‘Ye Sanekpakpa lɛ He Odase Kɛmɔ Shi’
1. Mɛɛ sanekpakpa esa akɛ wɔha ale?
1 Yɛ jeŋ ni sanekpakpa he ehia nɛɛ mli lɛ, wɔná hegbɛ akɛ ‘wɔɔye Nyɔŋmɔ duromɔ sanekpakpa lɛ he odase kɛmɔ shi.’ (Bɔf. 20:24) Nɔ ni fata enɛ he ji ní wɔɔha mɛi ale akɛ etsɛŋ ni akɛ Yehowa jalɛ jeŋ hee lɛ baaye “naagbee gbii lɛ” najiaŋ, ni ‘tsutsu nii lɛ baaho aya.’ (2 Tim. 3:1-5; Kpoj. 21:4) Hela ehiŋ shi dɔŋŋ yɛ nakai beaŋ. (Yes. 33:24) Mɛi ni egboi lɛ baate shi kɛjɛ kaimɔ bui amli, ni amɛkɛ amɛwekumɛi kɛ amɛnanemɛi ni ji amɛsuɔlɔi lɛ baafee ekome ekoŋŋ. (Yoh. 5:28, 29) Abaafee shikpɔŋ muu lɛ fɛɛ paradeiso fɛfɛo. (Yes. 65:21-23) Enɛɛmɛi ji sanekpakpai ni wɔshiɛɔ lɛ ateŋ fioo komɛi kɛkɛ!
2. Mɛni hewɔ Kaimɔ be lɛ haa wɔnáa hegbɛ ni nɔ bɛ ni wɔbaanyɛ wɔkɛye sanekpakpa lɛ he odase lɛ?
2 March, April, kɛ May nyɔji lɛ baaha wɔná hegbɛ ni nɔ bɛ kɛjaje sanekpakpa ni tamɔ nɛkɛ. Akɛni kɔɔyɔɔŋ tsakemɔ hi yɛ nɛkɛ nyɔji nɛɛ amli yɛ je lɛŋ hei babaoo hewɔ lɛ, abaanyɛ akɛ be babaoo atsu shiɛmɔ nitsumɔ lɛ. Kɛfata he lɛ, abaaye Kaimɔ lɛ, ni ji nifeemɔ ni he hiaa fe fɛɛ yɛ afi lɛ mli lɛ Hɔɔ, March 22 yɛ jeŋ fɛɛ. Amrɔ nɛɛ ji be ni esa akɛ wɔbɔi wɔhe saamɔ koni wɔnyɛ wɔkɛ be babaoo atsu shiɛmɔ nitsumɔ lɛ.
3. Ákɛ wekui lɛ, mɛni baaye abua wɔ ni wɔya hiɛ yɛ shiɛmɔ nitsumɔ lɛ mli?
3 Gbɛgbalɔi Awamɔ Nitsumɔ Lɛ: Ani obaanyɛ oto gbɛjianɔ ni okɛ ohe awo gbɛgbalɔi awamɔ nitsumɔ lɛ mli nyɔɔŋ kome, enyɔ, loo nyɔji etɛ lɛ fɛɛ? Mɛni hewɔ nyɛŋɔɔɔ be fioo kɛsusuuu sane nɛɛ he yɛ weku nikasemɔ ni nyɛbaafee kɛnyiɛ sɛɛ lɛ mli? Kɛ́ weku lɛ mli bii lɛ fɛɛ fee ekome lɛ, amɛteŋ mɔ kome loo mɛi pii baanyɛ amɛkɛ amɛhe awo gbɛgbalɔi awamɔ nitsumɔ lɛ mli. (Abɛi 15:22) Nyɛsɔlea yɛ sane nɛɛ he, ní nyɛkwɛa bɔ ni Yehowa baajɔɔ nyɛmɔdɛŋbɔi lɛ anɔ. (Abɛi 16:3) Kɛ́ weku lɛ mli bii lɛ ateŋ mɔ ko kwraa nyɛɛɛ ekɛ ehe awo gbɛgbalɔi awamɔ nitsumɔ lɛ mli po lɛ, amɛbaanyɛ amɛkɛ otii pɔtɛɛ komɛi ni baaha amɛya amɛhiɛ yɛ shiɛmɔ nitsumɔ lɛ mli lɛ amamɔ amɛhiɛ be mli ni amɛkɛ mɛi ni enyɛ amɛkɛ amɛhe ewo gbɛgbamɔ nitsumɔ lɛ mli lɛ tsuɔ nii lɛ.
