Afi 2009 Yehowa Odasefoi a-Kpokpaa Wulu nɔ Kpee
1. (a) Kɛ́ wɔtee kpokpaa wulu nɔ kpee lɛ gbii etɛ lɛ fɛɛ lɛ, mɛɛ jɔɔmɔi wɔbaaná? (b) Mɛɛ gbɛjianɔ esa akɛ wɔto bianɛ?
1 Wɔ fɛɛ wɔmiikpa afi 2009 kpokpaa wulu nɔ kpee lɛ, kɛ hegbɛ heei ni wɔbaaná ni wɔkɛ wɔnyɛmimɛi krokomɛi ni jieɔ Yehowa yi, ni “amɛhiɛ yɔɔ amɛmumɔŋ hiamɔ nii anɔ” lɛ akpe lɛ gbɛ. (Mat. 5:3, NW) Beni Yehowa gbi lɛ bɛŋkɛɔ oyayaayai nɛɛ, wɔmiiwo nyɛteŋ mɔ fɛɛ mɔ hewalɛ ni eya gbii etɛ lɛ fɛɛ, bɔni afee ni ená Kristofoi anaanyobɔɔ, kɛ mumɔŋ hewalɛwoo ni wɔkɛaadamɔ shi shiŋŋ yɛ hemɔkɛyeli lɛ mli lɛ he sɛɛ kɛmɔ shi. (Zef. 1:14) Ha otsɔɔlɔi kɛ onitsumɔtsɛmɛi ale akɛ kpee lɛ ji ojamɔ lɛ fã ko ni he hiaa waa. Okɛ ekãa abɔi gbɛjianɔtoo mra, ni obi Yehowa dɛŋ jɔɔmɔ; ebaaye ebua bo.—Yes. 50:10.
2. Mɛɛ majimaji ateŋ nifeemɔ wɔbaaná he sɛɛ yɛ kpeei ni abaafee afi nɛɛ mli?
2 M aj i maj i Ateŋ Kpeei: Taakɛ atsɔɔ mli yɛ April-June, 2009 Buu-Mɔɔ lɛ mli lɛ, abaafee majimaji ateŋ kpee lɛ eko hu yɛ Accra, ni mɛi baajɛ Europa, Afrika Teŋgbɛ kɛ Afrika Anaigbɛ kɛba. Akɛni abaakwɛ majimaji ateŋ kpeei nɛɛ anɔ kɛjɛ Accra pɛ hewɔ lɛ, asafoi ni abaatsɔɔ akɛ amɛya kpeei nɛɛ pɛ baanyɛ aya. Kɛ́ wɔfĩ gbɛtsɔɔmɔ nɛɛ sɛɛ lɛ, ehaŋ mɛi ni fá fe nine abua amɛhe naa yɛ he kome. (1 Kor. 14:40; Heb. 13:17) Shi abaanu majimaji ateŋ kpee lɛ shishi nifeemɔi lɛ ekomɛi yɛ hei krokomɛi hu. Abaatsɔ tɛlifoŋ nɔ akɛ Accra kpee lɛ shishi nifeemɔi lɛ ekomɛi aya Kumasi kɛ Takoradi kpeei lɛ ashishi. Kpee lɛ shishi nifeemɔ lɛ eko baakɔ maŋsɛɛ sanekpakpa shiɛlɔi lɛ anitsumɔ lɛ he, ni wɔbaaná hegbɛ kɛbo niiashikpamɔi ni jɛ maji krokomɛi anɔ lɛ atoi. Mɛni wɔbaanyɛ wɔfee koni wɔná gbɛjianɔ ni atoɔ amrɔ nɛɛ kɛha wɔkpeei ni abaafee afi nɛɛ he sɛɛ kɛmɔ shi?
