Obaanyɛ Otsɔ Tsɔɔlɔ!
1. Mɛɛ hegbɛ ni nɔ bɛ yɔɔ kɛha Maŋtsɛyeli shiɛlɔi fɛɛ?
1 Nɔ ni haa mɔ tsui nyɔɔ emli fe fɛɛ yɛ Sɔɔmɔ nitsumɔ lɛ mli lɛ ateŋ ekome ji ní atsɔɔ mɔ ko anɔkwale lɛ. Beni onaa akɛ mɔ lɛ miikpɛlɛ Maŋtsɛyeli shɛɛ sane lɛ nɔ, ni oyaa nɔ oyeɔ obuaa lɛ bɔni afee ni enyɛ ebɛŋkɛ jeŋ muu fɛɛ Maŋtsɛ lɛ, ebafeɔ nɔ ko ni esa akɛ wɔná he miishɛɛ waa. (Yak. 4:8) Esa akɛ Maŋtsɛyeli shiɛlɔi fɛɛ kɛfee oti ni ma amɛhiɛ akɛ, amɛbaatsɔɔ mɔ ni miitao ele anɔkwale lɛ nii, ni amɛye amɛbua lɛ koni efee tsakemɔi ni sa yɛ ejeŋba, bɔ ni esusuɔ nii ahe ehaa, kɛ bɔ ni efeɔ enii ehaa lɛ mli.—Mat. 28:19, 20.
2. Mɛni hewɔ mɛi komɛi shashaoɔ shi akɛ amɛaafee Biblia mli nikasemɔ lɛ, ni mɛni baaye abua amɛ ní amɛnyɛ amɛye naagba nɛɛ nɔ?
2 Okɛ Ohe Afɔ̃ Yehowa Nɔ: Yɛ bei ni eho lɛ amli lɛ, Yehowa tsuji anɔkwafoi lɛ enaaa amɛhe akɛ amɛsa kɛha nitsumɔ ni ekɛwo amɛdɛŋ lɛ. Hekɛnɔfɔɔ ní Mose, Yeremia, Amos, kɛ mɛi krokomɛi ni abuuu amɛ lɛ ná yɛ Yehowa Nyɔŋmɔ mli lɛ ye ebua amɛ ni amɛye yiŋkɔshikɔshifeemɔi, loo shweshweeshwe ni amɛnuɔ he akɛ amɛbɛ lɛ nɔ, ni amɛnyɛ amɛtsu nitsumɔ ni he hiaa. (2 Mose 4:10-12; Yer. 1:6, 7; Amos 7:14, 15) Bɔfo Paulo hu ‘ná ekãa’ kɛshiɛ. Yɛ mɛɛ gbɛ nɔ? Etsɔɔ akɛ, ená kɛtsɔ ‘Nyɔŋmɔ mli ekãa ní ená’ lɛ nɔ. (1 Tes. 2:2) Hɛɛ, wɔ fɛɛ wɔbaanyɛ wɔná hekɛnɔfɔɔ yɛ Yehowa mli akɛ, ebaaha wɔnine ashɛ yelikɛbuamɔ, nilee, kɛ hewalɛ ni he baahia wɔ lɛ nɔ kɛfee Biblia mli nikasemɔi ni woɔ yibii.—Yes. 41:10; 1 Kor. 1:26, 27; 1 Pet. 4:11.
3, 4. Mɛɛ tsɔsemɔ he gbɛjianɔ ato koni akɛye abua wɔ ni wɔtsɔɔ Nyɔŋmɔ Wiemɔ lɛ?
