Kaimɔ Be Lɛ—Be ni Wɔbaanyɛ Wɔkɛtsu Babaoo!

1. Mɛni hewɔ esa akɛ wɔbɔ mɔdɛŋ wɔlɛɛ wɔsɔɔmɔ nitsumɔ lɛ mli yɛ March, April, kɛ May mli lɛ?

¹ Ani obaanyɛ olɛɛ osɔɔmɔ nitsumɔ lɛ mli yɛ Kaimɔ be ni baa lɛ mli? Shiɛlɔi komɛi ni ji nitsulɔi loo skulbii lɛ baaba hejɔɔmɔ loo amɛbaaha gbɛ yɛ nakai beaŋ, ni amɛbaanyɛ amɛkɛ be nɛɛ atsu sɔɔmɔ nitsumɔ lɛ babaoo. Mɛi krokomɛi hu kɛ amɛhe baawo be kukuoo gbɛgbamɔ krɛdɛɛ nitsumɔ lɛ he tafãa ni baaya nɔ yɛ nyɔji ni kamɔ wɔhiɛ lɛ amli lɛ mli. Kɛjɛ April 2 lɛ kɛyaa lɛ, wɔbaafã ta krɛdɛɛ ko kɛfɔ̃ mɛi ni yɔɔ wiemɔ lɛ he miishɛɛ lɛ nine koni amɛbafata wɔhe kɛye Kaimɔ lɛ yɛ April 17. Kɛ́ agbe Kaimɔ lɛ naa lɛ, wɔbaabɔ mɔdɛŋ ni wɔye wɔbua mɛi ni yɔɔ wiemɔ lɛ he miishɛɛ ni ba Kaimɔ lɛ, ni wɔfɔ̃ amɛ nine ni amɛbabo wiemɔ krɛdɛɛ ni abaaha yɛ April 25 otsi lɛ mli lɛ toi. Yɛ anɔkwale mli lɛ, wɔyɛ yiŋtoi babaoo ahewɔ ni wɔbaanyɛ wɔlɛɛ wɔsɔɔmɔ nitsumɔ lɛ mli yɛ March, April, kɛ May mli.

2. Mɛni ji gbɛ kome ni hi jogbaŋŋ ni wɔɔtsɔ nɔ wɔtsu babaoo yɛ sɔɔmɔ nitsumɔ lɛ mli?

² Gbɛgbalɔi Awamɔ Nitsumɔ Lɛ: Gbɛ kome ni hi jogbaŋŋ ni wɔɔtsɔ nɔ wɔtsu babaoo ji ni wɔkɛ wɔhe awo gbɛgbalɔi awamɔ nitsumɔ lɛ mli. Akɛni wɔ fɛɛ wɔyɛ nibii babaoo tsumɔ hewɔ lɛ, bei pii lɛ, enɛ baabi ni wɔtsɔ hiɛ wɔto gbɛjianɔ, ni wɔfee tsakemɔi komɛi hu. (Abɛi 21:5) Ekolɛ obaanyɛ otsi nibii komɛi ni ofeɔ daa ni he ehiaaa tsɔ lɛ oto afã dã. (Fil. 1:9-11) Mɛni hewɔ ohaaa osafo lɛ mlibii krokomɛi ale akɛ oosumɔ ni okɛ ohe awo gbɛgbalɔi awamɔ nitsumɔ lɛ mli, akɛ aleenɔ amɛ hu amɛbaasumɔ ni amɛkɛ amɛhe awo mli lo?

3. Te wekui aaafee tɛŋŋ amɛtsu babaoo yɛ shiɛmɔ nitsumɔ lɛ mli lɛ?

³ Ebaahi jogbaŋŋ akɛ nyɛaasusu otii ni mamɔ nyɛhiɛ lɛ ahe akɛ weku, yɛ nyɛgbɛkɛ Weku Jamɔ ni nyiɛ sɛɛ lɛ mli. (Abɛi 15:22) Kɛ́ weku lɛ mlibii lɛ fɛɛ fee ekome lɛ, ekolɛ amɛteŋ mɛi komɛi baanyɛ amɛkɛ amɛhe awo gbɛgbalɔi awamɔ nitsumɔ lɛ mli nyɔɔŋ kome loo nɔ ni fe nakai. Ni kɛ́ nyɛna akɛ bɔ fɛɛ bɔ ni fee lɛ, nyɛnyɛŋ nyɛkɛ nyɛhe awo mli hu? No lɛ, weku lɛ baanyɛ atsu babaoo lolo kɛtsɔ shiɛmɔ ni amɛbaaya gbɛkɛ komɛi loo be babaoo ni amɛkɛaashiɛ yɛ otsii lɛ anaagbee lɛ nɔ.

4. Kɛ́ wɔtsu babaoo yɛ sɔɔmɔ nitsumɔ lɛ mli yɛ Kaimɔ be lɛ mli lɛ, mɛɛ jɔɔmɔi wɔbaaná?

⁴ Yehowa naa mɔdɛŋ fɛɛ ni wɔbɔɔ kɛsɔmɔɔ lɛ lɛ, ni ehiɛ sɔɔ nibii fɛɛ ni wɔkɛshãa afɔle lɛ. (Heb. 6:10) Kɛ́ wɔŋɔ nɔ ko wɔha Yehowa kɛ mɛi krokomɛi lɛ, wɔnáa miishɛɛ waa. (1 Kron. 29:9; Bɔf. 20:35) Ani obaanyɛ otsu babaoo yɛ Kaimɔ be lɛ mli ni oná miishɛɛ kɛ jɔɔmɔi babaoo ni jɛɔ nakai feemɔ mli kɛbaa lɛ eko?