3. Mɛɛ gbɛ nɔ wɔbaanyɛ wɔtsɔ wɔjie Kristofoi asuɔmɔ kpo wɔtsɔɔ mɛi komɛi yɛ asafo lɛ mli?
3 Ye Obua Mɛi Krokomɛi ni Amɛya: Ani yelikɛbuamɔ ko he miihia mɛi komɛi ni yɔɔ osafo lɛ mli lɛ bɔni afee ni amɛnyɛ amɛya kpee lɛ? Kɛ́ oye obua mɛi krokomɛi koni amɛya kpee lɛ, etsɔɔ akɛ ‘ofooo bo diɛŋtsɛ onɔ mli, shi oofó mɛi krokomɛi anɔ mli.’—Fil. 2:4.
4. Mɛni hewɔ esaaa akɛ ewaa kɛhaa wɔ akɛ wɔbaabi gbɛ koni wɔnyɛ wɔya nifeemɔ ni he hiaa nɛɛ shishi lɛ?
4 Bei komɛi lɛ, nyɛmimɛi komɛi shashaoɔ shi akɛ amɛkɛ amɛnitsumɔtsɛmɛi lɛ aaawie, ejaakɛ amɛsusuɔ akɛ amɛnitsumɔtsɛmɛi lɛ eŋmɛŋ amɛ gbɛ ni amɛya kpee lɛ kɔkɔɔkɔ. Shi kɛ́ ebalɛ akɛ aya henaabuamɔi komɛi tamɔ yara loo yookpeemɔ shishi lɛ, ewaaa ehaaa nyɛmimɛi babaoo akɛ amɛaaha amɛnitsumɔtsɛmɛi lɛ ale nɔ ni amɛtao ní amɛfee lɛ. Esa akɛ wɔbi wɔhe akɛ: Kɛ́ wɔnaanyo ko ní wɔsumɔɔ esane miibote gbalashihilɛ mli yɛ he kroko lɛ, ani wɔyabiŋ wɔnitsumɔtsɛ lɛ gbɛ koni wɔnyɛ wɔya yookpeemɔ lɛ? Ni kɛ́ eshashao shi akɛ ebaaŋmɛ wɔ gbɛ lɛ, ani wɔjɛŋ bulɛ mli wɔgbálaŋ nɔ hewɔ ni esa akɛ wɔya lɛ mli wɔtsɔŋ lɛ? Ekã shi faŋŋ akɛ kpee ni wɔbaaya koni Yehowa atsɔɔ wɔ nii lɛ he miihia kwraa fe henaabuamɔi krokomɛi ashishi ni wɔɔya! Kɛ́ wɔheɔ wɔyeɔ lɛlɛŋ akɛ nibii ni baaya nɔ yɛ kpee lɛ shishi lɛ he miihia kɛha wɔmumɔŋ hiɛyaa lɛ, no lɛ ewaŋ kɛhaŋ wɔ akɛ wɔɔkɔne wɔnitsumɔtsɛ lɛ yiŋ koni eŋmɛ wɔ gbɛ ni wɔya kpee lɛ. (Yak. 1:7, 8) Ha amɛle akɛ kpee lɛ ji ojamɔ lɛ fã ni he hiaa waa. Obaanyɛ oná nɔmimaa akɛ Yehowa baajɔɔ mɔdɛŋ ni obɔɔ koni okɛ Maŋtsɛyeli lɛ he nibii aye klɛŋklɛŋ gbɛhe lɛ nɔ.—Mat. 6:33.
5. Mɛni hewɔ awoɔ wɔ hewalɛ koni wɔya kpee ni ato ni wɔsafo lɛ aya lɛ?
5 Kɛ́ Obaaya Kpee Kroko: Bɔni afee ni aná shitaramɔhei, woji, wɔɔhei, kɛ nibii krokomɛi ni fá bɔ ni sa lɛ, aawo bo hewalɛ ni oya kpee ni ato he gbɛjianɔ ni nyɛsafo lɛ aya lɛ. Kɛ́ shihilɛ ko ha eba lɛ akɛ oya kpokpaa wulu nɔ kpee kroko lɛ, ofainɛ kwɛmɔ nɔ ni aŋma ahɔ Wɔ Maŋtsɛyeli Sɔɔmɔ nɛɛ mli lɛ baafa 6 lɛ kɛha bei kɛ he ni abaafee yɛ.
