Hã Afi Nɛɛ Kaimɔ Be lɛ Afee Miishɛɛ nɔ Ahã Bo!
1. Mɛni ji gbɛ kome ni wɔbaatsɔ nɔ wɔhã wɔmiishɛɛ lɛ ateke nɔ yɛ afi nɛɛ Kaimɔ be lɛ mli?
1 Ani obaasumɔ ni omiishɛɛ lɛ ateke nɔ yɛ March, April, kɛ May mli? Gbɛ kome ni obaatsɔ nɔ ofee nakai ji, ni olɛɛ osɔɔmɔ lɛ mli, kɛ́ eeehi lɛ ni okɛ ohe awo gbɛgbalɔi awamɔ nitsumɔ lɛ mli. Mɛɛ gbɛ nɔ enɛ baahã omiishɛɛ lɛ ateke nɔ?
2. Kɛ́ wɔlɛɛ wɔsɔɔmɔ lɛ mli lɛ, mɛɛ gbɛ nɔ ehãa wɔmiishɛɛ lɛ tekeɔ nɔ?
2 Hã Omiishɛɛ lɛ Ateke Nɔ: Wɔnáa miishɛɛ ni wɔtsui nyɔɔ wɔmli kɛ́ wɔtsu mumɔŋ hiamɔ nii ni akɛfɔ wɔ lɛ he nii kɛtsɔ Yehowa ni wɔɔja lɛ lɛ nɔ, ejaakɛ nakai Yehowa bɔ wɔ ni wɔfee. (Mat. 5:3) Agbɛnɛ hu, bɔ ni ebɔ wɔ ehã lɛ hewɔ lɛ, kɛ́ wɔhã mɛi nii lɛ wɔnáa miishɛɛ. (Bɔf. 20:35) Shiɛmɔ nitsumɔ lɛ hãa wɔfeɔ nibii enyɔ nɛɛ fɛɛ; wɔnáa hegbɛ wɔjaa Nyɔŋmɔ ni wɔyeɔ wɔbuaa mɛi hu. No hewɔ lɛ, nilee yɛ mli akɛ aaawie akɛ kɛ́ wɔkɛ wɔhe wo shiɛmɔ nitsumɔ lɛ mli babaoo lɛ, ehãa wɔmiishɛɛ lɛ tekeɔ nɔ. Kɛfata he lɛ, babaoo ni wɔshiɛɔ lɛ, babaoo ni wɔhe saa yɛ mli ji no. Be ni wɔhe saa lɛ, wɔnáa ekãa ni ŋmiŋmi mɔɔɔ wɔ tsɔ. Wɔbaaná hegbɛi babaoo kɛye mɛi odase ni wɔje Biblia mli nikasemɔi ashishi. Enɛɛmɛi fɛɛ hãa shiɛmɔ nitsumɔ lɛ ŋɔɔ waa.
3. Mɛni hewɔ March kɛ April baafee nyɔji ni sa waa kɛhã gbɛgbalɔi awamɔ nitsumɔ lɛ?
3 March kɛ April baafee nyɔji ni sa waa kɛhã gbɛgbalɔi awamɔ nitsumɔ lɛ ejaakɛ wɔbaanyɛ wɔhala akɛ wɔbaahã ŋmɛlɛtswai 30 loo 50. Agbɛnɛ hu, kɛjɛ Hɔɔ, March 22 lɛ nɔ aahu kɛyashi Kaimɔ gbi lɛ ni gbeɔ Ju, April 14 lɛ nɔ lɛ, wɔbaafã ta ko ni yɔɔ miishɛɛ ni wɔkɛfɔ̃ mɛi anine kɛba Kaimɔ lɛ shishi. Asafoi lɛ amli baayi kɛ miishɛɛ, ejaakɛ nyɛmimɛi babaoo baafee “ekome” kɛtsu nii yɛ amɛshikpɔŋkukuji lɛ amli dani kaimɔ be lɛ ashɛ.—Zef. 3:9.
4. Kɛ́ wɔmiisumɔ ni wɔkɛ wɔhe awo gbɛgbalɔi awamɔ nitsumɔ lɛ mli lɛ, mɛni esa akɛ wɔfee?
4 Too Gbɛjianɔ Bianɛ: Kɛ́ ofeko nakai lɛ, kwɛmɔ bɔ ni oto obe he gbɛjianɔ lɛ ekoŋŋ ni okwɛ akɛ ani obaanyɛ olɛɛ osɔɔmɔ lɛ mli yɛ nyɔji ni awie he nɛɛ ateŋ ekome loo nɔ ni fe nakai mli lo? Sɔlemɔ yɛ he. (Yak. 1:5) Okɛ owekumɛi kɛ mɛi krokomɛi ni yɔɔ asafo lɛ mli lɛ agba he sane. (Abɛi 15:22) Obaana akɛ yɛ gbɔmɔtsoŋ naagbai ni okɛkpeɔ loo dekã ni obɛ yɛ nitsumɔ mli lɛ fɛɛ sɛɛ lɛ, bo hu obaanyɛ oná miishɛɛ ni jɛɔ gbɛgbalɔi awamɔ nitsumɔ lɛ mli kɛbaa lɛ eko.
5. Kɛ́ wɔlɛɛ wɔsɔɔmɔ lɛ mli yɛ afi nɛɛ Kaimɔ be lɛ mli lɛ, mɛni baajɛ mli kɛba?
5 Yehowa miisumɔ ni ewebii lɛ amii ashɛ amɛhe. (Lala 32:11) Kɛ́ wɔmia wɔhiɛ ni wɔlɛɛ wɔsɔɔmɔ lɛ mli yɛ afi nɛɛ Kaimɔ be lɛ mli lɛ, wɔmiishɛɛ lɛ baateke nɔ ni wɔŋwɛi Tsɛ lɛ hu tsui baanyɔ emli.—Abɛi 23:24; 27:11.