Ani Ofeɔ Biblia Mli Nikasemɔ He Nɔkwɛmɔnɔ Kɛ́ Otee Mɔ ko Ŋɔɔ Klɛŋklɛŋ Kwraa?

Kɛ́ wɔkɛɛ shiatsɛmɛi akɛ wɔbaasumɔ ni wɔkɛ amɛ akase Biblia lɛ, amɛteŋ mɛi komɛi kɛɔ akɛ amɛbɛ he miishɛɛ loo ákɛ, amɛ hu amɛkaseɔ Biblia lɛ yɛ amɛsɔlemɔi lɛ amli. Akɛni ekolɛ amɛleee akɛ bɔ ni wɔkɛ mɛi kaseɔ Biblia lɛ yɛ srɔto kwraa yɛ bɔ ni amɛfeɔ lɛ yɛ amɛsɔlemɔi lɛ amli hewɔ lɛ, amɛleee akɛ bɔ ni wɔfeɔ lɛ wɔhaa lɛ baaha amɛle nibii babaoo ni ebaaha amɛná miishɛɛ jogbaŋŋ. No hewɔ lɛ, yɛ nɔ najiaŋ ni oookɛɛ mɔ lɛ kɛkɛ akɛ obaasumɔ ni okɛ lɛ akase Biblia lɛ, mɛni hewɔ oŋɔɔɔ be fioo ni okɛfee bɔ ni wɔkɛ mɛi kaseɔ Biblia lɛ wɔhaa lɛ he nɔkwɛmɔnɔ kɛ́ otee mɔ lɛ ŋɔɔ klɛŋklɛŋ kwraa lɛ? Ákɛ nɔkwɛmɔnɔ lɛ: Kaakɛɛ mɔ ko kɛkɛ akɛ ole nihoomɔ jogbaŋŋ, ni ohiɛ niyenii ko ni ŋɔɔ waa, no hewɔ lɛ ooya ni oba ni obaha lɛ eko; yɛ no najiaŋ lɛ, ha lɛ niyenii lɛ eko ni esa enaa yɛ jɛmɛ nɔŋŋ! Naa bɔ ni obaanyɛ okɛ minitii fioo afee enɛ lɛ he nɔkwɛmɔnɔ beni okɛ gbɛtsɔɔmɔi ni yɔɔ March 2006 Wɔ Maŋtsɛyeli Sɔɔmɔ lɛ baafa 6 lɛ mli lɛ ateŋ ekome tsuɔ nii lɛ:

“Ani osusuɔ akɛ gbi ko baaba ni wiemɔi nɛɛ baaba mli anɔkwale? [Kanemɔ Yesaia 33:24 lɛ, ni oŋmɛ lɛ gbɛ ni eha hetoo.] Ha ni mikɛ nɔ ko ni obaaná he miishɛɛ jogbaŋŋ atsɔɔ bo yɛ sane nɛɛ he.” Ha lɛ Biblia Tsɔɔ wolo lɛ eko, ni oha egbele baafa 36, ni okɛ lɛ asusu kuku 22 lɛ he. Kanemɔ sanebimɔ ni yɔɔ baafa lɛ shishigbɛ lɛ, ni okɛɛ lɛ akɛ ekwɛ akɛ ebaana hetoo lɛ lo beni okaneɔ kuku lɛ mli lɛ. No sɛɛ lɛ, bi sane lɛ ekoŋŋ ni obo nɔ ni eyɔɔ kɛɛmɔ lɛ toi. Okɛ lɛ akane ŋmalɛi krokomɛi ni yɔɔ jɛmɛ lɛ ateŋ ekome. Shi sanebimɔ ko oha lɛ koni kɛ́ oku osɛɛ otee lɛ oyaha lɛ hetoo, ni oto gbɛjianɔ ni oku osɛɛ oya lɛɛlɛŋ. Kɛji ofee enɛ lɛ, oje Biblia mli nikasemɔ shishi nɔŋŋ ji no!