Ani Okɛ Ohe Baawo Gbɛgbalɔi Awamɔ Nitsumɔ lɛ Mli?
1. Mɛni hewɔ Kaimɔ be lɛ ji be ni hi jogbaŋŋ ni wɔkɛaalɛɛ wɔsɔɔmɔ lɛ mli lɛ?
1 Kaimɔ be lɛ ji be ko ni hi jogbaŋŋ ni wɔkɛaalɛɛ wɔsɔɔmɔ lɛ mli. Eji be ni wɔkɛsusuɔ suɔmɔ kpele ni Yehowa jie lɛ kpo kɛtsɔ e-Bi lɛ ni ekɛha akɛ kpɔmɔnɔ lɛ nɔ. (Yoh. 3:16) Wɔhiɛ sɔɔ nɔ ni Yehowa efee eha wɔ lɛ waa, ni enɛ haa wɔnáa shwelɛ ni mli wa akɛ wɔɔgba mɛi krokomɛi Yehowa he sane kɛ nɔ ni efeɔ ehaa adesai lɛ. (Yes. 12:4, 5; Luka 6:45) Eji be ko hu ni wɔnáa hegbɛ kɛfãa ta krɛdɛɛ kɛfɔ̃ɔ mɛi ni wɔle kɛ mɛi ni yɔɔ shikpɔŋkuku lɛ mli lɛ nine koni amɛkɛ wɔ abaye Kaimɔ lɛ. No sɛɛ lɛ, wɔbɔɔ mɔdɛŋ ní wɔha miishɛɛ ni mɛi ni ba Kaimɔ lɛ ná lɛ aya hiɛ. Ani okɛ ohe baawo gbɛgbalɔi awamɔ nitsumɔ lɛ mli yɛ March, April, loo May mli, koni okɛlɛɛ osɔɔmɔ lɛ mli?
2. Mɛni haa March bafeɔ nyɔɔŋ ko ni hi jogbaŋŋ kɛha gbɛgbalɔi awamɔ nitsumɔ lɛ?
2 Ha March Afee Nyɔɔŋ Krɛdɛɛ Ko: March baafee nyɔɔŋ krɛdɛɛ ko ni hi jogbaŋŋ kɛha gbɛgbalɔi awamɔ nitsumɔ lɛ. Mɛi ni kɛ amɛhe baawo mli lɛ baanyɛ ahala akɛ amɛbaaha ŋmɛlɛtswai 30 loo 50. Kɛ́ kpokpaa nɔkwɛlɔ lɛ basara nyɛ yɛ March mli lɛ, gbɛgbalɔi awalɔi lɛ baanyɛ amɛfata daa gbɛgbalɔi kɛ gbɛgbalɔi krɛdɛɛi lɛ ahe kɛfee kpee ni kpokpaa nɔkwɛlɔ lɛ kɛ amɛbaafee lɛ fɛɛ kɛgbe naa. Aha be ni akɛbaafã ta kɛfɔ̃ mɛi anine kɛba Kaimɔ ni abaafee Jufɔ, March 26, 2013 lɛ efa fe be ni akɛjeɔ shishi yɛ afii ni eho lɛ amli lɛ, ni abaaje shishi March 1. Kɛfata he lɛ, ayɛ otsii anaagbee enumɔ sɔŋŋ yɛ March mli. No hewɔ lɛ, mɛni hewɔ okɛ hiɛdɔɔ susuuu he okwɛɛɛ akɛ obaanyɛ okɛ ohe awo mli koni nyɔɔŋ nɛɛ afee nyɔɔŋ krɛdɛɛ ko kɛha bo yɛ afi lɛ mli?
3. Te wɔɔfee tɛŋŋ wɔto gbɛjianɔ koni wɔlɛɛ wɔsɔɔmɔ nitsumɔ lɛ mli lɛ?
3 Too Gbɛjianɔ Bianɛ: Amrɔ nɛɛ ji be ni esa akɛ opɛi ogbɛjianɔtoo mli kɛkwɛ tsakemɔi ni ebaabi ni ofee bɔni afee ni okɛ ohe awo gbɛgbamɔ nitsumɔ lɛ mli. Ehe baahia ni weku lɛ afee ekome, no hewɔ lɛ nyɛŋɔa nyɛgbɛkɛ Weku Jamɔ be lɛ eko kɛsusua otii ni nyɛkɛmamɔ nyɛhiɛ lɛ ahe koni nyɛto gbɛjianɔ. (Abɛi 15:22) Kɛ onyɛɛɛ okɛ ohe awo gbɛgbalɔi awamɔ nitsumɔ lɛ mli lɛ, kaaha onijiaŋ je wui. Ani obaanyɛ oto obe he gbɛjianɔ koni otsɛ yɛ shiɛmɔ mli? Ani obaanyɛ okɛ gbi kroko ofata gbii ni okɛyaa shiɛmɔ lɛ he?
4. Mɛɛ sɛɛ wɔbaaná kɛ́ wɔlɛɛ wɔsɔɔmɔ lɛ mli yɛ March, April, kɛ May?
4 Kɛ́ wɔlɛɛ wɔsɔɔmɔ lɛ mli yɛ March, April, kɛ May mli lɛ, wɔbaaha wɔmii ni shɛɔ wɔhe kɛ wɔtsui ni nyɔɔ wɔmli yɛ Yehowa sɔɔmɔ kɛ mɛi krokomɛi ni wɔshiɛɔ wɔhaa lɛ mli lɛ ada. (Yoh. 4:34; Bɔf. 20:35) Nɔ ni fe fɛɛ lɛ, mɔdɛŋ ni wɔbɔɔ ni wɔkɛ wɔhe ashã afɔle lɛ baaha Yehowa mii ashɛ ehe.—Abɛi 27:11.