Jeŋba ni Woɔ Nyɔŋmɔ Hiɛ Nyam
1. Mɛni hewɔ ewaaa akɛ aaayoo Yehowa Odasefoi kɛ́ amɛmiiya kpokpaa nɔ kpee?
1 Ewaaa kɛhaaa mɛi akɛ amɛaayoo wɔ akɛ wɔmiiya kpokpaa nɔ kpeei. Yɛ hei babaoo ni afeɔ kpee yɛ lɛ, adafitswaa nitsumɔi ni yɔɔ jɛmɛ lɛ haa akutsoŋbii lɛ leɔ akɛ wɔba akutso lɛ mli. Bei pii lɛ, mɛi ni eba kpee lɛ yiɔ gbɔiatoohei kɛ niyelihei ni yɔɔ akutso lɛ mli lɛ, ni mɛi ni yɔɔ jɛmɛ lɛ naa gbɔi babaoo ni tsɛ kpee tsitsinaatsɛɛnii. Nibii ni nyiɛ sɛɛ nɛɛ lɛ ji kaimɔi komɛi ni baaye abua wɔ koni wɔkɛ wɔjeŋba kpakpa awo Nyɔŋmɔ hiɛ nyam yɛ he ni afeɔ kpee lɛ yɛ lɛ.—1 Pet. 2:12.
2. Mɛɛ gbɛ nɔ wɔbaanyɛ wɔkɛ wɔhesaamɔ ni yɔɔ hiŋmɛi nɔ lɛ awo Nyɔŋmɔ hiɛ nyam beni wɔyɔɔ he ni afeɔ kpee lɛ yɛ lɛ?
2 Atade ni Yɔɔ Hiŋmɛi Nɔ: Bei pii lɛ, atade ni yɔɔ hiŋmɛi nɔ ni wɔwoɔ kɛyaa kpee lɛ haa mɛi ni naa wɔ lɛ náa wɔhe miishɛɛ. Kɛlɛ, wɔhesaamɔ yɛ bei krokomɛi amli—beni wɔtee gbɔiatoohe, beni wɔyeɔ nii yɛ niyelihei, beni wɔyeɔ jara kɛ nii kɛ nii lɛ—baanyɛ aha mɛi ni naa wɔ lɛ aná susumɔ kpakpa yɛ wɔhe. Eyɛ mli akɛ ehe ehiaaa ni wɔwo kpojee atade kɛya hei nɛɛ moŋ, shi esa akɛ nɔ ni wɔbaawo lɛ afee nɔ ni yɔɔ hiŋmɛi nɔ, nɔ ni bulɛ yɔɔ he, shi jeee atade ko kɛkɛ. Esa akɛ mɛi ni naa wɔ lɛ ana srɔtofeemɔ ni yɔɔ wɔ kɛ mɛi ni heee yeee lɛ ateŋ. (Rom. 12:2) Kɛfata he lɛ, esa akɛ wɔtsɛ wɔkpee lɛ tsitsinaatsɛɛnii lɛ, akɛni enɛ baatswa kpee lɛ he adafi ni ebaaha wɔná hegbɛ kɛye odase lɛ hewɔ, ni ebaaha mɛi krokomɛi ni eba kpee lɛ ayɔse wɔ.
3. Mɛɛ gbɛ wɔɔtsɔ wɔto wɔtsui shi ni wɔjie su kpakpa kpo?
3 Tsuishitoo kɛ Su Kpakpa: Yɛ be ni mɛi babaoo ni yɔɔ je lɛ mli lɛ susuɔ amɛ pɛ amɛhe ni amɛhiɛ esɔɔɔ nii lɛ, kwɛ bɔ ni wɔtsui shi ni wɔɔto kɛ su kpakpa kpo ni wɔɔjie wɔtsɔɔ mɛi ni naa wɔ tamɔ mɛi ni tsuɔ nii yɛ gbɔiatoohe kɛ niyelihei lɛ baaná miishɛɛ aha! (2 Tim. 3:1-5) Kɛ́ wɔmiimɔ gbɛ loo wɔmiihe woji ni ajie kpo lɛ eko lɛ, esaaa akɛ wɔpeleɔ wɔhaa wɔ pɛ wɔhe, shi esa akɛ wɔpele wɔha wɔnaanyo hu. (1 Kor. 10:23, 24) Beni nuu ko ni yɔɔ wiemɔ lɛ he miishɛɛ lɛ tee e-klɛŋklɛŋ kpee lɛ, ewie akɛ, “Mikaiii wiemɔi ni aha nakai gbi lɛ eko eko, shi su kpakpa ni Odasefoi lɛ jie lɛ kpo lɛ ná minɔ hewalɛ waa.”