4. Kɛ́ wɔji mɛi ni kɛ amɛbe fɛɛ tsuɔ nii lɛ, mɛɛ gbɛ nɔ wɔbaanyɛ wɔto gbɛjianɔ ní wɔkɛ wɔhe awo gbɛgbalɔi awamɔ nitsumɔ lɛ mli?
4 Kɛ́ oji mɔ ni kɛ ebe fɛɛ tsuɔ nii lɛ, gbɛjianɔ kpakpa ni oooto lɛ baanyɛ aye abua bo ni okɛ ohe awo gbɛgbalɔi awamɔ nitsumɔ lɛ mli. Ekolɛ obaanyɛ okɛ shwane hejɔɔmɔ be lɛ eko ashiɛ. Aloo obaanyɛ obi ni aha bo shikpɔŋkuku ni bɛŋkɛ oshia loo heni otsuɔ nii yɛ lɛ ní okɛ ohe awo shiɛmɔ nitsumɔ lɛ mli ŋmɛlɛtswaa kome loo nɔ ni fe nakai dani oya nitsumɔ loo kɛ́ okpa nitsumɔ. Obaanyɛ oná be ofata be ni oto lɛ he kɛtsɔ gbɛjianɔ ni oooto ni otsu nifeemɔi ni he ehiaaa tsɔ lɛ ahe nii yɛ nyɔɔŋ kroko mli loo ni okɛ ohe aaawo shiɛmɔ nitsumɔ lɛ mli gbi muu fɛɛ yɛ otsi lɛ naagbee lɛ mli lɛ nɔ. Mɛi komɛi ebi gbi kome loo gbii enyɔ kɛjɛ nitsumɔ mli bɔni afee ni amɛnyɛ amɛkɛ amɛhe awo shiɛmɔ nitsumɔ lɛ mli.
5. Mɛɛ gbɛ nɔ obaanyɛ oye obua mɛi ni hiɛ efã loo mɛi ni bɛ gbɔmɔtsoŋ hewalɛ lɛ koni amɛnyɛ amɛkɛ amɛhe awo gbɛgbalɔi awamɔ nitsumɔ lɛ mli?
5 Kɛ́ oji mɔ ni hiɛ efã, loo mɔ ni bɛ gbɔmɔtsoŋ hewalɛ, loo mɔ ni hewalɛ faa lɛ, obaanyɛ okɛ ohe awo gbɛgbalɔi awamɔ nitsumɔ lɛ mli kɛtsɔ be fioo ni okɛaatsu nii yɛ shiɛmɔ nitsumɔ lɛ mli daa gbi lɛ nɔ. Bi Yehowa ni eha bo “hewalɛ ní fá kɛteke nɔ.” (2 Kor. 4:7) Nyɛmi yoo ko ni eye afii 106 lɛ nyɛ ekɛ ehe wo gbɛgbalɔi awamɔ nitsumɔ lɛ mli! Ewekumɛi ni ji Kristofoi lɛ kɛ mɛi krokomɛi ni yɔɔ asafo lɛ mli lɛ ye amɛbua lɛ ni enyɛ eshiɛ yɛ shĩa kɛ shĩa, efee sɛɛkuu-kɛsaramɔi, efee Biblia mli nikasemɔi, ni ekɛ ehe wo shiɛmɔ nitsumɔ lɛ fãi krokomɛi amli. Eye ebua ni akɛ mɛi nyɔŋma je Biblia mli nikasemɔ shishi. Ewie akɛ: “Kɛ́ misusu hegbɛ krɛdɛɛ ni miná akɛ gbɛgbalɔi awalɔ lɛ he lɛ, ehaa minaa suɔmɔ kɛ hiɛsɔɔ mihaa Yehowa, e-Bi lɛ, kɛ Egbɛjianɔtoo ni suɔmɔ yɔɔ mli lɛ. Yɛ anɔkwale mli lɛ, miisumɔ makɛɛ akɛ, ‘Yehowa, miidao shi!’”
6. Te oblahii kɛ oblayei ni abaptisi amɛ ni miiya skul lolo lɛ aaafee tɛŋŋ amɛkɛ amɛhe awo gbɛgbalɔi awamɔ nitsumɔ lɛ mli lɛ?
