“Te Obaaha Hetoo Oha Tɛŋŋ?”
1. Mɛɛ naagbai mɛi babaoo kɛkpeɔ?
1 Ani oji mɔ ko ni sumɔɔ Nyɔŋmɔ Wiemɔ lɛ, shi ewa kɛha bo akɛ oookai Biblia lɛ mli saji komɛi fitsofitso loo hei ni atsĩ wiemɔi pɔtɛɛi komɛi atã yɛ Ŋmalɛi lɛ amli? Ani obaasumɔ akɛ obii lɛ anu Biblia mli shishijee anɔkwalei kɛ tsɔɔmɔi lɛ ashishi jogbaŋŋ? Sane ni ji “How Would You Answer?” (Te Obaaha Hetoo Oha Tɛŋŋ?) ni jeɔ kpo daa nyɔŋ nɔ yɛ Awake! lɛ baafa 31 baanyɛ aye abua gbekɛbii kɛ onukpai fɛɛ koni amɛnu Nyɔŋmɔ Wiemɔ lɛ shishi jogbaŋŋ.—Bɔf. 17:11.
2. Mɛɛ gbɛ abaanyɛ atsɔ akɛ sane ni ji “Te Obaaha Hetoo Oha Tɛŋŋ?” lɛ fãi srɔtoi lɛ atsu nii?
2 Mɛɛ gbɛ nɔ oootsɔ okɛ sane nɛɛ atsu nii jogbaŋŋ? January 2006 Awake! lɛ kɛ ŋaawoi ni nyiɛ sɛɛ nɛɛ ha: “Hemɔ be fioo ni okɛkwɛ baafa 31 lɛ . . . Gbekɛbii baaná saji komɛi ni yɔɔ baafa nɛɛ he miishɛɛ; saji nɛɛ ekomɛi hu baaka Biblia mli nikaselɔi ni etee hiɛ waa lɛ anilee akwɛ. Fã ni ji ‘When in History?’ (Mɛɛ Be Enɛ Ba yɛ Yinɔsane Mli) lɛ baaye abua bo koni ona be ni mɛi ni atsĩ amɛtã yɛ Biblia lɛ mli lɛ hi shi kɛ be mli saji ni sa kadimɔ lɛ tee nɔ. Eyɛ mli akɛ abaana hetooi kɛha fã ni ji ‘From This Issue’ (Enɛ Mli Saji) lɛ yɛ wolo tɛtrɛɛ lɛ mli fɛɛ moŋ, shi akɛ hetooi kɛha sanebimɔi lɛ ateŋ babaoo ewo wolo lɛ baafa pɔtɛɛ ko, ni ama niŋmai lɛ hiɛ shi. Mɛni hewɔ otaooo nibii amli dani okwɛ hetoo nɛɛ ni okɛ mɛi krokomɛi agba nɔ ni okase lɛ he sane? Obaanyɛ okɛ sane hee nɛɛ ni ji ‘Te Obaaha Hetoo Oha Tɛŋŋ?’ lɛ atsu nii kɛfee weku nikasemɔ loo okɛ mɛi afee ekome ni nyɛkɛsusu Biblia mli saji ahe.”
3. Wekui komɛi ená sane nɛɛ he sɛɛ yɛ mɛɛ gbɛ nɔ, ni te efãi ni oyɔɔ he miishɛɛ waa lɛ?
3 Yɛ anɔkwale mli lɛ wekui babaoo náa he miishɛɛ akɛ amɛkɛ sane nɛɛ aaatsu nii kɛfee weku nikasemɔ. Nyɛ ko ŋma akɛ: “Mi kɛ miwu kpa shi wɔna akɛ ebaahi jogbaŋŋ akɛ wɔkɛ fã ni ji ‘Children’s Picture Search’ (Mfonirii ni Ahaa Gbekɛbii Taoɔ) lɛ aaafata wɔweku nikasemɔ lɛ he koni wɔbiyoo ni ená afii etɛ lɛ aná nikasemɔ lɛ he miishɛɛ ni ewo lɛ hewalɛ. Kɛ́ wɔna akɛ wɔbiyoo lɛ kɛ mlifilimɔ ekɔ Awake! lɛ ni eegbele baafa fɛɛ baafa kɛyashi eeena mfoniri ni etaoɔ lɛ, eyɛ miishɛɛ pam.” Tsɛ ko ni yɔɔ Brazil lɛ kɛɛ akɛ: “Mi kɛ mibinuu ni eye afii kpawo lɛ sumɔɔ sane nɛɛ ni yɔɔ Awake! lɛ mli lɛ waa. Eyeɔ ebuaa Moises koni ebo sane toi, etao Ŋmalɛ kukuji ni ashi lɛ, enu mfonirii lɛ ashishi, ní enu Biblia mli bei akɔntaabuu lɛ ashishi.” Ashley ní eye afii kpaanyɔ lɛ ŋma akɛ: “Miida nyɛ shi akɛ nyɛkɛ sane ni ji ‘Te Obaaha Hetoo Oha Tɛŋŋ?’ lɛ ewo Awake! lɛ mli. Ehaa mikaseɔ nii babaoo kɛjɛɔ Biblia lɛ mli.”
4. Mɛɛ gbɛ nɔ wekui baanyɛ atsɔ amɛkɛ sane nɛɛ afata amɛweku Biblia nikasemɔ lɛ he?
4 Mɛni hewɔ okɛ sane ni ji “Te Obaaha Hetoo Oha Tɛŋŋ?” lɛ fataaa oweku nikasemɔ lɛ he yɛ be kɛ beaŋ? Obaanyɛ okɛ Index lɛ loo Watchtower Library ni yɔɔ CD-ROM nɔ lɛ atao sanebimɔi ni mli wawai lɛ ahetooi. Enɛ feemɔ baaha otsɔɔ obii lɛ bɔ ni afeɔ niiamlitaomɔ ahaa. Kɛ́ oyɛ bii ni edara lɛ, mɛni hewɔ okɛwooo amɛdɛŋ koni amɛtsɔ hiɛ amɛtao hetooi kɛha fãi ni ji “Who Am I?” (Namɔ Ji Mi) loo “Mɛɛ Be Enɛ Ba yɛ Yinɔsane Mli” lɛ dani weku nikasemɔ be lɛ ashɛ? No sɛɛ lɛ amɛbaanyɛ amɛgba hetooi ni amɛná lɛ he sane yɛ weku nikasemɔ lɛ mli. Baafa nɛɛ ni fɔlɔi kɛaatsu nii jogbaŋŋ lɛ ji gbɛ kome ni amɛbaanyɛ amɛtsɔ nɔ amɛtɛo Nyɔŋmɔ Wiemɔ lɛ amɛwo amɛbii lɛ amli, ni amɛye amɛbua amɛ koni amɛjɛ amɛgbekɛbiiashi amɛle “ŋmalɛi krɔŋkrɔŋi lɛ.”—2 Tim. 3:15; 5 Mose 6:7.