Ani Oosaa Ohe Ooto Kaimɔ Lɛ?

Be ni shɛ afi 33 Ŋ.B. Nisan 13 lɛ, no mli lɛ eshwɛ gbi kome pɛ ni Yesu kɛ ekaselɔi lɛ baahi shi dani agbe lɛ. Ekɛ ekaselɔi lɛ baaye enaagbee Hehoo lɛ yɛ Nisan 14 lɛ nɔ, ni ebaato gbijurɔyeli hee ko ni ji Nuŋtsɔ lɛ Gbɛkɛ Niyeli lɛ shishi. Akɛni nifeemɔ nɛɛ he hiaa waa hewɔ lɛ, ekã shi faŋŋ akɛ esa akɛ amɛsaa amɛhe amɛto. No hewɔ lɛ, Yesu tsu Petro kɛ Yohane koni amɛyasaa nibii amɛto gbi jurɔ lɛ. (Luka 22:7-13) Kɛjɛ no sɛɛ kɛbaa nɛɛ, daa afi lɛ, Kristofoi ni sumɔɔ ni amɛye Kaimɔ lɛ saa amɛhe amɛtoɔ nifeemɔ nɛɛ. (Luka 22:19) Mɛɛ nibii sa akɛ wɔfee kɛsaa wɔhe wɔto Kaimɔ ni abaaye yɛ April 3 lɛ?

Nibii ni Sa akɛ Asafoŋ Onukpai Afee:

Nyɛtoa gbɛjianɔ koni afee yɛ Maŋtsɛyeli Asa lɛ nɔ loo he kroko ni sa. Esa akɛ aná sɛ̃i ni fa, kanei ni kpɛɔ jogbaŋŋ, ní jɛmɛ hu akadɔ. Nyɛtoa gbɛjianɔ koni atsɔ hiɛ asaa jɛmɛ falefale.
Nyɛhalaa wielɔ ni sa, sɛinɔtalɔ, kɛ nyɛmimɛi hii ni baasɔle koni akɛ aboloo kɛ wein lɛ ahã.
Kɛ́ asafo ko baafee enɔ kɛnyiɛ asafo kroko sɛɛ lɛ, esa akɛ amɛfee ekome kɛsusu be ni asafo fɛɛ asafo kɛbaaje enɔ lɛ shishi, hei ni abaatsɔ kɛbote mli kɛ hei ni abaatsɔ kɛje kpo, kɛ tsɔji ashimaamɔ he.
Nyɛhalaa mɛi ni baakwɛ shitaramɔ nɔ kɛ mɛi ni kɛ aboloo kɛ wein lɛ baahã, ní nyɛto amɛhe gbɛjianɔ jogbaŋŋ.
Nyɛtoa gbɛjianɔ koni nyɛná aboloo kɛ wein ni sa, plɛtei, wein glasei, kɛ okpɔlɔ kɛ enɔhaanɔ ni sa.

Nibii ni Sa akɛ Shiɛlɔi Afee:

Nyɛtoa gbɛjianɔ koni nyɛnyɛ nyɛja Kaimɔ lɛ he ninefɔɔ woji lɛ waa.
Nyɛŋmalaa nyɛwekumɛi, Biblia mli nikaselɔi, mɛi ni nyɛkɛyaa skul, mɛi ni nyɛkɛtsuɔ nii, kɛ mɛi krokomɛi ni nyɛle lɛ agbɛ́i nyɛshwiea shi, ni nyɛfɔ̃ amɛ nine.
Nyɛkanea ŋmalɛi ni ato kɛhã Kaimɔ be lɛ, ni nyɛjwɛŋa nɔ.
Nyɛbaa Kaimɔ lɛ shishi mra koni nyɛhere gbɔi ni baaba lɛ.