**Ná Hesai Pii yɛ Shiɛmɔ Nitsumɔ lɛ Mli—Okɛ Biblia lɛ Tsɔɔ Wolo lɛ Afee bɔ ni Afeɔ Biblia mli Nikasemɔ Ahãa lɛ he Nɔkwɛmɔnɔ**

Nɔ Hewɔ ni Ehe Hiaa: Kɛ́ wɔkɛɛ mɛi akɛ wɔkɛ mɛi kaseɔ Biblia lɛ yɛ amɛshiai amli ni awooo he nyɔmɔ ko lɛ, ekolɛ mɛi babaoo nuŋ shishi. Ekolɛ amɛbaasusu akɛ esa akɛ amɛkɛ amɛhe adɔmɔ nikasemɔ kuu ko loo amɛkɛ amɛhe awo nikasemɔ ni atsɔɔ woloŋmaa nɔ akaseɔ lɛ mli. Yɛ nɔ najiaŋ ni obaakɛɛ amɛ akɛ obaasumɔ ni okɛ amɛ akase nii lɛ, mɛni hewɔ ofeee nikasemɔ lɛ he nɔkwɛmɔnɔ moŋ? Obaanyɛ okɛ minitii fioo ko atsɔɔ mɔ ko—yɛ eshinaa naa po—bɔ ni ebaanyɛ ekase nibii babaoo kɛjɛ Biblia lɛ mli yɛ gbɛ ni waa kwraa nɔ.

Bɔ ni Obaafee lɛ Ohã:

Be ni ojie ohe shi sɛɛ lɛ, bi shiatsɛ lɛ nɔ ni esusuɔ yɛ wɔsɛɛ shihilɛ he.
Hã ele akɛ mɛi babaoo hiɛ susumɔ ni tamɔ nakai, ni okɛ saneyitsei ni ato naa ni yɔɔ Biblia lɛ Tsɔɔ wolo lɛ mli lɛ atsɔɔ lɛ. Hã ele akɛ nikasemɔi ni shishinumɔ waaa tsɔ yɛ wolo ni ohiɛ lɛ mli, ni ewieɔ nɔ ni Biblia lɛ tsɔɔ yɛ wɔsɛɛ shihilɛ kɛ saji krokomɛi ahe lɛ he, ni obi lɛ saneyitsei lɛ ateŋ nɔ ni enyãa he waa.
Hã lɛ wolo lɛ eko, ni ohã egbele kɛya saneyitso ni ehala lɛ. Hã ele akɛ ebaaná sanebimɔi ni yɔɔ saneyitso lɛ shishi lɛ ahetoi yɛ kukuji ni nyiɛ sɛɛ lɛ amli.
Hã shĩatsɛ lɛ akane klɛŋklɛŋ kuku lɛ mli kɛ́ nakai feemɔ gbaŋ enaa. No sɛɛ lɛ, bi sane lɛ, ni okɛ lɛ afee ekome kɛtao hetoo lɛ. Nyɛkanea Ŋmalɛi ni atsɛ yi sɛɛ ni maa hetoo lɛ nɔ mi lɛ, ni nyɛsusu he. Okɛ bɔ ni ofɔlɔ hetoi lɛ ashishi yɛ owolo lɛ mli lɛ atsɔɔ lɛ.
Nyɛsusua kuku ni tsa nɔ lɛ he, shi agbɛnɛ lɛ hã shiatsɛ lɛ abɔ mɔdɛŋ ni ekɛ lɛ diɛŋtsɛ ewiemɔi ahã hetoo.
Jiemɔ eyi, ni okɛ lɛ ato gbɛjianɔ kɛhã be ni obaaku osɛɛ okɛ lɛ ayagbe nikasemɔ lɛ naa.
Kɛ́ ebaahi lɛ, gbalamɔ ejwɛŋmɔ kɛya vidio ni ji, Mɛni Yaa Nɔ yɛ Biblia Nikasemɔ Feemɔ Mli? ni yɔɔ jw.org/gaa lɛ nɔ lɛ nɔ.

Kaa Enɛ Okwɛ yɛ Nyɔɔŋ nɛɛ Mli:

Sɔlemɔ koni Yehowa ajɔɔ mɔdɛŋ ni obɔɔ ní onyɛ oje Biblia mli nikasemɔ hee shishi lɛ nɔ.—Fil. 2:13.
Bɔɔ mɔdɛŋ ni kɛ́ hoo kwraa lɛ okɛ Biblia lɛ Tsɔɔ wolo lɛ atsu nii kɛfee Biblia mli nikasemɔ he nɔkwɛmɔnɔ, aloo ojie vidio ni ji, Mɛni Yaa Nɔ yɛ Biblia Nikasemɔ Feemɔ Mli? lɛ shi kome be ni onyiɛ shiɛmɔ nɔ.