Nikasemɔi Ashishijee yɛ Taoɔ Wolo Bibioo lɛ Mli
1 Amaniɛbɔi ni nine shɛɔ nɔ kɛjɛɔ je lɛŋ fɛɛ lɛ tsɔɔ akɛ, Mɛni Nyɔŋmɔ Taoɔ yɛ Wɔdɛŋ? wolo bibioo lɛ ji dɛŋdade ni yɔɔ hewalɛ waa ni akɛtsɔɔ gbɔmɛi anɔkwale lɛ he nii. Ajeɔ Biblia nikasemɔi akpekpei abɔ shishi daa otsi yɛ nɛkɛ wolo bibioo nɛɛ mli. Ani oyeɔ omanye kɛ́ okɛ Taoɔ wolo bibioo lɛ je Biblia mli nikasemɔ shishi ni okɛmiifee hu?
2 Eyɛ mli akɛ mɛi komɛi naa akɛ wolo bibioo lɛ kɛhamɔ yɛ mlɛo moŋ, shi ewa kɛha mɛi komɛi yɛ nɔ ni amɛaakɛɛ koni amɛkɛje nikasemɔ shishi lɛ mli. Mɛɛ gbɛ̀i mɛi komɛi ena akɛ ekɛ nitsumɔ mɔɔ shi yɛ Biblia mli nikasemɔi ashishijee mli, kɛji akɛ Taoɔ wolo lɛ miitsu nii lɛ? Ŋaawoi ni nyiɛ sɛɛ lɛ baanyɛ aye abua.
3 Kɛɛmɔ akɛ Obaafee Nikasemɔ lɛ He Nɔkwɛmɔnɔ Otsɔɔ: Kɛ otee jɛmɛ klɛŋklɛŋ kwraa aloo sɛɛsramɔ lɛ, yɛ nɔ najiaŋ ni ooobi shiatsɛ lɛ koni eha okɛ lɛ afee Biblia mli nikasemɔ lɛ, wɔbaanyɛ wɔfee bɔ ni wɔbaafee Biblia mli nikasemɔ lɛ wɔha lɛ he nɔkwɛmɔnɔ wɔtsɔɔ. Enɛ baajie gbeyeishemɔ kɛ yeyeeyefeemɔ ni shiatsɛmɛi pii hiɛ yɛ “nikasemɔ” he lɛ kɛya. Kɛ wɔná wɔkase bɔ ni wɔɔfee he nɔkwɛmɔnɔ wɔha lɛ, wɔbaanyɛ wɔna akɛ, wɔbaanyɛ wɔkɛ hiɛkpamɔ wiemɔ ni yɔɔ kuku aje nikasemɔ lɛ shishi nɔŋŋ.
4 Hesaa Ji Oti: Ekãa ni wɔɔná kɛha Biblia mli nikasemɔi ashishijee lɛ kɔɔ bɔ ni wɔ́saa wɔhe jogbaŋŋ wɔha lɛ he waa. Hiɛ ní wɔɔtsɔ wɔsaa wɔhe lɛ baaye ebua wɔ koni wɔdamɔ shishashaomɔ fɛɛ ni aaaba yɛ wɔhe ni wɔkɛaawo Biblia mli nikasemɔ nitsumɔ lɛ mli lɛ naa. Kɛ wɔfee bɔ ni wɔɔwie wɔha lɛ he nɔkwɛmɔnɔ shii abɔ lɛ, ebaaha ni efee tamɔ sanegbaa, ni ebaaha wɔwie kɛjɛ wɔjwɛŋmɔ mli, yɛ wɔ diɛŋtsɛ wɔwiemɔi amli. Jeee akɛ enɛ baaye ebua wɔ koni wɔfee tswaa kɛkɛ, shi moŋ ebaaha shiatsɛ lɛ hu mii ashɛ ehe.