4. Kɛ́ wɔshihilɛ baaŋmɛ wɔ gbɛ lɛ, mɛni hewɔ esa akɛ wɔsusu wɔhe ni wɔkɛaaha kɛtsu nii yɛ kpokpaa wulu nɔ kpee lɛ shishi lɛ he lɛ?
4 Mɛi ni Jɛɔ Amɛsuɔmɔ Mli Amɛkɛ Amɛhe Haa: Suɔmɔ mli ni ajɛɔ akɛ he haa lɛ ji anɔkwa Kristofoi akadimɔ nii. (Lala 110:3) Ani obaanyɛ okɛ ohe aha kɛye obua yɛ kpee lɛ shishi? Yɛ kpee ko shishi lɛ, nyɛmimɛi hii kɛ yei 600 kɛ amɛhe ha kɛsaa asa lɛ nɔ dani afee kpee lɛ. Mɛi ni tsuɔ nii yɛ jɛmɛ lɛ kɛɛ akɛ: “Wɔnako nɔ ko ni tamɔ nɛkɛ pɛŋ! Ewa akɛ wɔbaahe wɔye akɛ mɛi nɛɛ fɛɛ jɛ amɛsuɔmɔ mli amɛkɛ amɛhe ha.” Wɔkɛ miishɛɛ miikpa afi 2013 kpokpaa wulu nɔ kpee lɛ kɛ hegbɛ ni wɔbaaná kɛbo Nyɔŋmɔ toi ni wɔkase ehe nii, ní agbɛnɛ hu wɔwo ehiɛ nyam lɛ gbɛ.
[Akrabatsa ni yɔɔ baafas 3-6]
Afi 2013 Kpokpaa Wulu nɔ Kpee He Kaimɔi
◼ Nifeemɔ Bei: Abaaje kpee lɛ shishi leebi 9:20 gbii etɛ lɛ fɛɛ. Kɛ́ nakai be lɛ shɛ lɛ, esa akɛ wɔteŋ mɔ fɛɛ mɔ atao he ko ata bɔni afee ni aje kpee lɛ shishi yɛ gbɛ ni yɔɔ nyam nɔ. Sohaa kɛ Hɔɔ lɛ, akɛ lala kɛ sɔlemɔ baakpa gbɛkɛ 4:50, ni Hɔgbaa lɛ, abaakpa gbɛkɛ 3:35.
◼ Tsɔji Amaamɔhe: Kɛ́ jeee wɔhe ni miiye loo naagba ko ni tamɔ nakai lɛ, no lɛ ebaahi akɛ be fɛɛ be lɛ wɔɔta he ni wɔbaanu wiemɔ ni ahaa lɛ moŋ fe ni wɔbaayata tsɔne ni wɔkɛba lɛ mli, ejaakɛ kɛ́ wɔta tsɔne lɛ mli lɛ, wɔbaanyɛ wɔwɔ loo nibii krokomɛi baanyɛ agbala wɔjwɛŋmɔ kɛjɛ wiemɔ ni ahaa lɛ nɔ. Kɛ́ wɔta mɛi lɛ ateŋ ni wɔjwɛŋmɔ nyiɛ wiemɔ ni ahaa lɛ sɛɛ lɛ, no tsɔɔ akɛ wɔhiɛ sɔɔ mumɔŋ niyenii kpakpa ni Yehowa eto he gbɛjianɔ eha wɔ lɛ. Akɛni bei pii lɛ hei ni akɛ tsɔji mamɔɔ lɛ daraaa hewɔ lɛ, esa akɛ mɛi ni yɔɔ kar lɛ ayafata mɛi krokomɛi ahe yɛ amɛ kar lɛ mli kɛ́ amɛbaanyɛ.
◼ Sɛ̃i ni Ashiɔ Ahaa Mɛi: Mɛi ni kɛ bo ta tsɔne mli kɛba loo amɛkɛ bo yɔɔ shĩa lɛ loo o-Biblia kaselɔ hee lɛ pɛ esa akɛ oshi sɛ̃i oha.—1 Kor. 13:5.
◼ Shwane Niyenii: Ofainɛ okɛ niyenii ni etsiii ni obaaye shwane ajɛ shĩa kɛba moŋ fe nɔ ni kɛ́ eshɛ shwane hejɔɔmɔ be lɛ, obaashi kpee lɛ shishi akɛ oyaahé niyenii. Obaanyɛ okɛ nibii ni akɛ niyenii woɔ mli ní daraaa tsɔ ní baaya sɛ̃i lɛ shishi aba. Okɛ nibii ní dara ni akɛ mɛi pii aniyenii woɔ mli kɛ nibii ni akɛ glase fee akaba kpee lɛ shishi.
