Kpee He Kaimɔi

Nifeemɔ Bei: Abaaje kpee lɛ shishi leebi 9:20 gbii etɛ lɛ fɛɛ. Kɛ́ nakai be lɛ shɛ lɛ, esa akɛ wɔteŋ mɔ fɛɛ mɔ atao he ko eta bɔ ni afee ni aje kpee lɛ shishi yɛ gbɛ ni yɔɔ nyam nɔ. Abaakpa Sohaa kɛ Hɔɔ kpee lɛ aaafee gbɛkɛ 5:00, ni Hɔgbaa lɛ, abaakpa aaafee gbɛkɛ 4:00.

‘Okɛ Lala Ajie Yehowa Yi’: Nyɔŋmɔ webii ni hi shi yɛ blema lɛ kɛ lala jie Yehowa yi, ni ŋmɛnɛ lɛ, lala kã he eji anɔkwa jamɔ fã ko ni he hiaa waa. (Lala 28:7) Atswaa lalai kɛjeɔ kpokpaa wulu nɔ kpee lɛ fã fɛɛ fã shishi. Lalai nɛɛ jeee lalai komɛi kɛkɛ, shi moŋ ato he gbɛjianɔ koni ehã wɔnyɛ wɔkase Yehowa he nii, ni wɔjá lɛ. No hewɔ lɛ, kɛ́ kpee lɛ sɛinɔtalɔ lɛ tswa adafi akɛ be eshɛ ni abaaje lalatswaa lɛ shishi lɛ, esa akɛ wɔ fɛɛ wɔtao he ko wɔtara koni wɔkɛ miishɛɛ abo lalai lɛ atoi, moŋ fe nɔ ni wɔɔgba sane. Nakai ni wɔɔfee lɛ baatsɔɔ akɛ wɔhiɛ sɔɔ mɔdɛŋ ni asafo lɛ lalatswalɔi akuu lɛ bɔɔ lɛ waa. Nyɛmimɛi hii kɛ yei nɛɛ kɛ amɛ diɛŋtsɛ amɛshika fãa gbɛ kɛyaa Patterson, yɛ New York shii enyɔ yɛ afi mli, koni amɛyatswa lalai ni ŋɔɔŋɔi amɛhã wɔ. Be ni wɔbo lalai nɛɛ atoi sɛɛ lɛ, esa akɛ wɔteŋ mɔ fɛɛ mɔ afata he kɛlá wɔ-Maŋtsɛyeli lalai lɛ koni wɔkɛjie Yehowa yi.

Tsɔji Amaamɔhe: Ebaahi akɛ be fɛɛ be lɛ wɔta he ni baahã wɔbo wiemɔi ni ahãa lɛ toi moŋ fe nɔ ni wɔbaayata tsɔne ni wɔkɛba lɛ mli, ja ekolɛ wɔhe miiye loo wɔyɛ naagba ko ni tamɔ nakai, ejaakɛ kɛ́ wɔta tsɔne lɛ mli lɛ, wɔbaanyɛ wɔwɔ loo nibii krokomɛi baanyɛ agbala wɔjwɛŋmɔ kɛjɛ nifeemɔi lɛ anɔ. Kɛ́ wɔta mɛi lɛ ateŋ ni wɔja wiemɔ ni ahãa lɛ sɛɛ mo lɛ, no tsɔɔ akɛ wɔhiɛ sɔɔ mumɔŋ niyenii kpakpa ni Yehowa eto he gbɛjianɔ ehã wɔ lɛ. Akɛni bei pii lɛ hei ni akɛ tsɔji mamɔɔ lɛ daraaa hewɔ lɛ, kɛ́ nyɛmi ko yɛ tsɔne ni gbɛ yɛ mli lɛ, ebaanyɛ ehã mɔ kroko ashi enɔ ni ebafata ehe kɛya.