5 Kɛ́ oosaa ohe lɛ, ebaaye ebua bo kɛji oto be oha ohe bɔni afee ni onyɛ otsɔɔ shiatsɛ lɛ bei abɔ ni nikasemɔ he nɔkwɛmɔnɔ feemɔ lɛ baahe. Beni nyɛminuu ko ejie ehe shi etsɔɔ sɛɛ lɛ ekɛɛ akɛ: “Miba koni matsɔɔ bo bɔ ni wɔ Biblia mli nikasemɔ ni afeɔ ni aheee nɔ ko lɛ he gbɛjianɔtoo lɛ yɔɔ. Eheɔ aaafee minitii enumɔ kɛfeɔ ehe nɔkwɛmnɔ. Ani oyɛ minitii enumɔ?” Abaanyɛ akɛ aaafee minitii enumɔ afee Nikasemɔ 1 ni yɔɔ Taoɔ wolo bibioo lɛ mli lɛ he nɔkwɛmɔnɔ. Shi ŋmalɛi ni ahala pɛ abaanyɛ akane yɛ nɛkɛ be falɛ nɛɛ mli, shi kɛ anyɛ agbe klɛŋklɛŋ nikasemɔ lɛ naa yɛ minitii fioo ko mli lɛ, ebaaha shiatsɛ lɛ ana bɔ ni eklɛŋklɛŋ nikasemɔ lɛ tee nɔ eha. Koni agbɛnɛ oha ele akɛ, kɛ oku osɛɛ ní okɛ lɛ abakase Nikasemɔ 2 lɛ, obaaye miitii 15 pɛ.
6 Ana akɛ Shiɛmɔ Wiemɔi ni Nyiɛ Sɛɛ Nɛɛ Sa Jogbaŋŋ: “Miisumɔ ni mafee shia Biblia mli nikasemɔ ni yɔɔ mlɛo shi kɛlɛ eyɔɔ oya lɛ he nɔkwɛmɔnɔ matsɔɔ bo yɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ mli. Mɛi pii ena akɛ amɛbaanyɛ amɛkɛ aaafee minitii 15 pɛ yɛ otsi lɛ mli ana Ŋmalɛ naa sanehetooi ni nyɔɔ mɔ tsui mli kɛha nɛkɛ Biblia mli sanebimɔi ni he hiaa nɛɛ.” Okɛ emli saji ni aŋmala lɛ atsɔɔ lɛ kuku. Kɛ ogbele kɛtee Nikasemɔ 1 lɛ mli lɛ, kɛɛmɔ akɛ: “Kɛ obaanyɛ oha wɔ minitii aaafee enumɔ lɛ, no lɛ, wɔbaasumɔ ni wɔtsɔɔ bo bɔ ni afeɔ enɛ ahaa. Nikasemɔ 1 lɛ yitso ji ‘Bɔ ni Ooofee Ona Nɔ ni Nyɔŋmɔ Taoɔ.’” No sɛɛ lɛ, kanemɔ sanebimɔi etɛ lɛ, ni otsɔɔ nɔmbai ni yɔɔ akrabatsai lɛ amli lɛ mli. Kanemɔ kuku 1 lɛ, ni otsɔɔ shiatsɛ lɛ bɔ ni eeefee ena hetoo lɛ. Obaanyɛ oha shiatsɛ lɛ akane kuku 2 lɛ. Koni okɛɛ akɛ: “Yɛ sane nɛɛ naa lɛ, te obaaha sanebimɔ nɛɛ hetoo oha tɛŋŋ? [Kanemɔ sanebimɔ lɛ ekoŋŋ, ni oha shiatsɛ lɛ aha hetoo.] Obaana akɛ ŋmalɛi fata kuku lɛ eko fɛɛ eko he. Enɛ gbalaa wɔjwɛŋmɔ kɛyaa hetoo ni Biblia lɛ kɛhaa yɛ sanebimɔi nɛɛ ahe. Ákɛ nɔkwɛmɔnɔ lɛ, ha wɔkane 2 Timoteo 3:16, 17 ni okwɛ akɛ efiɔ sane hetoo ni okɛha ni kɔɔ mɔ ni ŋma Biblia lɛ he lo.” Beni akane kuku 3 lɛ sɛɛ lɛ, kɛ aasusu sanebimɔ lɛ he, ni akane Yohane 17:3 lɛ, gbalamɔ shiatsɛ lɛ jwɛŋmɔ kɛya nilee ni ená yɛ Nikasemɔ 1 lɛ mlitii ni nyɛfee lɛ mli lɛ nɔ. Kɛ nyɛshɛ biɛ lɛ, nyɛbaanyɛ nyɛgbele kɛya Nikasemɔ 2 lɛ nɔ, ni nyɛkane naagbee sanebimɔ lɛ, “Mɛɛ gbɛ̀i srɔtoi enyɔ yɔɔ ni wɔɔtsɔ nɔ wɔkase Nyɔŋmɔ he nii?” Koni obi akɛ: “Mɛɛ be obaaná aaafee minitii 15 koni wɔkɛkase Nikasemɔ 2 lɛ, ni wɔkɛná hetoo lɛ?”
