Too Gbɛjianɔ Bianɛ Koni Olɛɛ Osɔɔmɔ lɛ Mli
1. Mɛni sa kadimɔ waa yɛ Kaimɔ be lɛ he, ni te wɔɔfee tɛŋŋ wɔsaa wɔhe kɛha nakai be lɛ?
1 Wɔnáa hegbɛi hei ‘kɛdaa Yehowa shi babaoo’ yɛ Kaimɔ be lɛ mli daa afi. (Lala 109:30) Ani obaalɛɛ osɔɔmɔ lɛ mli yɛ March mli koni okɛtsɔɔ akɛ ohiɛ sɔɔ Mɔ ni kɛ kpɔmɔnɔ lɛ ha lɛ? Amrɔ nɛɛ ji be ni esa akɛ obɔi gbɛjianɔtoo.—Abɛi 21:5.
2. Beni atse ŋmɛlɛtswai kɛha gbɛgbalɔi awamɔ nitsumɔ lɛ nɔ nyɛsɛɛ afi lɛ yɛ April nyɔɔŋ lɛ mli lɛ, mɛni mɛi fee, ni bo hu mɛni ofee?
2 Gbɛgbalɔi Awamɔ Nitsumɔ: Nyɛsɛɛ afi lɛ, beni asafoi lɛ ná amɛle akɛ atse ŋmɛlɛtswai ni akɛtsuɔ gbɛgbalɔi awamɔ nitsumɔ lɛ nɔ yɛ April mli lɛ, amɛná miishɛɛ waa. Nyɛmi nuu ko ŋma akɛ: “Miyɛ sɛkɛndre skul lolo, ni minyɛko mikɛ mihe awo daa gbɛgbamɔ nitsumɔ lɛ mli. Shi yɛ April mli lɛ, maŋma akɛ mikɛ ŋmɛlɛtswai 30 baatsu gbɛgbalɔi awamɔ nitsumɔ lɛ, ni kɛlɛ mabɔ mɔdɛŋ maná ŋmɛlɛtswai 50.” Nyɛmi yoo ko ni kɛ ebe fɛɛ tsuɔ heloonaa nitsumɔ lɛ ŋma akɛ: “Ŋmɛlɛtswai 30—manyɛ maná aahu!” Beni atswa enɛ he adafi lɛ, nyɛmi yoo ko ni tsutsu ko lɛ eji gbɛgbalɔ, ni amrɔ nɛɛ eye fe afii 80 lɛ kɛɛ akɛ: “Mikpa nɔ ko tamɔ nɛkɛ gbɛ aahu! Yehowa le akɛ gbɛgbamɔ nitsumɔ lɛ ha miná miishɛɛ waa yɛ mishihilɛ mli!” Mɛi krokomɛi ni nyɛɛɛ atsu gbɛgbalɔi awamɔ nitsumɔ lɛ bɔ mɔdɛŋ amɛtsu babaoo fe tsutsu lɛ.
3. Mɛɛ yiŋtoi ahewɔ esa akɛ wɔbɔ mɔdɛŋ wɔkɛ wɔhe awo gbɛgbalɔi awamɔ nitsumɔ lɛ mli yɛ March, April, kɛ May mli lɛ?
3 March baafee nyɔɔŋ ni hi jogbaŋŋ ni wɔbaanyɛ wɔkɛtsu gbɛgbalɔi awamɔ nitsumɔ lɛ, ejaakɛ wɔbaaná hegbɛ ekoŋŋ koni wɔkɛ ŋmɛlɛtswai 30 loo 50 atsu gbɛgbamɔ nitsumɔ lɛ. Kɛfata he lɛ, kɛjɛ Hɔɔ, March 17 lɛ nɔ kɛyaa lɛ, wɔbaafã ta krɛdɛɛ ko kɛfɔ̃ mɛi anine koni amɛbafata wɔhe kɛye Kaimɔ lɛ yɛ April 5. Mɛi ni baalɛɛ amɛsɔɔmɔ nitsumɔ lɛ mli lɛ ateŋ mɛi babaoo baaná miishɛɛ aahu akɛ amɛbaasumɔ ni amɛkɛ ŋmɛlɛtswai 50 ni ataoɔ lɛ atsu gbɛgbalɔi awamɔ nitsumɔ lɛ yɛ April kɛ May hu.
4. Te wɔɔfee tɛŋŋ wɔlɛɛ wɔsɔɔmɔ lɛ mli, ni mɛni baajɛ mli kɛba?
4 Mɛni hewɔ nyɛsusuuu bɔ ni nyɛweku lɛ mli bii lɛ ateŋ mɔ fɛɛ mɔ baafee elɛɛ esɔɔmɔ lɛ mli yɛ Kaimɔ be lɛ mli lɛ he yɛ gbɛkɛ Weku Jamɔ ni nyɛbaafee kɛnyiɛ sɛɛ lɛ mli? (Abɛi 15:22) Sɔlemɔ obi Yehowa koni ejɔɔ omɔdɛŋbɔi lɛ anɔ. (1 Yoh. 3:22) Kɛ́ olɛɛ osɔɔmɔ lɛ mli lɛ, no baaha ojie Yehowa yi babaoo, ni obaaná miishɛɛ waa hu.—2 Kor. 9:6.