Sɛ̃i ni Ashiɔ Ahãa Mɛi: Mɛi ni kɛ bo ta tsɔne mli kɛba loo amɛkɛ bo yɔɔ shĩa, loo mɔ ni okɛ lɛ miikase Biblia lɛ amrɔ nɛɛ pɛ esa akɛ oshi sɛ̃i ohã. Ofainɛ okɛ nibii akamɔmɔ sɛ̃ii ni bo loo mɛi ni fata ohe lɛ taŋ nɔ lɛ anɔ. Kɛ́ okɛ gbɛtsɔɔmɔ nɛɛ tsu nii lɛ, ebaahã mɛi krokomɛi ana akɛ mɔ ko taaa sɛ̃ii nɛɛ anɔ. Ato sɛ̃ii krɛdɛi ahe gbɛjianɔ ahã mɛi ni egbɔlɔ kɛ mɛi ni bɛ hewalɛ lɛ. Akɛni sɛ̃ii nɛɛ faaa hewɔ lɛ, esa akɛ mɔ kome loo mɛi enyɔ ni baakwɛ mɛi nɛɛ lɛ pɛ ata mɔ ni akwɛɔ lɛ lɛ masɛi.

Atade ni Yɔɔ Hiŋmɛi Nɔ: Esa akɛ atade ni wɔbaawo kɛya kpee lɛ afee nɔ ni sa ni yɔɔ hiŋmɛi nɔ, jeee nɔ ni esaaa ni ebu yɛ je lɛ mli lɛ. (1 Tim. 2:9) Kɛ́ wɔmiiba gbɔiatoohe lɛ jio wɔmiishi jɛmɛ jio, loo wɔmiishara shi yɛ jɛmɛ fioo dani wɔya kpee lɛ loo be ni akpa kpee lɛ sɛɛ jio lɛ, esaaa akɛ wɔwoɔ atade ko kɛkɛ kɛnyiɛɔ jɛmɛ. Enɛ baahã wɔtsɛ kpee lɛ tsitsinaatsɛɛnii lɛ, ni wɔhiɛ gboŋ kɛ́ wɔmiiye odase be ni wɔná hegbɛ lɛ. Kɛ́ wɔsaa wɔhe jogbaŋŋ ni wɔba wɔjeŋ bɔ ni sa be ni wɔyaa kpeei ni abaafee lɛ, jeee mɛi ni hiɛ tsui kpakpa lɛ pɛ anɔ hewalɛ ebaaná koni amɛbo Biblia mli sane ni hereɔ mɛi ayiwala lɛ toi, shi moŋ ebaahã Yehowa hu mli afili lɛ.​—Zef. 3:17.

Ilɛtrɔnik Tsɔji ni Akɛbaatsu Nii yɛ Nilee Mli: Eji nilee gbɛ akɛ wɔbaato mobail foŋ kɛ ilɛtrɔnik tsɔji ni wɔhiɛ lɛ ahe gbɛjianɔ bɔ ni egbaŋ mɛi krokomɛi anaa be ni nifeemɔ lɛ yaa nɔ lɛ. Kɛ́ wɔhiɛ kamera, vidio rikɔda, tablɛt, loo ilɛtrɔnik tsɔji krokomɛi lɛ, esa akɛ wɔkɛtsu nii bɔ ni egbaŋ mɛi krokomɛi anaa. Kɛ́ wɔsɛndiii tɛs mɛseji kɛ e-mail kɛkɛ be ni kpee lɛ yaa nɔ lɛ, etsɔɔ akɛ wɔbaa wɔjeŋ jogbaŋŋ.

Shwane Niyenii: Ofainɛ okɛ niyenii ni etsiii ni obaaye shwane ajɛ shĩa kɛba moŋ fe nɔ ni kɛ́ eshɛ shwane hejɔɔmɔ be lɛ, obaashi kpee lɛ shishi akɛ oyaahé niyenii. Obaanyɛ okɛ nibii ni akɛ niyenii woɔ mli ní daraaa tsɔ ní baaya sɛ̃i lɛ shishi aba. Okɛ nibii ni dara ni akɛ mɛi pii aniyenii woɔ mli kɛ nibii ni akɛ glase fee akaba kpee lɛ shishi.

Oniatsumɔ: Wɔbaanyɛ wɔtsɔɔ bɔ ni wɔhiɛ sɔɔ kpee lɛ kɛtsɔ wɔsuɔmɔ mli ni wɔɔjɛ wɔtsu onia yɛ kpee lɛ shishi kɛfĩ jeŋ muu fɛɛ nitsumɔ lɛ sɛɛ lɛ nɔ. Kɛ́ mɔ ko kɛ tsɛki miitsu onia yɛ kpee lɛ shishi lɛ, no lɛ esa akɛ eŋma “Watch Tower” yɛ nɔ ákɛ mɛi ni esa akɛ awo shika lɛ ahã.

