Kaashashao Shi Yɛ Miishɛɛ Ni Ajieɔ Lɛ Kpo Lɛ Sɛɛdii Mli
1 “Kaatsi nii ni obaanyɛ otsu ŋmɛnɛ oto wɔ.” Mɛi pii le blemasane ni woɔ hewalɛ koni atsu nii amrɔ nɔŋŋ nɛɛ. Ákɛ wɔɔnyɛ wɔkɛ shishitoo mla nɛɛ ato wɔsɔɔmɔ lɛ he lɛ jeɔ kpo yɛ niiashikpamɔ ni nyiɛ sɛɛ nɛɛ mli.
2 Nyɛmi yoo ko kɛ wolo ha nuu ko ni ewo lɛ shi akɛ ebaaku esɛɛ eya eŋɔɔ. Trukaa ni nyɛmi yoo kroko tee shia nɛɛ mli ŋmɛlɛtswaa kome sɛɛ. Nuu lɛ hiɛ wolo lɛ kɛba shinaa lɛ naa ni ekɛɛ lɛ akɛ: “Okɛɛ obaaku osɛɛ oba, shi misusuuu akɛ obaaba oya nakai, shi ba mli, mifee klalo kɛha minikasemɔ.”
3 Yɛ be mli ni sɛɛsaramɔ oya nɛɛ jeee nɔ ni afɔɔ feemɔ lɛ, niiashikpamɔ nɛɛ maa bɔ ni ehe hiaa ni adi miishɛɛ ni anaa yɛ wɔsɔɔmɔ lɛ mli lɛ sɛɛ oya ni akashashao shi lɛ nɔ mi. Wɔkɛ Buu-Mɔɔ lɛ shɛɛ baaha yɛ May mli. Wolo tɛtrɛɛ nɛɛ he yɛ sɛɛnamɔ diɛŋtsɛ yɛ gbɔmɛi ni ehɛleɔ amɛ shi kɛyaa jeŋ saji ahe, wekukpaa ni ka gbɔmɔ kɛ ebɔlɔ lɛ teŋ ni ehaa eyaa hiɛ kɛ wɔhiɛnɔkamɔ kɛhaa wɔsɛɛ be ni ewajeɔ lɛ lɛ mli. Jeŋ saji haa efeɔ faŋŋ akɛ wolo nɛɛ, ni tsɔɔ Kristofoi a-Hela Ŋmalɛi alɛ amli naagbee wolo lɛ mli lɛ yɛ ehee tamɔ ŋmɛnɛ adafitswaa wolo, radio kɛ television nɔ amaniɛbɔɔ ni kɔɔ jeŋ saji ahe ni saa adesai fɛɛ ashihilɛ he lɛ.
4 Yelikɛbuamɔ Babaoo He Miihia Gbɔmɛi Lɛ: Bɔni afee ni wɔye wɔbua gbɔmɛi ni amɛnu saji ni yɔɔ Buu-Mɔɔ lɛ mli lɛ shishi ni amɛyoo akɛ ekɔɔ amɛwala kɛ wɔsɛɛ be shishilɛ he lɛ, ehe miihia ni wɔto sɛɛsaramɔ he gbɛjianɔ, titri lɛ be ni atee jɛmɛ klɛŋklɛŋ kwraa lɛ sɛɛ gbii fioo ko, titri lɛ he ni ahe wolo tɛtrɛɛ ko yɛ aloo ajie miishɛɛ kpo lɛ. Mɛɛ gbɛ nɔ wɔɔtsɔ wɔfee enɛ yɛ? Ekolɛ eeenyɛ efee akɛ ni oooha gbɔmɔ lɛ ale akɛ oooku osɛɛ oba eŋɔɔ kɛha sanegbaa lolo lɛ kɛkɛ baaye abua.
5 Saamɔ Gbɛ Oha Sɛɛsramɔ Lɛ: Ebɛ mlɛo yɛ ŋmɛnɛ je nɛɛ mli akɛ oooto be oha ohe ni oye nɔ, ni ekolɛ shiatsɛ lɛ kaiŋ koni eye be lɛ nɔ. Kɛlɛ, kɛ okadi be kɛha sɛɛsaramɔ nɛɛ jogbaŋŋ ni onyɛ oye nɔ—yɛ gbii fioo ko sɛɛ kɛ aaahi lɛ—belɛ ootsu be ni oto lɛ he gbɛnaa nii he nii kɛ hiɛdɔɔ. Kɛ mɔ lɛ bɛ shia lɛ, bɔɔ mɔdɛŋ ni onine ashɛ enɔ. Ekolɛ eeewo lɛ hewalɛ ni ebu osaramɔ lɛ akɛ hiɛdɔɔ sane kɛ ena bo ni otswa ofai shi akɛ onine aaashɛ enɔ yɛ shia lɛ.
6 Akɛni wɔnyɛŋ wɔna nɔmimaa yɛ miishɛɛ ni mɔ lɛ jieɔ lɛ kpo yɛ be mli ni wɔtee jɛmɛ klɛŋklɛŋ kwraa lɛ he hewɔ lɛ, kadimɔ ni oku osɛɛ oya jɛmɛ kɛ etamɔ nɔ ni miishɛɛ fioo ko pɛ ejeɔ lɛ kpo. Sɛɛnamɔ yɛ he akɛ ooodi miishɛɛ ni tamɔ nɛkɛ sɛɛ ni shishashaomɔ ko bɛ mli ekolɛ okanya mɔ lɛ miishɛɛ yɛ Buu-Mɔɔ lɛ mli, ni kɛ oku osɛɛ lɛ ekolɛ onaa baakpɛ ohe yɛ bɔ ni eeehere bo fɛfɛo eha lɛ he. No hewɔ lɛ bɔɔ mɔdɛŋ ni odi miishɛɛ lɛ sɛɛ ni shishashaomɔ ko bɛ mli!