◼ Nibii ni Abaajie Kpo: Nyɔŋmɔ Wiemɔ lɛ woɔ wɔ ŋaa koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Kɛ́ ajie nɔ ko kpo yɛ kpee lɛ shishi lɛ, suɔmɔ ni wɔyɔɔ kɛha mɛi krokomɛi kɛ mɛi ahe ni wɔsusuɔ lɛ haŋ wɔwó foi gidigidi ni wɔtsirɛ mɛi bɔni afee ni wɔ klɛŋklɛŋ wɔnine ashɛ eko nɔ. Kɛ́ wɔkɛ henɔyeli tsu nii ni asaŋ wɔto wɔtsui shi yɛ gbɛ ni tamɔ nakai nɔ lɛ, no haa anaa akɛ wɔji Kristofoi ni edara yɛ mumɔŋ, ni agbɛnɛ hu ehaa anaa akɛ wɔsumɔsumɔɔ wɔhe ákɛ nyɛmimɛi.—Yoh. 13:35.
◼ Oniatsumɔ: Wɔbaanyɛ wɔtsɔɔ bɔ ni wɔhiɛ sɔɔ kpee lɛ kɛtsɔ wɔsuɔmɔ mli ni wɔɔjɛ wɔtsu onia yɛ kpee lɛ shishi kɛfĩ jeŋ muu fɛɛ nitsumɔ lɛ sɛɛ lɛ nɔ. Kɛ́ mɔ ko kɛ tsɛki miitsu onia yɛ kpee lɛ shishi lɛ, no lɛ esa akɛ eŋma “Watch Tower” yɛ nɔ ákɛ mɛi ni esa akɛ awo shika lɛ aha.
◼ Osharai kɛ Helai loo Pilamɔi ní Baa Trukaa: Kɛ́ hela mɔ mɔ ko loo epila trukaa yɛ kpee lɛ shishi lɛ, ofainɛ wo mɛi ni kwɛɔ shitaramɔ nɔ lɛ ateŋ mɔ ni bɛŋkɛ bo lɛ toi nɔ, ni lɛ hu ebaaha mɛi ni yɔɔ Tsofahemɔhe lɛ ale enɛ amrɔ nɔŋŋ koni mɛi ni yɔɔ tsofahemɔhe lɛ ni atsɔse amɛ lɛ abakwɛ yelikɛbuamɔ ni amɛbaanyɛ amɛkɛha mɔ lɛ.
◼ Falefalefeemɔ: Eji sɔ̃ ni kã mɛi fɛɛ ni yaa kpee lɛ anɔ akɛ amɛbaasaa hei ni amɛtara lɛ kɛ́ amɛye nii amɛgbe naa. Akɛni akɛ jwɛinii baamamɔ kpee lɛ shishi hewɔ lɛ, nyɛfainɛ nyɛkwɛa ni nyɛkɛ woji, niyenii, nu rɔbai, kɛ nibii krokomɛi awo jwɛinii lɛ amli. Nakai feemɔ baatsɔɔ akɛ wɔhe tse.
◼ Mfonirishamɔ: Akɛni wɔsumɔɔɔ ni wɔkɛ jarayeli saji baa teokrase henaabuamɔi ashishi hewɔ lɛ, esaaa akɛ wɔhaa mɛi ni shaa mfonirii ni amɛheɔ shika lɛ baa kpeei asa lɛ nɔ amɛbashaa mfonirii loo vidioi kɛyeɔ jara.—w84-E 7/1 bf. 25; kwɛmɔ Gbɛjianɔ wolo lɛ, baafa 142, kuku 3 lɛ hu.
◼ Ní Aaata Shi Kutuu ákɛ Weku: Esa akɛ fɔlɔi kɛ amɛbii atara shi beni kpee lɛ yaa nɔ lɛ moŋ fe ni amɛaaha amɛbii lɛ kɛ gbekɛbii loo oblahii kɛ oblayei bibii krokomɛi sɔŋŋ ata shi yɛ he kome. Enɛ baaha awo gbekɛbii lɛ hewalɛ ni amɛŋmala otii beni kpee lɛ yaa nɔ lɛ.
◼ Tsofafeemɔ: Kɛ́ tsofa ko ni okɔɔ lɛ he baahia bo lɛ, ofainɛ kɛ́ ooba lɛ kɛ bɔ ni sa aba ejaakɛ ahaŋ bo eko yɛ kpee lɛ shishi.
