Kaashashao Shi akɛ Oooshiɛ
1. Mɛni feemɔ biɔ ekãa, ni mɛni hewɔ?
1 Ani oshashao shi pɛŋ akɛ oooshiɛ yɛ skul akɛni oshe gbeyei akɛ abaaye ohe fɛo hewɔ? Ŋwanejee ko bɛ he akɛ ja ofee ekãa dani obaanyɛ ofã onaa, titri lɛ kɛ́ ohiɛ gboɔ. Mɛni baaye abua bo?
2. Mɛɛ gbɛ nɔ ebiɔ ni okɛ hiɛshikamɔ atsu nii kɛ́ ooye odase yɛ skul?
2 Okɛ Hiɛshikamɔ Atsu Nii: Eyɛ mli akɛ obaanyɛ okɛ oskul lɛ afee oshikpɔŋkuku moŋ, shi kaimɔ akɛ akpaaa gbɛ akɛ oshiɛ oha mɔ fɛɛ mɔ taakɛ obaafee kɛ́ ooshiɛ yɛ shĩa kɛ shĩa lɛ. Okɛ hiɛshikamɔ atsu nii kɛna be ni esa akɛ owie. (Jaj. 3:1, 7) Sane ko ni nyɛmiikase yɛ klas loo nifeemɔ ko ni aha nyɛ yɛ skul lɛ baanyɛ aha oná hegbɛ kɛwie ohemɔkɛyeli lɛ he. Aloo ekolɛ oskulnyo ko baabi bo nɔ hewɔ ni okɛ ohe wooo nifeemɔi komɛi amli lɛ. Kɛ́ aje skul afi hee shishi nɔŋŋ lɛ, Kristofoi komɛi haa amɛtsɔɔlɔi lɛ leɔ akɛ Yehowa Odasefoi ji amɛ, ni amɛhaa tsɔɔlɔi lɛ woji ni gbálaa wɔhemɔkɛyelii lɛ amli. Mɛi komɛi hu kɛ wɔwoji lɛ ekomɛi shwieɔ amɛkpɔlɔi anɔ bɔni afee ni skulbii lɛ abi he sane.
3. Mɛɛ gbɛ nɔ oootsɔ osaa ohe oto koni onyɛ oye odase yɛ skul?
3 Saamɔ Ohe Oto: Kɛ́ otsɔ hiɛ osaa ohe lɛ, no baaha oná ekãa babaoo. (1 Pet. 3:15) No hewɔ lɛ, bɔɔ mɔdɛŋ ni otsɔ hiɛ osusu saji ni amɛbaanyɛ amɛbibii lɛ ahe, ni ojwɛŋ bɔ ni ooofee oha hetoo lɛ he. (Abɛi 15:28) Kɛ́ eeehi lɛ, okɛ o-Biblia lɛ kɛ woji fioo komɛi tamɔ Reasoning wolo lɛ, Young People Ask woji lɛ, kɛ woji ni wieɔ adebɔɔ he aya skul daa, koni onyɛ okɛtsu nii kɛ́ ehe bahia. Kɛɛmɔ ofɔlɔi koni kɛ́ nyɛmiifee nyɛweku jamɔ lɛ, nyɛfee shihilɛi ni obaanyɛ okɛkpe yɛ skul lɛ ahe nɔkwɛmɔnii.
4. Mɛni hewɔ esa akɛ oya nɔ oye odase yɛ skul?
4 Ná Jwɛŋmɔ ni Ja: Kaasusu akɛ kɛ́ owieɔ anɔkwale lɛ he otsɔɔ mɛi ni okɛyaa skul lɛ, amɛbaaye ohe fɛo be fɛɛ be. Amɛteŋ mɛi komɛi baanyɛ aná ohe miishɛɛ yɛ ekãa ni ofeɔ lɛ hewɔ, ni ekolɛ amɛbaabo bo toi po. Shi kɛ́ mɔ ko mɔ ko booo bo toi lɛ, onijiaŋ akaje wui. Yehowa baaná omɔdɛŋbɔɔ lɛ he miishɛɛ. (Heb. 13:15, 16) Yaa nɔ obi lɛ ni eye ebua bo koni okɛ ‘ekãa pii ajaje ewiemɔ lɛ.’ (Bɔf. 4:29; 2 Tim. 1:7, 8) Ekã shi faŋŋ akɛ obaaná miishɛɛ waa kɛ́ mɔ ko bo bo toi. Ekolɛ sɛɛ mli lɛ, mɔ lɛ baatsɔ Yehowa tsulɔ po!