6. Mɛɛ be esa akɛ asafo ko aya kpee ni jeee amɛ ato he gbɛjianɔ aha lɛ?
6 Yɛ asafoi komɛi ni yɔɔ akrowai lɛ agbɛfaŋ lɛ, nibii komɛi tamɔ wiemɔ, gbɛ jɛkɛmɔ, kɛ tsɔne ni anáaa lɛ baanyɛ aha efee mlɛo kɛha amɛ akɛ amɛaaya kpee lɛ yɛ he kroko. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ akɛ amɛaaya kpokpaa wulu nɔ kpee kroko. Esaaa akɛ amɛŋmaa nitsumɔhe nine lɛ gbɛbimɔ wolo dani amɛya kpee kroko lɛ. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee ni jeee amɛnɔ lɛ aha amɛkpokpaa nɔkwɛlɔ lɛ ale enɛ mra kɛtsɔ hiɛ koni ekato gbɛjianɔ kɛha amɛsaramɔ nakai otsi lɛ. Ebaahi hu akɛ amɛbaaha Kpee Ajinafoi ni kwɛɔ kpee ni amɛbaaya lɛ nɔ lɛ ale kɛtsɔ adrɛs ni yɔɔ baafa 6 lɛ mli nɔ ni sa lɛ nɔ.
7. Mɛni esa akɛ nyɛmimɛi ni nyiɛɔ hiɛ lɛ aha ehi amɛjwɛŋmɔ mli?
7 Tsɔne he Gbɛjianɔtoo: Esa akɛ nyɛmimɛi ni toɔ tsɔne he gbɛjianɔ lɛ akwɛ akɛ tsɔne ni amɛbaawo lɛ yɛ hewalɛ ni ekɛ gbɛfãa hu baafee shweshweeshwe. Esa akɛ asafoŋ onukpai lɛ akwɛ ni mɛi ayibɔ ni baatara tsɔne lɛ mli lɛ akafá fe bɔ ni tsɔne lɛ woɔ, koni akatɔ̃ maŋ lɛ mla nɔ.
8, 9. Mɛɛ gbɛ nɔ atsɔɔ atsuɔ wolo ni aŋmalaa nɔ nii kɛbiɔ wɔɔhe lɛ he nii ni akɛmajeɔ?
8 Wɔɔhei: Akɛ Room Request woji baamaje asafo fɛɛ asafo. Kɛ́ obaasumɔ ni mɛi ni toɔ kpee lɛ he gbɛjianɔ lɛ atao wɔɔhe aha bo lɛ, ofainɛ ni oŋmala Room Request wolo lɛ eko nɔ nii ni okɛha osafo lɛ mli woloŋmalɔ lɛ ni ekwɛ, koni no sɛɛ lɛ okɛmaje mɛi ni toɔ kpee lɛ he gbɛjianɔ yɛ he ni otaoɔ ni oya yɛ lɛ. Kɛ́ abaafee kpokpaa wulu nɔ kpee ni fá fe ekome yɛ maŋ lɛ mli lɛ, tsɔɔmɔ be ní akɛbaafee kpee ni obaaya lɛ. ESAAA ni akɛ Room Request wolo lɛ kɛ woji krokomɛi ni abaaŋmala kɛbi kpee lɛ he saji lɛ majeɔ nitsumɔhe nine ni yɔɔ Accra lɛ.
9 Kɛ́ shiɛlɔ ko ni yɔɔ hiamɔ nii pɔtɛɛ ko ŋmala Room Request wolo lɛ eko nɔ nii lɛ, esa akɛ Asafoŋ Sɔɔmɔ Ajinafoi Akuu lɛ akwɛ akɛ eshɛɔ taomɔ nii kɛha mɛi ni esa akɛ aye abua amɛ ni aŋmala awo wolo lɛ nɔ lɛ he lo. Gbɛjianɔtoo nɛɛ yɛ kɛha shiɛlɔi ni yɔɔ shidaamɔ kpakpa yɛ asafo lɛ mli kɛ amɛbii ni baa amɛjeŋ jogbaŋŋ lɛ pɛ.
