtsɔɔmɔi pɔtɛɛ nɛɛ ha amɛ akɛ: “Nyɛshiɛa nyɛkɛa akɛ: Ŋwɛi maŋtsɛyeli lɛ eshɛ shi etã.” (Mat. 10:7) Etsɔɔ esɛɛnyiɛlɔi lɛ akɛ esa akɛ amɛkɛ Maŋtsɛyeli nibii aye klɛŋklɛŋ gbɛhe yɛ amɛshihilɛi amli. (Mat. 6:33) Yesu naagbee wiemɔi ni ekɛ ekaselɔi lɛ wie dani ekwɔ kɛtee ŋwɛi lɛ tsɔɔ nɔ ni esa akɛ amɛfee lɛ mli faŋŋ. Ekɛɛ akɛ: “Nyɛyaa ni nyɛyafea jeŋmaji fɛɛ mikaselɔi.”—Mat. 28:19.
4 Nɔ Hewɔ ni Maŋtsɛyeli lɛ He Hiaa: Nɔ̃ titri ni Yesu kɛ mɛi gba he sane ji Nyɔŋmɔ Maŋtsɛyeli lɛ, ni efã ekaselɔi lɛ ni amɛ hu amɛfee nakai. Mɔdɛŋ ni adesai bɔɔ koni amɛkɛtsu adesai anaagbai ahe nii lɛ yeŋ omanye. (Yer. 10:23) Nyɔŋmɔ Maŋtsɛyeli lɛ pɛ baatse Nyɔŋmɔ gbɛi lɛ he ni ekɛ naanɔ hejɔlɛ abaha adesai. (Mat. 6:9, 10) Kɛ atsɔɔ mɛi ni “dɔmɔɔ ŋtsɔi ní amɛyeɔ ŋkɔmɔ yɛ nihiinii fɛɛ ni afeɔ “ lɛ Maŋtsɛyeli lɛ he anɔkwalei lɛ, amɛnáa miishɛɛ ni amɛyeɔ omanye yɛ amɛshihilɛ mli bianɛ, ni amɛnáa hiɛnɔkamɔ ni hosooo akɛ shihilɛ kpakpa yɛ kɛha amɛ wɔsɛɛ.—Ezek. 9:4.
5 Yesu kã he eeetsu gbɛfaŋnɔ ni he hiaa waa yɛ Nyɔŋmɔ Maŋtsɛyeli sanekpakpa lɛ ni wɔshiɛɔ lɛ mli, ni eha wɔ nɔmimaa akɛ eyɛ wɔ sɛɛ. (Mat. 28:20) Nɛgbɛ onyɛ okase okadi ni Yesu to efɔ̃ shi eha wɔ lɛ kɛshɛ yɛ oshiɛmɔ nitsumɔ lɛ mli? (1 Pet. 2:21) Eba akɛ wɔɔfee bɔ fɛɛ bɔ ni wɔɔnyɛ koni wɔnyiɛ okadi ni Yesu to efɔ̃ shi eha wɔ yɛ shiɛmɔ nitsumɔ lɛ mli lɛ sɛɛ pɛpɛɛpɛ yɛ naagbee gbii ni he hiaa nɛɛ amli!