Ani Obaasumɔ ni Ofee Tsakemɔi?
1. Tsakemɔi ni yaa nɔ yɛ je lɛ mli lɛ biɔ ni wɔ hu wɔfee mɛɛ tsakemɔi?
1 Yɛ 1 Korintobii 7:31 lɛ, Biblia lɛ kɛ je lɛ toɔ kpoku ko ni be fɛɛ be lɛ enɔ nifeemɔi kɛ nifeelɔi lɛ miitsake lɛ he. Tsakemɔi ni yaa nɔ yɛ je lɛ mli lɛ biɔ ni wɔ hu yɛ be kɛ beaŋ lɛ wɔfee tsakemɔi yɛ gbɛ nɔ ni wɔtsɔɔ wɔshiɛɔ, bei ni wɔkɛyaa shiɛmɔ, kɛ bɔ ni wɔshiɛɔ wɔhaa lɛ amli. Ani obaasumɔ ni ofee tsakemɔi?
2. Mɛni hewɔ esa akɛ wɔfee tsakemɔi bɔni afee ni wɔnyɛ wɔkɛ Yehowa asafo lɛ anyiɛ lɛ?
2 Gbɛi ni Otsɔɔ Nɔ Oshiɛɔ: Kristofoi asafo lɛ etee nɔ efee tsakemɔi be fɛɛ be. Klɛŋklɛŋ be ni Yesu tsu ekaselɔi lɛ, ekɛɛ amɛ akɛ amɛkakɔ gbɛfãa kotoku loo shika amɛwo amɛhɛfĩinii lɛ amli. (Mat. 10:9, 10) Kɛlɛ, sɛɛ mli lɛ etsake nakai gbɛtsɔɔmɔi lɛ ahiɛ akɛni ena akɛ wɔsɛɛ lɛ abaate shi awo ekaselɔi lɛ, ni abaatsu shiɛmɔ nitsumɔ lɛ kɛkpele shikpɔji krokomɛi anɔ lɛ hewɔ. (Luka 22:36) Yɛ afii oha ni eho lɛ mli lɛ, Yehowa asafo lɛ kɛ shiɛmɔ gbɛi srɔtoi etsu nii—ekomɛi ji odaseyeli woji bibii, redio adafitswai, kɛ kar ni akɛtswaa shiɛmɔ wiemɔi ahe adafi—yɛ hiamɔ ni yɔɔ yɛ nakai beaŋ lɛ naa. Ŋmɛnɛ lɛ, akɛni mɛi babaoo efɔɔɔ shĩa hilɛ hewɔ lɛ, ehe ebahia waa ni wɔkɛ maŋ odaseyeli kɛ odase ni ayeɔ beni anyiɛɛɛ shiɛmɔ nɔ lɛ afata shĩa kɛ shĩa shiɛmɔ nitsumɔ lɛ he. Awoɔ wɔ hewalɛ hu ni wɔyashiɛ yɛ shĩa kɛ shĩa gbɛkɛ beni duŋ woko tsɔ kɛ́ mɛi lɛ tsuɔ nii yɛ gbi lɛ mli. Kɛ́ Yehowa ŋwɛi shwiili lɛ tsake he ni gbɛ ni eyaa lɛ, ani oyaa nɔ okɛ lɛ nyiɛɔ?—Ezek. 1:20, 21.
3. Mɛɛ gbɛ nɔ kɛ́ wɔfee tsakemɔi lɛ, ebaaha wɔshiɛmɔ lɛ amɔ shi yɛ wɔshikpɔŋkuku lɛ mli?
3 Oshiɛmɔ Wiemɔ Lɛ: Mɛni gbaa mɛi ni yɔɔ oshikpɔŋkuku lɛ mli lɛ naa? Shika sane? Weku shihilɛ? Ta? Ehi waa akɛ wɔɔle naagbai kɛ shihilɛi ni yɔɔ wɔshikpɔŋkuku lɛ mli amrɔ nɛɛ, bɔni afee ni wɔnyɛ wɔsaa wɔhe kɛ shiɛmɔ wiemɔ ni sa. (1 Kor. 9:20-23) Kɛ́ shiatsɛmɛi lɛ wie sane ko he lɛ, nɔ najiaŋ ni wɔɔha amɛ hetoo ko kɛkɛ ni wɔtsa wiemɔ ni wɔkɛba lɛ nɔ lɛ, kwɛ bɔ ni ebaahi jogbaŋŋ akɛ wɔɔtsake wiemɔ lɛ koni ekɔ amɛnaagbai lɛ ahe.
4. Mɛni hewɔ esa akɛ wɔfee tsakemɔi oya lɛ?
4 Etsɛŋ kwraa ni je nɛɛ naagbee ‘nifeemɔ’ lɛ baaba naagbee, ni amanehulu kpeteŋkpele lɛ baaje shishi. “Be lɛ faaa dɔŋŋ.” (1 Kor. 7:29) Belɛ, kwɛ bɔ ni ehe hiaa ni wɔfee tsakemɔi, ni wɔfee nakai amrɔ nɔŋŋ bɔni afee ni wɔnyɛ wɔtsu babaoo yɛ be fioo ni eshwɛ lɛ mli!