Sanebimɔ He

◼ Ani esa akɛ toibolɔi atswa amɛdɛ yɛ Teokrase Sɔɔmɔ Skul lɛ kɛ Sɔɔmɔ Kpee lɛ fãi srɔtoi lɛ eko fɛɛ eko naagbee?

Beni Yehowa, ni ji Bɔlɔ lɛ to je lɛ shishi lɛ, “leebi ŋulamii lɛ fɛɛ lá nyamɔ lala shikoome ni Nyɔŋmɔ bii lɛ fɛɛ kwa bɔ oshe.” (Hiob 38:7) Nyɔŋmɔ bii ni ji ŋwɛibɔfoi nɛɛ ná he miishɛɛ akɛ amɛaajie Yehowa yi yɛ edebɔɔ ni nɔ bɛ, ni ha ejie enilee, emlihilɛ, kɛ ehewalɛ lɛ kpo etsɔɔ lɛ hewɔ.

Ehi jogbaŋŋ akɛ wɔ hu wɔbaajie wɔtsuiaŋ hiɛsɔɔ kpo yɛ mɔdɛŋ ni wɔnyɛmimɛi lɛ bɔɔ, kɛ skul lɛ mli nifeemɔi ni amɛtsuɔ he nii lɛ hewɔ. Ákɛ nɔkwɛmɔnɔ lɛ, kɛ́ aha wiemɔ yɛ henaabuamɔi krɛdɛɛi tamɔ kpokpaa nɔ kpeei kɛ kpokpaa wuji anɔ kpeei ashishi nɛkɛ lɛ, wɔtswaa wɔdɛ. Akɛ bei babaoo kɛ mɔdɛŋbɔɔ diɛŋtsɛ saa he kɛha wiemɔi ni ahaa yɛ jɛmɛ lɛ. Wɔdɛ ni wɔtswaa lɛ tsɔɔ hiɛsɔɔ ni wɔyɔɔ kɛha mɛi ni haa wiemɔ lɛ, kɛ agbɛnɛ hu kɛha Yehowa kɛ nii ni etsɔɔ wɔ kɛtsɔ e-Wiemɔ lɛ kɛ egbɛjianɔtoo lɛ nɔ lɛ.—Yes. 48:17; Mat. 24:45-47.

Ni dɛ ni atswaa yɛ Teokrase Sɔɔmɔ Skul lɛ kɛ Sɔɔmɔ Kpee lɛ fãi srɔtoi lɛ eko fɛɛ eko naagbee lɛ hu? Mla ko bɛ ni tsɔɔ akɛ anyɛŋ atswa dɛ kɛji akɛ dɛtswaa lɛ jɛ toibolɔi lɛ atsuiiaŋ, tamɔ ekolɛ skulnyo hee ko egbe eklɛŋklɛŋ skul nifeemɔ naa nɛkɛ. Shi kɛ́ akwɛɛɛ ni ahi lɛ, dɛtswaa lɛ baanyɛ ebafee nɔ ko ni afeɔ kɛkɛ, ni yiŋtoo hewɔ ni atswaa dɛ lɛ baalaaje. No hewɔ lɛ, bei pii lɛ wɔtswaaa wɔdɛ yɛ nifeemɔ lɛ eko fɛɛ eko naagbee.

Eyɛ mli akɛ wɔtswaŋ wɔdɛ kɛ́ agbe Teokrase Sɔɔmɔ Skul lɛ kɛ Sɔɔmɔ Kpee lɛ fãi srɔtoi lɛ pii anaa moŋ, shi gbɛ̀i krokomɛi yɛ ni wɔ fɛɛ wɔbaanyɛ wɔtsɔ nɔ wɔjie hiɛsɔɔ kpo yɛ mɔdɛŋ ni mɛi ni ná nifeemɔi lɛ amli gbɛfaŋnɔ lɛ bɔ, kɛ nɔ ni amɛtsɔɔ wɔ lɛ he. Wɔbaanyɛ wɔfee enɛ kɛtsɔ diŋŋ ni wɔɔfee, kɛ wielɔ lɛ toi ni wɔɔbo jogbaŋŋ lɛ nɔ. Ni kɛ́ akpa kpee lɛ, wɔbaanyɛ wɔbɛŋkɛ mɛi ni ná nifeemɔ lɛ mli gbɛfaŋnɔ lɛ koni wɔjie hiɛsɔɔ kpo kɛtsɔ amɛyi ni wɔɔjie yɛ mɔdɛŋ ni amɛbɔ lɛ hewɔ.—Efe. 1:15, 16.