10. Kɛ́ aha wɔyahi mɛi komɛi ashĩai amli lɛ, mɛɛ gbɛ nɔ wɔbaanyɛ wɔtsɔɔ akɛ wɔji gbɔi kpakpai ni hiɛ sɔɔ nii?
10 Abaato wɔɔhei lɛ ekomɛi ahe gbɛjianɔ yɛ mɛi komɛi ashĩai amli. Shĩai nɛɛ baanyɛ afee nyɛmimɛi ashĩai loo mɛi krokomɛi anɔ. Akɛ tsũi nɛɛ haa yɛ kpee be lɛ mli PƐ. Esa akɛ mɛi ni nine shɛɔ wɔɔhei ni tamɔ nɛkɛ nɔ lɛ kɛ amɛbii lɛ abɔ mɔdɛŋ akɛ amɛbaajie bulɛ kpo amɛtsɔɔ mɛi ni feɔ amɛ gbɔ lɛ, ni esaaa akɛ amɛkwɛɔ shiatsɛmɛi lɛ anibii amli loo amɛfiteɔ lɛ, esaaa hu akɛ amɛdamɔɔ amɛtsũ mli sɛii anɔ, loo amɛyaa shĩa lɛ mli hei ni ahako amɛ hegbɛ akɛ amɛya lɛ. Wɔbaanyɛ wɔjie bulɛ kpo kɛtsɔ tsũi lɛ amli ni wɔɔhiɛ lɛ falefale ni wɔha jɛmɛ atse gbi fɛɛ gbi lɛ nɔ. Kɛ́ shiatsɛmɛi lɛ ná naagba yɛ nibii ni awie he nɛɛ eko he lɛ, esa akɛ aha nɔkwɛlɔ ni kwɛɔ wɔɔhe he gbɛjianɔtoo lɛ nɔ lɛ ale enɛ yɛ kpee lɛ shishi amrɔ nɔŋŋ, ni ebaaná he miishɛɛ akɛ ebaaye ebua. Kɛ́ wɔɔfee gbɔi kpakpai lɛ, no lɛ esaaa akɛ wɔŋmɛɔ gbɛ ni wɔshiatsɛmɛi lɛ sɔmɔɔ wɔ yɛ nɔ fɛɛ nɔ mli tamɔ nɔ ni wɔsɔɔmɔ hewɔ amɛyɔɔ.
11. Kɛ́ wɔyahi gbɔi atoohe lɛ, mɛɛ gbɛ nɔ wɔɔtsɔ wɔjie Kristofoi asuɔmɔ kɛ bulɛ kpo wɔtsɔɔ mɛi krokomɛi?
11 Kɛ́ okpɛ oyiŋ akɛ obaaya oyahi gbɔiatoohe lɛ, ha ehi ojwɛŋmɔ mli akɛ obaanyɛ otsɔ ojeŋba, owiemɔ, kɛ ohesaamɔ nɔ oye odase. Ekɛba kɔkɔɔkɔ akɛ wɔkɛ mɛi ni bahaa wɔ niyenii loo mɛi ni basaa wɔtsũi lɛ amli lɛ aaaye yɛ gbɛ ni bulɛ bɛ mli nɔ. Eyɛ mli akɛ wɔwoɔ amɛ nyɔmɔ yɛ sɔɔmɔ ni amɛkɛhaa wɔ lɛ he moŋ, shi esa akɛ wɔjie bulɛ kɛ woo kpo wɔtsɔɔ nitsulɔi nɛɛ. Enɛ tsɔɔ akɛ esoro Yehowa webii lɛ kwraa kɛ́ akɛ amɛ to mɛi ni nuuu Biblia lɛ shishi ní amɛjieee suɔmɔ kɛ bulɛ ni tamɔ nɛkɛ kpo amɛtsɔɔɔ mɛi krokomɛi lɛ ahe.