◼ Tokotai: Daa afi lɛ, mɛi babaoo pilaa yɛ tokotai ni nɔ kwɔlɔ ni amɛwo lɛ hewɔ. Ebaahi akɛ aaawo tokota ni sa ni baamɔ nane lɛ jogbaŋŋ, ní abaanyɛ akɛnyiɛ atrakpoi anɔ kɛ he fɛɛ he ni apilaaa.
◼ Gbekɛbii Ashwiilii: Esaaa ákɛ akɛ shwiili ni gbekɛbii taa mli ni atsiɔ amɛ lɛ (baby strollers) baa kpee asa lɛ nɔ. Kɛlɛ, fɔlɔi baanyɛ amɛkɛ sɛ̃i bibii ni gbekɛbii taa mli yɛ tsɔne mli ni haa amɛfeɔ shweshweeshwe (child-safety seats) lɛ aba kɛ́ amɛbaaná gbɛ yɛ amɛmasɛi.
◼ Please Follow Up (S-43) Wolo Lɛ: Kɛ́ aye mɔ ko odase yɛ he ni afeɔ kpee lɛ yɛ, ni ejie miishɛɛ kpo lɛ, no lɛ esa akɛ aŋmala mɔ lɛ he saji yɛ Please Follow Up wolo lɛ nɔ. Kɛ́ oŋmala wolo nɛɛ eko nɔ nii ogbe naa lɛ, obaanyɛ oyashi oha mɛi ni yɔɔ Woji Ahemɔhe lɛ loo okɛha nyɛsafoŋ woloŋmalɔ lɛ kɛ́ nyɛku nyɛsɛɛ koni atsu he nii.
◼ Wɔɔhe: (1) Kɛ́ oyahai he ko ni awɔɔ lɛ, no lɛ ofainɛ okɛ mɛi ni fa fe bɔ ni akpaa gbɛ akawɔ jɛi. (2) Kɛ́ mɔ ko kɛ etsũ ha bo ni owɔ mli lɛ, feemɔ jɛmɛ falefale, ni okagbɛ nibii oshwã, ni ohiɛ asɔ nibii ni akɛha bo lɛ ni okɛtsɔɔ akɛ osusuɔ mɔ lɛ he. (3) Nyɛmimɛi hii kɛ yei akawɔ tsũ kome mli ja amɛji wekumɛi. (4) Kɛ́ akpɛlɛɛɛ ni ahoɔ nii yɛ tsũ lɛ mli lɛ, no lɛ kaafee nakai. (5) Ákɛ mɔ ni baa ejeŋ jogbaŋŋ lɛ, kaayadamɔ agbo naa oju ohe. Kɛ́ hejuuhe bɛ jɛi lɛ, no lɛ obaanyɛ okɛ saa loo mama afee hejuuhe fioo ni oju ohe yɛ mli. (6) Ákɛ Kristofoi lɛ, esaaa akɛ wɔkɛ nibii ni atoɔ he gbɛjianɔ ahaa gbɔi lɛ tsuɔ nii bɔ ni esaaa. (7) Jiemɔ mumɔ lɛ yibii lɛ kpo otsɔɔ mɛi ni tsuɔ nii yɛ gbɔiatoohe ni oyɔɔ lɛ loo weku ni oyato amɛ lɛ. (8) Kɛ́ oná naagba ko yɛ owɔɔhe loo gbɔiatoohe lɛ, ofainɛ ni oha nyɛmimɛi ni yɔɔ Rooming Department lɛ ale yɛ kpee lɛ shishi.
◼ Mɛi ni kɛ Amɛhe Haa Kɛha Nitsumɔ: Mɔ fɛɛ mɔ ni miisumɔ akɛ ekɛ ehe aha lɛ baanyɛ aya Volunteer Service Department lɛ, yɛ kpee lɛ shishi. Gbekɛbii ni yeko afii 16 lɛ hu baanyɛ amɛkɛ amɛhe awo nitsumɔ lɛ mli yɛ amɛfɔlɔ loo mɔ ko ni kwɛɔ amɛnɔ lɛ shishi, ni amɛbaanyɛ amɛfee nakai hu yɛ onukpa kroko kwɛmɔ shishi kɛ́ fɔlɔ lɛ loo mɔ ni kwɛɔ amɛnɔ lɛ kpɛlɛɔ nɔ. Shi kɛlɛ, aakpa gbɛ akɛ nitsumɔhei lɛ anɔkwɛlɔi lɛ baatsɔ mɛi ni kɛ amɛhe haa kɛha nitsumɔ yɛ kpokpaa lɛ mli gbɛjianɔtoo lɛ nɔ amɛhala mɛi ni fa saŋŋ dani kpokpaa wulu nɔ kpee lɛ aje shishi.