6 Kɛ́ oji oblanyo loo oblayoo ni abaptisi lɛ ni yaa skul lɛ, bo hu obaanyɛ okɛ ohe awo gbɛgbalɔi awamɔ nitsumɔ lɛ mli. Taakɛ eji yɛ mɛi ni kɛ amɛbe fɛɛ tsuɔ nii lɛ agbɛfaŋ lɛ, otsii lɛ anaagbee titri ji be ni obaanyɛ oto gbɛjianɔ ni okɛ ohe awo shiɛmɔ nitsumɔ lɛ mli. Agbɛnɛ hu bei komɛi kɛ́ okpa skul lɛ, obaanyɛ okɛ ŋmɛlɛtswaa kome loo nɔ ni fe nakai aya shiɛmɔ. Ani skul hejɔɔmɔ be ko yɛ ní obaanyɛ okɛya shiɛmɔ? Kɛ́ oosumɔ ni okɛ ohe awo gbɛgbalɔi awamɔ nitsumɔ lɛ mli lɛ, okɛ ofɔlɔi agba he sane.
7. Mɛni onukpai lɛ baanyɛ afee ni amɛha ekãa ni yɔɔ shiɛmɔ nitsumɔ lɛ mli lɛ aya hiɛ yɛ Kaimɔ be lɛ mli?
7 Nyɛwoa Mɛi Krokomɛi Hewalɛ: Asafoŋ onukpai lɛ baanyɛ amɛha ekãa ni asafoŋbii lɛ yɔɔ lɛ aya hiɛ kɛtsɔ amɛnɔkwɛmɔnɔ lɛ nɔ. (1 Pet. 5:2, 3) Amɛbaanyɛ amɛto be krokomɛi kɛha shiɛmɔyaa he gbɛjianɔ amɛha mɛi ni kɛ amɛhe baawo shiɛmɔ nitsumɔ lɛ mli leebi mra, kɛ́ akpa skul, loo kɛ́ akpa nitsumɔ lɛ. Esa akɛ sɔɔmɔ nitsumɔ nɔkwɛlɔ lɛ akwɛ koni shiɛlɔi ni he esa akwɛ kpee kɛha shiɛmɔyaa lɛ nɔ ni aná shikpɔŋkuku, woji tɛtrɛbii, kɛ woji wuji ni fá bɔ ni sa yɛ nyɔji krɛdɛɛ nɛɛ amli.
8. Mɛni wɔkaseɔ kɛjɛɔ asafo ko niiashikpamɔ mli?
8 Yɛ asafo ko mli lɛ, asafoŋ onukpai lɛ kɛ nyɔji abɔ tsɔ hiɛ amɛwo asafoŋbii lɛ hewalɛ ní amɛkɛ amɛhe awo gbɛgbalɔi awamɔ nitsumɔ lɛ mli. Otsi fɛɛ otsi lɛ, amɛhaa asafo lɛ leɔ mɛi abɔ ni aŋmɛ amɛ gbɛ ní amɛkɛ amɛhe awo gbɛgbalɔi awamɔ nitsumɔ lɛ mli. Enɛ ha mɛi ni miisumɔ ni amɛtsu babaoo yɛ shiɛmɔ nitsumɔ lɛ mli lɛ ná hekɛnɔfɔɔ akɛ amɛbaaná mɛi babaoo kɛtsu. Ato gbɛjianɔ kroko afata shiɛmɔ ni ayaa leebi mra kɛ gbɛkɛnaashi lɛ he. Nɔ ni jɛ mli ba ji akɛ, aaafee asafo lɛ mli bii fã kpotoo ni naa shɛɔ shiɛlɔi 53 kɛ amɛhe wo gbɛgbalɔi awamɔ nitsumɔ lɛ mli yɛ April!