Tsofa: Kɛ́ tsofa ko ni okɔɔ lɛ he baahia bo lɛ, ofainɛ ni okɛ bɔ ni sa aba, ejaakɛ ahaŋ bo eko yɛ kpee lɛ shishi.

Wɔhe nɔ ni Wɔɔkwɛ Jogbaŋŋ Koni Wɔkapila: Nyɛfainɛ, nyɛhãa wɔkwɛa jogbaŋŋ koni nɔ ko akahã wɔshane loo wɔtɛ ni wɔpila. Daa afi lɛ, mɛi babaoo pilaa yɛ tokotai ni nɔ kwɔlɔ ni amɛwo lɛ hewɔ. Ebaahi akɛ aaawo tokota ni sa ni baamɔ nane lɛ jogbaŋŋ, ní abaanyɛ akɛnyiɛ atrakpoi anɔ kɛ he fɛɛ he ni apilaaa.

Osharai kɛ Helai loo Pilamɔi ní Baa Trukaa: Kɛ́ hela mɔ mɔ ko loo epila trukaa yɛ kpee lɛ shishi lɛ, ofainɛ wo mɛi ni kwɛɔ shitaramɔ nɔ lɛ ateŋ mɔ ni bɛŋkɛ bo lɛ toi nɔ, ni lɛ hu ebaahã mɛi ni yɔɔ Tsofahemɔhe lɛ ale enɛ amrɔ nɔŋŋ koni mɛi ni yɔɔ Tsofahemɔhe lɛ ni atsɔse amɛ lɛ abakwɛ yelikɛbuamɔ ni amɛbaanyɛ amɛkɛhã mɔ lɛ.

Falefalefeemɔ: Eji sɔ̃ ni kã mɛi fɛɛ ni yaa kpee lɛ anɔ akɛ amɛbaasaa hei ni amɛtara lɛ kɛ́ amɛye nii amɛgbe naa. Akɛni akɛ jwɛinii baamamɔ kpee lɛ shishi hewɔ lɛ, nyɛfainɛ nyɛkwɛa ni nyɛkɛ woji, niyenii, nu rɔbai, kɛ nibii krokomɛi awo jwɛinii lɛ amli. Nakai feemɔ baatsɔɔ akɛ wɔhe tse.

Niiasɛɛyaahei: Nyɛfainɛ, nyɛkaŋmɛa nyɛbii bibii lɛ agbɛ ni amɛyaa niiasɛɛyaahei lɛ bɔ ni esaaa be ni kpee lɛ yaa nɔ lɛ. Kɛ́ ehe bahia ni gbekɛ bibioo ko aya niiasɛɛyaahe lɛ, nyɛhãa enyɛmi ko ni eda loo onukpa ko kɛ lɛ ayaa.

Nibii ni Abaajie Kpo: Nyɔŋmɔ Wiemɔ lɛ woɔ wɔ ŋaa koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Kɛ́ ajie wolo loo nɔ kroko kpo yɛ kpee lɛ shishi lɛ, suɔmɔ ni wɔyɔɔ kɛhã mɛi krokomɛi kɛ mɛi ahe ni wɔsusuɔ lɛ haŋ wɔwó foi gidigidi ni wɔtsirɛ mɛi bɔ ni afee ni wɔ klɛŋklɛŋ wɔnine ashɛ eko nɔ. Kɛ́ wɔkɛ henɔyeli tsu nii, ni wɔto wɔtsui shi yɛ gbɛ ni tamɔ nakai nɔ lɛ, no hãa anaa akɛ wɔji Kristofoi ni edara yɛ mumɔŋ, ni agbɛnɛ hu ehãa anaa akɛ wɔsumɔsumɔɔ wɔhe ákɛ nyɛmimɛi.​—Yoh. 13:35.

