Kaimɔ lɛ He Ninefɔ̃ɔ Wolo ni Abaaja yɛ Je Lɛŋ Fɛɛ!
1. Mɛɛ tafãa krɛdɛɛ ko ato he gbɛjianɔ yɛ je lɛŋ fɛɛ dani Kaimɔ lɛ ashɛ?
1 “Nyɛfea enɛ ni nyɛŋɔkai mi.” (Luka 22:19) Yɛ Yesu fãmɔ nɛɛ ni ekɛha lɛ toiboo naa lɛ, Yehowa jálɔi kɛ mɛi ni yɔɔ wiemɔ lɛ he miishɛɛ lɛ baabua amɛhe naa March 30, 2010, ni amɛkai Yesu gbele lɛ. Abaaja Kaimɔ lɛ he ninefɔ̃ɔ wolo krɛdɛɛ ko yɛ je lɛŋ fɛɛ kɛjɛ March 13 kɛyashi March 30.
2. Mɛɛ gbɛ nɔ wɔbaanyɛ wɔtsɔ wɔkɛ ninefɔ̃ɔ wolo lɛ aha?
2 Gbɛ Nɔ ni Abaatsɔ Akɛha: Obaanyɛ okɛ ninefɔ̃ɔ wolo lɛ aha shĩatsɛ lɛ bɔni afee ni ena mfoniri ni yɔɔ sɛɛ lɛ, no sɛɛ lɛ kɛɛmɔ lɛ akɛ: “Mɛi akpekpei abɔ baabua amɛhe naa yɛ je lɛŋ fɛɛ March 30 gbɛkɛnaashi kɛkai Yesu gbele lɛ. Miba mafɔ̃ bo kɛ oweku lɛ nine kɛha nifeemɔ nɛɛ. Obaanyɛ okɛ onanemɛi hu aba. Ofainɛ kadimɔ be kɛ he ni abaafee Kaimɔ lɛ yɛ.” Kɛ́ shihilɛ lɛ baaŋmɛ gbɛ lɛ, obaanyɛ okane Luka 22:19 lɛ kɛjɛ Biblia lɛ mli oha lɛ, koni ena akɛ eji Ŋmalɛ naa fãmɔ. Shi kaimɔ akɛ, akɛni be ni wɔkɛ baatsu shikpɔŋkuku lɛ mli nii lɛ faaa hewɔ lɛ, ebaahi akɛ wɔwiemɔ aaafee kuku.
3. Namɛi wɔbaanyɛ wɔfɔ̃ amɛ nine?
3 Kɛ́ nyɛsafo lɛ shikpɔŋkuku lɛ da lɛ, ekolɛ asafoŋ onukpai lɛ baaha nyɛshi ninefɔ̃ɔ wolo lɛ eko yɛ mɛi ni bɛ shĩa lɛ ashinaai anaa. Kɛ́ ebaahi lɛ, nyɛbaanyɛ nyɛkɛ woji tɛtrɛbii lɛ aha kɛfata ninefɔ̃ɔ wolo lɛ he yɛ otsi lɛ naagbee. Bɔɔ mɔdɛŋ akɛ obaafɔ̃ mɛi ni okuɔ osɛɛ oyasaraa amɛ, o-Biblia mli nikaselɔi, mɛi ni okɛtsuɔ nii, onanemɛi skulbii, owekumɛi, okutsoŋbii, kɛ onanemɛi krokomɛi nine.
4. Hiɛsɔɔ ni wɔyɔɔ yɛ suɔmɔ mli ni Yehowa jɛ ekɛ kpɔ̃mɔnɔ lɛ ha lɛ he lɛ baatsirɛ wɔ koni wɔfee mɛni?
4 Saamɔ Ohe ni Okɛ Ohe Awo Mli Kɛmɔ Shi: Kaimɔ be lɛ ji be ni hi jogbaŋŋ ni wɔbaanyɛ wɔkɛshiɛ waa. Ani obaanyɛ oto obe he gbɛjianɔ kɛha gbɛgbalɔi awamɔ nitsumɔ lɛ? Ani oyɛ bii loo Biblia mli nikaselɔi ni miiya amɛhiɛ yɛ mumɔŋ? Kɛ́ nakai ni lɛ, yaana asafoŋ onukpai lɛ ni amɛkwɛ akɛ mɛi hee nɛɛ baanyɛ afata tafãa nɛɛ he akɛ shiɛlɔi ni abaptisiko amɛ lo. Hiɛsɔɔ ni wɔyɔɔ yɛ suɔmɔ mli ni Yehowa jɛ ekɛ kpɔ̃mɔnɔ lɛ ha lɛ he lɛ baatsirɛ wɔ, jeee ni wɔya Kaimɔ lɛ shishi pɛ kɛkɛ, shi moŋ koni wɔfɔ̃ mɛi babaoo ni wɔɔnyɛ lɛ nine kɛfata wɔhe kɛya.—Yoh. 3:16.