9. Mɛni hewɔ Kaimɔ be lɛ ji be ni sa kɛha mɛi ni shɛɔ taomɔ nii ahe lɛ akɛ amɛaaje sanekpakpa lɛ jajemɔ shishi lɛ?
9 Ye Obua Mɛi Krokomɛi ni Amɛshiɛ: Kɛ́ mɛi heei kɛ oblahii kɛ oblayei batsɔmɔ shiɛlɔi lɛ, abaanyɛ aha amɛkɛ shiɛlɔi ni yɔɔ niiashikpamɔ atsu nii yɛ shiɛmɔ nitsumɔ lɛ mli. Hegbɛ ni tamɔ nɛkɛ baanyɛ aba yɛ Kaimɔ be lɛ mli akɛni asafo lɛ mli bii pii kɛ amɛhe baawo shiɛmɔ nitsumɔ lɛ mli waa lɛ hewɔ. Ani oyɛ Biblia kaselɔ ko ni miiya ehiɛ, ni eha eshihilɛ gbɛ kɛ Yehowa jalɛ shishitoo mlai lɛ ekpã gbee? Ani oyɛ bii ni baa amɛjeŋ jogbaŋŋ ni miiya amɛhiɛ shi amɛjeee shiɛlɔi? Kɛ́ mɛi ni tamɔ nɛkɛ lɛ ekɛɛ akɛ amɛmiisumɔ ni amɛbatsɔmɔ shiɛlɔi ni abaptisiko amɛ, ni ona akɛ amɛsa lɛ, no lɛ wó asafoŋ onukpai lɛ ateŋ mɔ kome toi nɔ. Onukpai asɛinɔtalɔ lɛ baato gbɛjianɔ ni eha onukpai enyɔ kɛ bo kɛ obi loo o-Biblia kaselɔ lɛ asusu sane lɛ he.
10. Mɛni onukpai lɛ baanyɛ afee kɛye abua mɛi ni ekpa shiɛmɔyaa lɛ?
10 Nyɔji nɛɛ hu baafee be ni sa kɛha mɛi ni ekpa shiɛmɔyaa lɛ akɛ amɛkɛ asafo lɛ aaabɔi shiɛmɔyaa ekoŋŋ. Esa akɛ Asafo Woloŋ Nikasemɔ nɔkwɛlɔi kɛ onukpai krokomɛi lɛ abɔ mɔdɛŋ waa ni amɛyasara mɛi ni tamɔ nɛkɛ, ni amɛkɛ miishɛɛ afɔ̃ amɛ nine ni amɛkɛ amɛ atsu nii yɛ shiɛmɔ nitsumɔ lɛ mli. Kɛ́ amɛkpa shiɛmɔyaa be kpalaŋŋ nɛ lɛ, esa akɛ onukpai enyɔ kɛ amɛ agba sane koni amɛkwɛ akɛ amɛshɛɔ taomɔ nii kɛha shiɛmɔyaa lɛ he lo.—km-GA 11/00 bf. 7.
11. Mɛni ji “Nyɔŋmɔ duromɔ” ni fe fɛɛ ni ejie lɛ kpo etsɔɔ adesai?
11 Saamɔ Ohe Kɛha Kaimɔ Lɛ: Kpɔ̃mɔnɔ lɛ ji “Nyɔŋmɔ duromɔ” ni fe fɛɛ ni ejie lɛ kpo etsɔɔ adesai. (Bɔf. 20:24) Mɛi akpekpei abɔ ni yɔɔ hiɛsɔɔ, ni yɔɔ je lɛŋ fɛɛ lɛ baabua amɛhe naa Hɔɔ, March 22 yɛ hulushinyɔɔ sɛɛ kɛye Kristo gbele lɛ Kaimɔ lɛ. Wɔmiisumɔ ni wɔye wɔbua mɛi fɛɛ ni hiɛ tsui ni ja lɛ, ni wɔfɔ̃ amɛ nine kɛya nifeemɔ ni he hiaa ni yeɔ Yehowa duromɔ ni ejie lɛ kpo eha adesai nɛɛ he odase lɛ shishi.
12. Namɛi esa akɛ wɔfɔ̃ amɛ nine kɛya Kaimɔ lɛ?
12 Ŋmalamɔ mɛi ni obaasumɔ ni ofɔ̃ amɛ nine lɛ agbɛi. Ekã shi faŋŋ akɛ mɛi ni obaaŋmala amɛgbɛi lɛ ekomɛi ji owekumɛi, okutsoŋbii, mɛi ni okɛtsuɔ nii kɛ mɛi ni okɛyaa skul, mɛi ni okɛkase Biblia lɛ dã kɛ mɛi ni okɛkaseɔ nii bianɛ, kɛ mɛi fɛɛ ni ofɔɔ amɛ saramɔ. Kɛ́ mɛi ni ofɔ̃ amɛ nine lɛ ateŋ mɛi komɛi yɛ sanebimɔi ni kɔɔ Kaimɔ lɛ he lɛ, ebaahi akɛ okɛ saji krokomɛi ni fata he ni kɔɔ Nuŋtsɔ lɛ Gbɛkɛnaashi Niyenii lɛ he ni yɔɔ Biblia lɛ Tsɔɔ wolo lɛ baafa 206-208 lɛ mli lɛ aatsu nii. Enɛ baanyɛ agbele gbɛ kɛha bo ni oje Biblia mli nikasemɔ feemɔ shishi, ejaakɛ ebaaha oná hegbɛ ni okɛ wolo ni wɔkɛtsuɔ nii kɛfeɔ Biblia mli nikasemɔ lɛ atsɔɔ.