7 Ehe miihia ni oha wiemɔ lɛ afee mlɛo, ni ojie shiatsɛ lɛ yi be fɛɛ be ni aaahi. Kɛ ooto gbɛjianɔ kɛha saramɔ kroko lɛ, yɛ nɔ najiaŋ ni ooobi lɛ akɛ eesumɔ ni etsa nɔ lo lɛ, wo lɛ hewalɛ moŋ koni efee nakai nɔŋŋ kɛha nikasemɔ ni baatsa nɔ lɛ. Ha ni ele akɛ, obaaku osɛɛ oba ekoŋŋ. Shiɛlɔi komɛi ebi koni kɛ be he gbɛjianɔtoo lɛ eyahiii lɛ, ni amɛkase nii lɛ yɛ tɛlifoŋ lɛ nɔ. Ekolɛ obaanyɛ owo nikaselɔ lɛ hewalɛ, koni ekɛ wolo bibioo lɛ afɔ̃ he ko ni yɔɔ shweshweeshwe, bɔni afee ni enine ashɛ nɔ oya kɛha saramɔ ni baanyiɛ sɛɛ lɛ.
8 Tswaa Ofai Shi: Eyɛ mli akɛ oti ni haa ayeɔ omanye lɛ ji hesaamɔ moŋ, shi esa akɛ wɔtswa wɔfai shi ni wɔtsu he nii. Akɛni minitii fioo ni akɛaatsɔɔ nikasemɔ kome he nii lɛ baanyɛ afee kaa hewɔ lɛ, tswaa ofai shi ni okase shiɛmɔ wiemɔ lɛ bɔ ni obaanyɛ shii abɔ, bɔni afee ni onaa atse yɛ be mli ni ofeɔ he nɔkwɛmɔnɔ otsɔɔ lɛ. Bɔɔ mɔdɛŋ ni ofee nikasemɔ lɛ he nɔkwɛmɔnɔ otsɔɔ mɔ fɛɛ mɔ ni okɛkpeɔ yɛ shia mli, yɛ trukaa odaseyeli mli, kɛ agbɛnɛ hu yɛ tɛlifoŋ nɔ odaseyeli mli lɛ. Kɛ ooná naagba yɛ Biblia mli nikasemɔ shishijee mli lɛ, kaaha onijiaŋ miije wui. Ebiɔ faishitswaa kɛ anɔkwa shwelɛ ni ayɔɔ akɛ aaaha mɛi krokomɛi ale anɔkwale lɛ, dani anyɛɔ ajeɔ Biblia mli nikasemɔi ashishi.—Gal. 6:9.
9 Kɛ́ okɛ ŋaawoi nɛɛ tsu nii lɛ, no lɛ bo hu obaanyɛ oná hegbɛ koni oye obua mɔ ko ní enyiɛ wala gbɛ lɛ nɔ, kɛtsɔ Biblia mli nikasemɔ ni oooje shishi, ni ofee yɛ Taoɔ wolo bibioo lɛ mli lɛ nɔ.—Mat. 7:14.