12. (a) Mɛni akpaa mɛi fɛɛ ni baaba kpee lɛ gbɛ ni amɛkɛba gbii etɛ lɛ fɛɛ, ni mɛni hewɔ? (b) Mɛni wɔbaanyɛ wɔkɛ be kɛha shwane hejɔɔmɔ lɛ afee, ni te enɛ ni wɔɔfee lɛ baaye abua wɔ tɛŋŋ?
12 Shwane Hejɔɔmɔ: Afii fioo komɛi nɛ lɛ, tsulɔ anɔkwafo lɛ ewo wɔ hewalɛ koni wɔye niyenii ni mli etsiii yɛ kpeei ashishi. Ato gbɛjianɔ nɛɛ bɔni afee ni wɔjwɛŋmɔ ahi nibii ni he hiaa titri, tamɔ gbɛjianɔ ni wɔɔto koni wɔweku lɛ ayashɛ kpee lɛ shishi mra gbi fɛɛ gbi, kɛ wiemɔi lɛ ni amɛaabo toi jogbaŋŋ lɛ nɔ. No hewɔ ni awoɔ mɛi fɛɛ ni baaba kpee lɛ hewalɛ ni amɛkɛ niyenii ni mli etsiii ní amɛbaaye loo amɛbaanu kɛ atee shwane hejɔɔmɔ lɛ ajɛ shĩa kɛba lɛ. Enɛ baaye abua wɔ koni wɔhi kpee lɛ shishi yɛ shwane hejɔɔmɔ be lɛ mli koni wɔkɛ mɛi ni eba lɛ aná naanyobɔɔ mli ŋɔɔmɔ. Kɛ́ wɔto niyenii ni mli etsiii he gbɛjianɔ ni wɔye bɔ ni sa lɛ, ebaaye ebua wɔ ni wɔkawɔ beni shwane kpee lɛ yaa nɔ lɛ. Akɛni wɔteŋ mɛi babaoo wɔŋ yɛ shwane hejɔɔmɔ be lɛ mli hewɔ lɛ, esa akɛ wɔkwɛ niyenii abɔ ni wɔyeɔ lɛ jogbaŋŋ. Taakɛ wɔyeee nii yɛ Maŋtsɛyeli Asai lɛ anɔ beni nikasemɔ lɛ yaa nɔ lɛ, nakai nɔŋŋ esaaa akɛ wɔyeɔ nii yɛ kpee lɛ shishi beni nifeemɔ lɛ yaa nɔ lɛ. Kɛ́ wɔye niyenii ni mli etsiii beni aba shwane hejɔɔmɔ lɛ, wɔtsɔɔ akɛ wɔhiɛ sɔɔ mumɔŋ nibii ni he hiaa titrii lɛ, ni no tsɔɔ bulɛ ni wɔyɔɔ kɛha wɔjamɔ lɛ he gbɛjianɔ ni ato kɛ mumɔŋ niyenii ni akɛhaa wɔ lɛ.—Kanemɔ Luka 10:42.
13. (a) Nɛgbɛ mɛi ahe baahiɛ yɛ kɛha nitsumɔ? (b) Mɛni oto ni obaafee kɛye obua koni kpee lɛ aye omanye?