13. Mɛɛ gbɛ nɔ Yehowa jɔɔ oti ni shiɛlɔi enyɔ komɛi kɛma amɛhiɛ akɛ amɛbaabɔ mɔdɛŋ ni amɛfɔ̃ mɛi anine kɛya Kaimɔ lɛ shishi nɔ yɛ?
13 Nyɛmi yoo ko ŋmala wekui 48 ni ebaafɔ̃ amɛ nine lɛ agbɛi eshwie shi. Kɛ́ efɔ̃ weku ko nine lɛ, efoɔ nakai weku lɛ gbɛi amli yɛ ewolo lɛ nɔ, kɛkɛ lɛ eŋma be ni ekɛfɔ̃ amɛ nine lɛ. Ená miishɛɛ waa akɛ mɛi 26 ni efɔ̃ amɛ nine lɛ ba Kaimɔ lɛ! Nyɛmi nuu ko ni yɔɔ shwapo lɛ fɔ̃ mɔ ko ni tsuɔ nii ehaa lɛ ni tsutsu ko lɛ eji osɔfo lɛ nine. Nuu lɛ tee, ni sɛɛ mli lɛ ekɛɛ akɛ, “Nibii ni mikase yɛ Biblia lɛ he yɛ ŋmɛlɛtswaa kome mli lɛ fa kwraa fe nibii ni mikase yɛ afii 30 ni mikɛhi Katolik Sɔlemɔ lɛ mli lɛ.” Kaimɔ lɛ sɛɛ etsɛɛɛ nɔŋŋ lɛ, ekpɛlɛ ní akɛ lɛ akase Biblia lɛ Tsɔɔ wolo lɛ.
14. Mɛɛ tafãa baaya nɔ yɛ jeŋ fɛɛ kɛjɛ March 1?
14 Tafãa: Kɛjɛ Hɔɔ, March 1 aahu kɛyashi March 22 lɛ, akɛ ninefɔ̃ɔ krɛdɛɛ ko kɛha Kaimɔ lɛ baaha yɛ jeŋ fɛɛ. Esa akɛ shiɛlɔi fɛɛ kɛ amɛhe awo tafãa ni he hiaa nɛɛ mli. Ehi ákɛ akɛ ninefɔ̃ɔ wolo lɛ baawo shiatsɛ lɛ dɛŋ tɛ̃ɛ fe ni aaashi eko yɛ shinaa naa. Shi kɛ́ nyɛshikpɔŋkuku lɛ da waa lɛ, no lɛ onukpai lɛ baanyɛ akpɛ amɛyiŋ ákɛ akɛ hiɛshikamɔ ashi ninefɔ̃ɔ woji lɛ yɛ mɛi ni bɛ shĩa lɛ ashinaai anaa. Agbɛnɛ hu wɔkɛ woji tɛtrɛbii heei lɛ baaha yɛ otsii lɛ anaagbee.
15. Mɛɛ gbɛ nɔ wɔbaatsɔ wɔkɛ Kaimɔ lɛ he ninefɔ̃ɔ wolo lɛ aha?
15 Akɛni be ni wɔkɛbaaja ninefɔ̃ɔ woji lɛ faaa hewɔ lɛ, ehi akɛ wɔbaaha wɔshiɛmɔ wiemɔ lɛ afee kuku. Jiemɔ naanyobɔɔ su kɛ miishɛɛ kpo. Obaanyɛ okɛɛ nɔ ko tamɔ nɛkɛ: “Wɔmiisumɔ ni wɔfɔ̃ bo, oweku lɛ mli bii, kɛ onanemɛi lɛ anine kɛya nifeemɔ ko ni he hiaa ni abaafee yɛ March 22 lɛ shishi. Wolo ni wɔkɛfɔ̃ɔ bo nine nɛ. Aŋmala nibii ni kɔɔ nifeemɔ lɛ he lɛ yɛ wolo lɛ nɔ.” Ekolɛ shiatsɛ lɛ baabi saji. Aloo ekolɛ ebaahe ninefɔ̃ɔ wolo lɛ ni ebaakɛɛ po akɛ ebaaba. Ŋmalamɔ mɛi ni baajie miishɛɛ kpo lɛ ahe saji, ní oto gbɛjianɔ ni oyasara amɛ.
