Okɛ Sanekpakpa Wolo lɛ Atsu Nii Kɛtsɔɔ Mɛi Anii
1. Te afee Sanekpakpa wolo lɛ ahã tɛŋŋ?
1 Taakɛ atsɔɔ mli yɛ July Wɔ Maŋtsɛyeli Sɔɔmɔ lɛ mli lɛ, Sanekpakpa ni Jɛ Nyɔŋmɔ Ŋɔɔ! wolo lɛ ji dɛŋdadei ni he hiaa waa ni wɔkɛtsɔɔ mɛi nii lɛ ateŋ ekome. Aŋmalako ŋmalɛi ni atsɛ yisɛɛ lɛ amli wiemɔi lɛ bɔ ni afee ni shiatsɛmɛi lɛ akase nii kɛjɛ Biblia lɛ mli tɛ̃ɛ. Eyɛ mli akɛ afee woji ni wɔkɛ mɛi kaseɔ lɛ ateŋ babaoo bɔ ni mɔ diɛŋtsɛ baanyɛ akase moŋ, shi afee wolo nɛɛ bɔ ni baabi ni shiɛlɔi kɛ shiatsɛmɛi lɛ akase. No hewɔ lɛ, kɛ́ wɔkɛ wolo lɛ miihã mɔ ko lɛ, esa akɛ wɔbɔ mɔdɛŋ wɔfee bɔ ni akaseɔ wolo lɛ ahãa lɛ he nɔkwɛmɔnɔ wɔtsɔɔ shiatsɛ lɛ, koni ena bɔ ni kɛ́ mɔ ko ná ele sane kpakpa ni yɔɔ Biblia lɛ mli lɛ ehãa enáa miishɛɛ.—Mat. 13:44.
2. Mɛɛ gbɛ nɔ wɔbaanyɛ wɔkɛ Sanekpakpa wolo lɛ atsu nii be ni wɔtee mɔ ko ŋɔɔ klɛŋklɛŋ kwraa lɛ?
2 Be ni Otee Mɔ ko Ŋɔɔ Klɛŋklɛŋ Kwraa: Obaanyɛ okɛɛ akɛ: “Miba biɛ ejaakɛ mɛi susuɔ nɔ ni baaba adesai anɔ wɔsɛɛ lɛ he waa. Ani osusuɔ akɛ be ko baashɛ ni wɔshihilɛ baahi? [Ŋmɛɛ gbɛ ni ehã hetoo.] Sane kpakpa ni hãa mɔ náa hiɛnɔkamɔ yɛ Biblia lɛ mli. Náa sanebimɔi komɛi ni Biblia lɛ hãa hetoo.” Okɛ wolo lɛ ahã shiatsɛ lɛ, ni ohã etsɔɔ sanebimɔi ni yɔɔ wolo lɛ sɛɛ lɛ ateŋ nɔ ni ebaasumɔ ni ele hetoo lɛ. No sɛɛ lɛ, okɛ klɛŋklɛŋ kuku ni yɔɔ nakai nikasemɔ lɛ mli lɛ atsu nii kɛtsɔɔ lɛ bɔ ni wɔkɛ mɛi kaseɔ Biblia lɛ. Gbɛ kroko hu ji, ni obi shiatsɛ lɛ sane ko ni ohala yɛ wolo lɛ mli ni ebaaná he miishɛɛ, koni no sɛɛ lɛ otsɔɔ lɛ bɔ ni wolo lɛ baanyɛ aye abua lɛ kɛtao hetoo yɛ Biblia lɛ mli. Kɛ́ vidio ko yɛ jw.org lɛ nɔ ni kɔɔ nakai sane lɛ he lɛ, obaanyɛ ojie otsɔɔ shiatsɛ lɛ.
3. Tsɔɔmɔ bɔ ni wɔkɛ Sanekpakpa wolo lɛ baatsu nii kɛfee Biblia mli nikasemɔ lɛ mli.
3 Bɔ ni Wɔbaafee Nikasemɔ lɛ Wɔhã: (1) Kanemɔ sanebimɔ ni adiki mli ni anɔmba lɛ lɛ koni eye ebua shiatsɛ lɛ ni ekadi oti ni yɔɔ nikasemɔ lɛ mli lɛ. (2) Kanemɔ kuku ni yɔɔ shishi lɛ. (3) Kanemɔ ŋmalɛi ni akpakpaa amɛ afã lɛ, ni okɛ sanebimɔi ni sa atsu nii kɛye abua shiatsɛ lɛ ni ena bɔ ni ŋmalɛi lɛ hãa sanebimɔi ni anɔmba lɛ ahetoo. (4) Kɛ́ kuku kroko ko tsa sanebimɔ ni nyɛsusuɔ he lɛ nɔ lɛ, okɛ gbɛ ni ji 2 kɛ 3 lɛ nɔŋŋ atsu nii. Kɛ́ vidio ko kɛ sanebimɔ lɛ yaa, ni ojieko otsɔko shiatsɛ lɛ pɛŋ lɛ, jiemɔ otsɔɔ lɛ. (5) Naagbee lɛ, bi shiatsɛ lɛ koni ehã sanebimɔ ni anɔmba lɛ lɛ hetoo koni oná nɔmimaa akɛ enu sane lɛ shishi.
4. Mɛni baaye abua wɔ koni wɔhe asa kɛ dɛŋdade ni he hiaa nɛɛ kɛnitsumɔ?
4 Esa akɛ wɔle bɔ ni akɛ dɛŋdade ni he hiaa nɛɛ tsuɔ nii ahãa. Kɛtsu nii be fɛɛ be kɛ́ oná hegbɛ ni sa. Dani obaayafee nikasemɔ lɛ eko fɛɛ eko lɛ, susumɔ nikaselɔ lɛ he, ni osusu gbɛ ni hi fe fɛɛ ni obaatsɔ nɔ okɛ lɛ asusu ŋmalɛi ni yɔɔ nikasemɔ lɛ mli lɛ ahe. (Abɛi 15:28; Bɔf. 17:2, 3) Be ni oyaa nɔ onáa niiashikpamɔ ni ohe saa lɛ, wolo nɛɛ baabafata woji ni osumɔɔ ni okɛtsu nii kɛtsɔɔ mɛi anɔkwale lɛ ahe!