Ha Efee Oti ni Ma Ohiɛ akɛ Obaafee Biblia Mli Nikasemɔ
1 “Nyɛholea nyɛhiŋmɛii anɔ ni nyɛkwɛa ŋmɔji lɛ bɔ ni amɛgba futaa momo ni sa kpamɔ.” (Yoh. 4:35) Nakai wiemɔi ni Yesu Kristo wie lɛ tamɔ shihilɛ ni Kristofoi kɛkpeɔ ŋmɛnɛ lɛ.
2 Nine miishɛ mɛi ni hiɛ tsui ni ja ni miisumɔ akɛ atsɔɔ amɛ Yehowa gbɛ̀i lɛ anɔ lolo. Kaselɔi heei ni abaptisiɔ daa afi lɛ maa enɛ nɔ mi. Kɛ́ oyɛ he miishɛɛ lɛɛlɛŋ akɛ obaafee Biblia mli nikasemɔ lɛ, mɛni obaanyɛ ofee?
3 Okɛ Oti ko Ama Ohiɛ: Klɛŋklɛŋ lɛ, ha efee oti ni ma ohiɛ akɛ obaaje Biblia mli nikasemɔ shishi ni otsa nɔ. Ha oti ni okɛma ohiɛ lɛ ahi ojwɛŋmɔ mli beni okɛ ohe woɔ shiɛmɔ nitsumɔ lɛ mli lɛ. Akɛni nitsumɔ ni akɛwo wɔdɛŋ ákɛ Kristofoi lɛ biɔ ni wɔtsɔɔ nii ní wɔshiɛ hu hewɔ lɛ, esa akɛ wɔ fɛɛ wɔbɔ mɔdɛŋ akɛ wɔbaafee Biblia mli nikasemɔi babaoo.—Mat. 24:14; 28:19, 20.
4 Nibii Krokomɛi ní Esa akɛ Oha Ehi Ojwɛŋmɔ Mli: Esa akɛ Maŋtsɛyeli shiɛlɔi ajɛ amɛtsuiaŋ amɛsɔle. Bei komɛi lɛ, wɔkɛ mɛi komɛi ní esɔle koni abatsɔɔ amɛ Biblia lɛ mli lɛ kpeɔ. Mɛɛ jɔɔmɔ po eji nɛkɛ ákɛ Yehowa kɛ wɔ aaatsu nii koni wɔtao mɛi ni tamɔ nɛkɛ lɛ ní wɔtsɔɔ amɛ nii!—Hag. 2:7; Bɔf. 10:1, 2.
5 Nyɛmi yoo ko sɔle koni ená Biblia mli nikaselɔ, kɛkɛ ni ekɛ Ani Obaasumɔ ni Ole Biblia lɛ Mli Saji Babaoo? dɛhiɛmɔ wolo lɛ eko shwie ekpɔlɔ nɔ yɛ heni etsuɔ nii yɛ lɛ. Beni yoo ko kɔ́ dɛhiɛmɔ wolo lɛ eko ni ekane, ni ebɔi nɔ niŋmalamɔ koni ekɛbi ni aha lɛ wolo ni yɔɔ dɛhiɛmɔ wolo lɛ sɛɛ lɛ eko, ní akɛ lɛ abakase nii lɛ, nyɛmi yoo lɛ kɛ lɛ gba sane, ni enɛ ha enyɛ ekɛ lɛ je Biblia mli nikasemɔ shishi.
6 Shiɛlɔi krokomɛi ni he esa kɛ Biblia mli nikasemɔ shishijee kɛ efeemɔ lɛ baanyɛ aye abua bo koni oshɛ oti ni okɛma ohiɛ akɛ obaafee Biblia mli nikasemɔ lɛ he. Sɔlemɔ ni onine ashɛ eko nɔ, ni obɔ mɔdɛŋ akɛ okɛ yelikɛbuamɔ fɛɛ ni baaha onyɛ oshɛ oti nɛɛ he lɛ aaatsu nii. Ekolɛ etsɛŋ ni obaaná miishɛɛ ni jɛɔ Biblia kasemɔ feemɔ mli kɛbaa lɛ eko.