16. Mɛɛ niiashikpamɔ tsɔɔ sɛɛnamɔ ni yɔɔ ta ni afãa kɛfɔ̃ɔ mɛi ni yɔɔ shikpɔŋkuku lɛ mli lɛ nine kɛha Kaimɔ lɛ he?
16 Nyɛsɛɛ afi lɛ, asraafonyo ko na Kaimɔ lɛ he ninefɔ̃ɔ wolo lɛ eko yɛ eshinaa naa. Eto eyiŋ akɛ ebaaya, shi esa akɛ ebi gbɛ kɛjɛ asraafonyo nukpa ni eyɔɔ eshishi lɛ dɛŋ. Beni ekɛ ninefɔ̃ɔ wolo lɛ tsɔɔ asraafonyo nukpa lɛ, asraafonyo nukpa lɛ fee diŋŋ, kɛkɛ ni ekɛɛ akɛ efɔlɔi lɛ Odasefoi ji amɛ, ni kulɛ ekɛ amɛ yaa kpeei. Jeee ákɛ asraafonyo nukpa lɛ ŋmɛ lɛ gbɛ kɛkɛ, shi moŋ ekɛ lɛ tee Kaimɔ lɛ!
17. Mɛni kɛ́ wɔfee lɛ ebaatsɔɔ akɛ wɔheko Nyɔŋmɔ duromɔ lɛ yakatswaa?
17 Jiemɔ Hiɛsɔɔ Kpo: Beni afi 2008 Kaimɔ be lɛ bɛŋkɛɔ nɛɛ, eba akɛ wɔteŋ mɔ fɛɛ mɔ aaasusu Yehowa mɔbɔnalɛ ni ejie lɛ kpo etsɔɔ wɔ lɛ he. Bɔfo Paulo ŋma akɛ: “Wɔwieɔ wɔtsɔɔ nyɛ hu, ní nyɛkahé Nyɔŋmɔ duromɔ lɛ yakatswaa.” (2 Kor. 6:1) Mɛni kɛ́ wɔfee lɛ ebaatsɔɔ akɛ wɔheko Nyɔŋmɔ duromɔ lɛ yakatswaa? Paulo ŋma akɛ: “Shi moŋ, nɔ fɛɛ nɔ mli lɛ wɔkɛ wɔhe tsɔɔ akɛ Nyɔŋmɔ sɔɔlɔi.” (2 Kor. 6:4) No hewɔ lɛ, wɔtsɔɔ wɔjeŋba kpakpa kɛ ekãa ni wɔkɛshiɛɔ sanekpakpa lɛ nɔ wɔtsɔɔ akɛ wɔyɛ hiɛsɔɔ kɛha Yehowa nikeenii lɛ. Kaimɔ be nɛɛ baaha wɔná hegbɛ kple ni baaha wɔtsu babaoo yɛ shiɛmɔ nitsumɔ lɛ mli, ni ebaaha wɔye sanekpakpa lɛ he odase kɛmɔ shi.
[Akrabatsa ni yɔɔ baafa 3]
Namɛi Baanyɛ Amɛkɛ Amɛhe Awo Gbɛgbalɔi Awamɔ Nitsumɔ lɛ Mli?
◼ Wekui
◼ Mɛi ni kɛ amɛbe fɛɛ tsuɔ nii
◼ Mɛi ni edara yɛ afii amli kɛ mɛi ni bɛ gbɔmɔtsoŋ hewalɛ
◼ Mɛi ni yaa skul
[Akrabatsa ni yɔɔ baafa 4]
Kɛ́ Ooja Kaimɔ lɛ he Ninefɔ̃ɔ Wolo Lɛ:
◼ Owiemɔ lɛ afee kuku; okɛ ekãa awie
◼ Ŋmalamɔ mɛi ni jieɔ miishɛɛ kpo lɛ ahe saji ni oku sɛɛ oyasara amɛ
◼ Okɛ woji tɛtrɛbii lɛ aha yɛ otsii lɛ anaagbee