3 Ha Atsɔse Bo: Wɔ-Tsɔɔlɔ ni Fe Fɛɛ, ni ji Yehowa Nyɔŋmɔ tsɔseɔ wɔ kɛtsɔ nikasemɔ he gbɛjianɔtoo ni damɔ Biblia lɛ nɔ ni ekɛhaa wɔ daa lɛ nɔ, bɔni afee ni wɔhe asa akɛ tsɔɔlɔi. (Yes. 54:13; 2 Tim. 3:16, 17) Kɛ́ oná hegbɛ ni baaha Ŋmalɛ mli shishinumɔ ni oná kɛ hesaai ni oyɔɔ kɛtsɔɔ Biblia mli anɔkwalei amli lɛ aya hiɛ lɛ, bɔɔ mɔdɛŋ fɛɛ ni ooonyɛ ni okɛ nakai hegbɛ lɛ atsu nii. Eyɛ mli akɛ enɛ ji yiŋtoo titri hewɔ ni ato Teokrase Sɔɔmɔ Skul lɛ kɛ Sɔɔmɔ Kpee lɛ shishi moŋ, shi asafoŋ kpeei fɛɛ tsɔseɔ wɔ bɔni afee ni wɔtsɔɔ nii kɛjɛ Nyɔŋmɔ Wiemɔ lɛ mli.
4 Bɔɔ mɔdɛŋ akɛ oootsɔ gbɛ̀i ni yɔɔ mlɛo anɔ kɛtsɔɔ Nyɔŋmɔ Wiemɔ ni shishinumɔ wa lɛ amli. Sɔɔmɔ Skul wolo lɛ baafa 227 lɛ tsɔɔ mli akɛ: “Kɛ́ oosumɔ ni mɛi krokomɛi anu bo shishi lɛ, no lɛ esa akɛ bo diɛŋtsɛ lɛ onu osaneyitso lɛ shishi jogbaŋŋ.” Sane hetooi ni wɔhaa yɛ kpeei ashishi lɛ yeɔ ebua wɔ ni saji otii lɛ kaa wɔjwɛŋmɔ mli bɔni afee ni wɔnyɛ wɔkɛtsu nii wɔsɛɛ. No hewɔ lɛ, saamɔ ohe jogbaŋŋ, ni hekɛnɔfɔɔ ni oyɔɔ akɛ obaanyɛ otsɔɔ nii lɛ baaya hiɛ.
5. Mɛɛ tsɔsemɔ kroko wɔnine shɛɔ nɔ yɛ asafo lɛ mli ni baaye abua wɔ ni wɔya hiɛ akɛ tsɔɔlɔi?
5 Ekã shi faŋŋ akɛ mɛi ni sɔmɔɔ akɛ Kristofoi lɛ tsɔɔ amɛhe nii yɛ kaselɔfeemɔ nitsumɔ lɛ mli yɛ shishijee nɔŋŋ. (Luka 10:1) Kɛ́ aaahi lɛ, fatamɔ shiɛlɔi ni he esa ni amɛteŋ mɛi komɛi ji gbɛgbalɔi, asafoŋ onukpai, nɔkwɛlɔi gbɛfalɔi lɛ ahe kɛfee Biblia mli nikasemɔ. Kadimɔ bɔ ni amɛkɛ nɔkwɛmɔnii ni shishinumɔ waaa, kɛ nitsɔɔmɔ nibii krokomɛi ni yɔɔ wɔwoji lɛ amli lɛ tsuɔ nii kɛgbálaa Ŋmalɛ mli anɔkwalei lɛ amli lɛ. Bi amɛ bɔni ooofee ni ohe asa akɛ tsɔɔlɔ kpakpa. (Abɛi 1:5; 27:17) Jiemɔ hiɛsɔɔ kpo yɛ tsɔsemɔi fɛɛ ni onine baashɛ nɔ lɛ he, akɛni eji tsɔsemɔ ni jɛ Nyɔŋmɔ ŋɔɔ lɛ hewɔ.—2 Kor. 3:5.
6. Mɛni titri he hiaa bɔni afee ni mɔ ko anyɛ atsɔɔ Nyɔŋmɔ Wiemɔ lɛ?
6 Okɛ ohe afɔ̃ Yehowa nɔ koni oná tsɔsemɔ ni ekɛhaa lɛ he sɛɛ. Sɔlemɔ yɛ hiɛyaa ni otaoɔ akɛ oná lɛ he. (Lala 25:4, 5) Bo hu omii baashɛ ohe kɛ́ onyɛ oye obua mɔ ko ní enyɛ etsɔɔ Nyɔŋmɔ Wiemɔ lɛ tamɔ bɔ ni ofeɔ lɛ!