Please Follow Up (S-43) Wolo Lɛ: Kɛ́ aye mɔ ko odase yɛ he ni afeɔ kpee lɛ yɛ, ni ejie miishɛɛ kpo lɛ, no lɛ esa akɛ aŋmala mɔ lɛ he saji yɛ Please Follow Up wolo lɛ nɔ. Kɛ́ oŋmala wolo nɛɛ eko nɔ nii ogbe naa lɛ, obaanyɛ oyashi ohã mɛi ni yɔɔ Woji Ahemɔhe lɛ loo okɛhã nyɛsafoŋ woloŋmalɔ lɛ kɛ́ nyɛku nyɛsɛɛ, koni atsu he nii.

Niyelihei: Kɛ́ otee niyelihe ko lɛ, ba ojeŋ jogbaŋŋ kɛwo Yehowa hiɛ nyam. Esa akɛ ohesaamɔ lɛ atsɔɔ akɛ oji Kristofonyo. Shi nɔ ko fioo ohã mɔ ni hɔɔ nii lɛ, kɛ́ afeɔ nakai yɛ he ni nyɛyɔɔ lɛ.

Wɔɔhe:

1. Kɛ́ oyahai he ko ni awɔɔ lɛ, no lɛ ofainɛ okɛ mɛi ni fa fe bɔ ni akpaa gbɛ akawɔ jɛi.

2. Kɛ́ mɔ ko kɛ etsũ hã bo ni owɔ mli lɛ, feemɔ jɛmɛ falefale ni okagbɛ nibii oshwã, ni ohiɛ asɔ nibii ni akɛhã bo lɛ ni okɛtsɔɔ akɛ osusuɔ mɔ lɛ he.

3. Nyɛmimɛi hii kɛ yei akawɔ tsũ kome mli ja amɛji wekumɛi.

4. Kɛ́ akpɛlɛɛɛ ni ahoɔ nii yɛ tsũ ko mli lɛ, no lɛ kaafee nakai.

5. Akɛ mɔ ni baa ejeŋ jogbaŋŋ lɛ, kaayadamɔ agbo naa oju ohe. Kɛ́ hejuuhe bɛ jɛi lɛ, no lɛ obaanyɛ okɛ saa loo mama afee hejuuhe fioo ni oju ohe yɛ mli.

6. Akɛ Kristofoi lɛ, esaaa akɛ wɔkɛ nibii ni atoɔ he gbɛjianɔ ahãa gbɔi lɛ tsuɔ nii bɔ ni esaaa.

7. Jiemɔ mumɔ lɛ yibii lɛ kpo otsɔɔ mɛi ni tsuɔ nii yɛ gbɔiatoohe ni oyɔɔ lɛ loo weku ni oyato amɛ lɛ.

8. Esa akɛ fɔlɔi akwɛ amɛbii lɛ anɔ be fɛɛ be yɛ gbɔiatoohe lɛ loo he ni ahã amɛ akɛ amɛwɔ lɛ.

9. Kɛ́ oná naagba ko yɛ owɔɔhe loo gbɔiatoohe lɛ, ofainɛ ni ohã nyɛmimɛi ni yɔɔ Rooming Department lɛ ale yɛ kpee lɛ shishi.

Mɛi ni kɛ Amɛhe Hãa Kɛhã Nitsumɔ: Mɔ fɛɛ mɔ ni miisumɔ akɛ ekɛ ehe ahã lɛ baanyɛ aya Volunteer Service Department ni yɔɔ kpee lɛ shishi lɛ. Gbekɛbii ni yeko afii 16 lɛ hu baanyɛ amɛkɛ amɛhe awo nitsumɔ lɛ mli yɛ amɛfɔlɔ loo mɔ ko ni kwɛɔ amɛnɔ lɛ shishi, ni amɛbaanyɛ amɛfee nakai hu yɛ onukpa kroko kwɛmɔ shishi kɛ́ fɔlɔ lɛ loo mɔ ni kwɛɔ amɛnɔ lɛ kpɛlɛɔ nɔ. Kɛ̃lɛ, aakpa gbɛ akɛ nitsumɔhei lɛ anɔkwɛlɔi lɛ baahala mɛi ni fa saŋŋ dani kpokpaa wulu nɔ kpee lɛ aje shishi. Amɛbaatsɔ mɛi ni akɛ nitsumɔ woɔ amɛdɛŋ yɛ kpokpaa lɛ mli lɛ anɔ amɛhala mɛi lɛ.