Bɔ ni Akɛ Namɛi Feɔ Yehowa Suɔmɔnaa Nii Ŋmɛnɛ?
Wolo lɛ Baatsu Nii Aha Wolo Hee ni Afee Koni Akɛye Abua Biblia Kaselɔi ní Amɛbale Asafo Lɛ
1. Mɛni ji yiŋtoi etɛ ahewɔ ni afee Yehowa Suɔmɔnaa Nii wolo bibioo lɛ?
1 Ani okɛ wolo hee bibioo ni ji Namɛi Feɔ Yehowa Suɔmɔnaa Nii Ŋmɛnɛ? lɛ ebɔi nitsumɔ? Yiŋtoo hewɔ ni afee ji (1) ní eye ebua Biblia kaselɔi lɛ ni amɛle mɛi ni wɔ ji, (2) ni eye ebua amɛ ni amɛle nibii ni wɔfeɔ lɛ ahe saji, kɛ (3) ni eha amɛle bɔ ni wɔgbɛjianɔtoo lɛ tsuɔ nii ehaa. Yehowa Suɔmɔnaa Nii wolo bibioo lɛ baafa fɛɛ baafa hiɛ nikasemɔ kome ni abaanyɛ akɛ minitii enumɔ kɛmiimɔ nyɔŋma akase fɛɛ yɛ shitamɔ kome pɛ mli.
2. Tsɔɔmɔ bɔ ni afee wolo bibioo nɛɛ kɛ bɔ ni ato emli saji lɛ ahe gbɛjianɔ aha.
2 Bɔ ni Afee lɛ Aha: Ajara wolo bibioo lɛ mli awo fãi etɛ mli, ni fã fɛɛ fã tsɔɔ nɔ ko srɔto yɛ Yehowa gbɛjianɔtoo lɛ he taakɛ atsɔɔ yɛ ŋwɛigbɛ lɛ. Nikasemɔi lɛ saneyitsei 28 ni yɔɔ mli lɛ eko fɛɛ eko ji sanebimɔ, ni saneyitsei bibii ni adiki mli ni nyiɛ sɛɛ lɛ eko fɛɛ eko haa nakai sanebimɔ lɛ hetoo. Akɛ mfonirii srɔtoi ni asha yɛ maji fe 50 anɔ ewo wolo lɛ mli fɛɛ, ni aŋmala hei ni asha mfonirii nɛɛ yɛ lɛ awo he koni no aha ale bɔ ni wɔnitsumɔ lɛ ekpele jeŋ fɛɛ eha. Nikasemɔi lɛ babaoo hiɛ akrabatsai ni ji “Taomɔ Nibii Krokomɛi Kɛfata He,” ni enɛ hiɛ ŋaawoi ni obaanyɛ owo onikaselɔ lɛ hewalɛ ni ekɛtsu nii.
3. Mɛɛ gbɛ nɔ wɔbaanyɛ wɔkɛ Yehowa Suɔmɔnaa Nii wolo bibioo lɛ atsu nii?
3 Bɔ ni Okɛbaatsu Nii Oha: Jee shishi kɛtsɔ sanebimɔ ni ji nikasemɔ lɛ saneyitso lɛ ni ooogbala ejwɛŋmɔ kɛya nɔ lɛ nɔ. No sɛɛ lɛ, maa saneyitsei bibii ni adiki mli lɛ nɔ mi beni nyɛkaneɔ mli lɛ. Naagbee lɛ, nyɛsusua sanebimɔi ni akɛtĩɔ mli ni yɔɔ baafa lɛ shishigbɛ lɛ ahe. Obaanyɛ okane nikasemɔ muu lɛ fɛɛ mli loo obaanyɛ okane fã fɛɛ fã ni nyɛsusu he. Okɛ sɛɛyoomɔ atsu nii kɛsusu ŋmalɛi ni atsɛ lɛ ateŋ nɔ ni obaakane lɛ he. Kaaha ohiɛ kpa nɔ koni nyɛsusu mfonirii lɛ kɛ akrabatsa ni ji “Taomɔ Nibii Krokomɛi Kɛfata He” lɛ he. Yɛ shihilɛi babaoo amli lɛ, esa akɛ afee nikasemɔi lɛ yɛ bɔ ni ato naa aha lɛ naa. Shi obaanyɛ ohala nikasemɔ kroko ni kɔɔ nɔ ko ni baanyɛ atee miishɛɛ shi amrɔ nɔŋŋ lɛ he, ní nyɛsusu he. Akɛ nɔkwɛmɔnɔ lɛ, kɛ́ abaafee kpokpaa nɔ kpee loo kpokpaa wulu nɔ kpee ko lɛ, obaanyɛ ogbele wolo lɛ kɛya nikasemɔ ni ji 11 lɛ.
4. Mɛni hewɔ oná miishɛɛ akɛ onine eshɛ dɛŋdade hee nɛɛ nɔ lɛ?
4 Kɛ́ wɔkɛ mɔ ko kase Biblia lɛ, wɔyeɔ wɔbuaa lɛ ni eleɔ wɔŋwɛi Tsɛ lɛ. Kɛlɛ, esa akɛ wɔtsɔɔ lɛ ni ele Yehowa gbɛjianɔtoo lɛ hu. (Abɛi 6:20) Kwɛ bɔ ni wɔmii shɛɔ wɔhe akɛ wɔnine eshɛ dɛŋdade ni haa enɛ feemɔ feɔ mlɛo kɛhaa wɔ lɛ nɔ!