13 Jɛɛ Osuɔmɔ Mli Okɛ Ohe Aha Kɛha Nitsumɔ: Mɛi ohai abɔ kɛ amɛhe haa beni kpee lɛ yaa nɔ lɛ koni amɛha nitsumɔhei bibii ni yɔɔ kpee lɛ shishi lɛ anitsumɔi lɛ aya nɔ jogbaŋŋ. Mɛi ni kwɛɔ shitaramɔ kɛ tsɔji amaamɔhei lɛ anɔ ni yɔɔ kpee lɛ shishi lɛ kɛ gbɛtsɔɔmɔi haa kɛha shitaramɔ, ni amɛkwɛɔ wɔtsɔji lɛ anɔ amɛhaa wɔ yɛ gbi lɛ mli. Nitsumɔhe ni Kwɛɔ Falefalefeemɔ Nɔ lɛ ená hegbɛ akɛ amɛaafĩ gbɛi kpakpa ni wɔyɔɔ yɛ falefalefeemɔ he lɛ sɛɛ, ni amɛhaa he ni wɔkpeɔ yɛ kɛha jamɔ yɛ be kukuoo mli lɛ feɔ falefale fe bɔ ni wɔbanina lɛ. Ani wɔbaanyɛ wɔye wɔbua mɛnɛɛmɛi loo nitsumɔhei krokomɛi ni wɔyelikɛbuamɔ he baahia amɛ lɛ? Ani okɛ ohe baaha koni oye obua ni okɛ onyɛmimɛi lɛ asɔmɔ kɛ “gbee kome?” (Zef. 3:9) Kɛ́ Nitsumɔhe ni Kwɛɔ Mɛi ni kɛ Amɛhe Eha Kɛha Nitsumɔ lɛ nɔ lɛ hako wɔ nitsumɔ ko po lɛ, wɔ fɛɛ wɔbaanyɛ wɔjie hekɛafɔleshãa mumɔ kpo kɛtsɔ jwɛi ni wɔɔhala, kɛ he ni wɔtara lɛ ni wɔɔha efee falefale beni akpa kpee lɛ nɔ.
14. Mɛni esa akɛ efee oti ni ma wɔhiɛ beni wɔsaa wɔhe ni wɔya afi 2009 kpokpaa wulu nɔ kpee lɛ?
14 Nitsumɔi ni Woɔ Nyɔŋmɔ Hiɛ Nyam: Kɛ́ wɔjie mumɔ lɛ yibii lɛ kpo yɛ wɔnifeemɔi fɛɛ amli, ni wɔkwɛ wɔwiemɔ kɛ wɔjeŋba jogbaŋŋ beni wɔkɛ gbɔiatoohe nitsulɔi kɛ mɛi krokomɛi ni yɔɔ maŋ ni afeɔ kpee lɛ yɛ mli lɛ sharaa lɛ, wɔhaa anaa bulɛ ni Yehowa webii lɛ yɔɔ, ni ehaaa wɔto mɔ ko pampi. (1 Kor. 10:31; 2 Kor. 6:3, 4) Eba akɛ obaatsɔ ojeŋba kɛ kpee lɛ ni ooya lɛ nɔ owo Nyɔŋmɔ hiɛ nyam yɛ afi 2009 kpokpaa wulu nɔ kpee loo majimaji ateŋ kpee lɛ shishi!—1 Pet. 2:12.
[Akrabatsa ni yɔɔ baafa 3]
Nifeemɔ Bei:
Soo (Majimaji Ateŋ Kpeei Pɛ)
Shwane 1:20 – Shwane 4:55
Sohaa kɛ Hɔɔ
Leebi 9:20 – Shwane 4:55
Hɔgbaa
Leebi 9:20 – Shwane 4:00
[Akrabatsa ni yɔɔ baafa 5]
Jee Shishi Obɔi Gbɛjianɔtoo Kɛha Kpee Lɛ
• Too gbɛjianɔ jogbaŋŋ koni onyɛ oya kpee gbii lɛ fɛɛ.
• Bi onitsumɔtsɛ lɛ gbɛ bianɛ.
• Jee shishi obɔi shika ni he baahia bo kɛha kpee lɛ naa buamɔ.
• Okɛ niyenii kɛ nu aba daa gbi bɔni afee ni okashi he ni afeɔ kpee lɛ yɛ lɛ akɛ oyaahe niyenii loo nu.
• Too gbɛjianɔ koni oweku lɛ mlibii lɛ FƐƐ anyɛ aya kpee lɛ gbii etɛ lɛ fɛɛ.