Ani Obaanyɛ Otsake Obe He Gbɛjianɔtoo lɛ Mli?
1. Mɛni hewɔ esa akɛ wɔtsake wɔshiɛmɔyaa be he gbɛjianɔtoo lɛ mli lɛ?
1 Ákɛ anɔkwa Kristofoi lɛ, wɔkpɛlɛ nine ni afɔ̃ wɔ akɛ wɔbatsɔmɔ “gbɔmɛi ahe wolɛi” lɛ nɔ. (Mat. 4:19) Taakɛ wolɛɛmɛi diɛŋtsɛ ji lɛ, ekolɛ wɔbaaye omanye yɛ gbɔmɛi ahe wolɛi nitsumɔ lɛ mli kɛ́ wɔto be he gbɛjianɔ koni wɔshiɛ yɛ be mli ni wɔnine baanyɛ ashɛ mɛi anɔ lɛ. Yɛ maji babaoo amli lɛ, duŋ woŋ mra yɛ nyɔji komɛi ni kã wɔhiɛ lɛ amli. Mɛi babaoo hiɔ shĩa beni eshwɛ fioo ni hulu baanyɔ shi kɛ agbɛnɛ hu beni jeŋ ebɔi namɔ. Bei pii lɛ, amɛmiijɔɔ amɛhe ni ekolɛ amɛbaasumɔ ni amɛhere gbɔi waa. Ani obaanyɛ otsake obe he gbɛjianɔtoo lɛ mli koni oshiɛ yɛ nakai bei lɛ amli?—1 Kor. 9:23.
2. Mɛɛ gbɛ̀i komɛi anɔ wɔbaanyɛ wɔtsɔ wɔha mɛi babaoo anu sanekpakpa lɛ?
2 Gbɛkɛnaashi Odaseyeli: Gbɛjianɔ ni wɔɔto kɛtsɔ hiɛ koni wɔshiɛ gbɛkɛnaashi lɛ baanyɛ aha wɔkɛ sanekpakpa lɛ ayaha mɛi babaoo. (Abɛi 21:5) Oblahii kɛ oblayei baanyɛ ashiɛ beni amɛkpa skul. Mɛi krokomɛi hu baanyɛ afee nakai beni amɛkpa nitsumɔ. Woloŋ nikasemɔ kui komɛi baanyɛ ato gbɛjianɔ koni amɛshiɛ ŋmɛlɛtswaa kome dani amɛje nakai otsi lɛ mli nikasemɔ lɛ shishi.
3. Mɛɛ gbɛ̀i anɔ obaanyɛ otsɔ oshiɛ beni eshwɛ fioo ni hulu baanyɔ shi kɛ beni jeŋ ebɔi namɔ yɛ nyɛshikpɔŋkuku lɛ mli?
3 Shĩa kɛ shĩa shiɛmɔ ni akɛ he woɔ mli beni eshwɛ fioo ni hulu baanyɔ shi kɛ beni jeŋ ebɔi namɔ lɛ baanyɛ aha akɛ mɛi ni bei pii lɛ amɛbɛ shĩa lɛ agba sane. Yɛ shikpɔŋkukuji babaoo amli lɛ, abaanyɛ atsu gbɛjegbɛ nɔ nitsumɔ kɛ maŋ odaseyeli nitsumɔi srɔtoi lɛ gbɛkɛnaashi hu. Ni mɛi babaoo ena akɛ gbɛkɛnaashi ji be ni hi fe fɛɛ ni akɛaafee sɛɛkuu-kɛsaramɔi ni aje Biblia mli nikasemɔi ashishi.
4. Mɛni hewɔ ehe hiaa ni okɛ sɛɛyoomɔ atsu nii ni ona mli oha mɛi krokomɛi beni oyeɔ odase gbɛkɛnaashi lɛ?
4 Sɛɛyoomɔ He Miihia: Ehe miihia ni asusu nii ahe jogbaŋŋ beni akɛ he woɔ gbɛkɛnaashi odaseyeli nitsumɔ lɛ mli lɛ. Bei pii lɛ, ehi jogbaŋŋ diɛŋtsɛ akɛ aaaye odase beni jeŋ ebɔi namɔ pɛ moŋ fe nɔ ni aaayasara shiatsɛmɛi beni ekolɛ amɛmiito gbɛjianɔ koni amɛyawɔ lɛ. (Fil. 4:5) Kɛ otswa shinaa lɛ, daamɔ he ni abaanyɛ ana bo, ni ojie ohe shi otsɔɔ yɛ faŋŋ mli. Jɛɛ mra oha ale nɔ hewɔ ni oba jɛmɛ lɛ. Kɛ otee jɛmɛ yɛ be ni esaaa mli, tamɔ be mli ni weku lɛ miiye nii lɛ, kɛɛmɔ akɛ obaaba be kroko. Naa mli oha mɛi krokomɛi be fɛɛ be.—Mat. 7:12.
5. Mɛɛ gbɛ nɔ wɔɔtsɔ wɔkwa osharai ni baanyɛ aba beni wɔshiɛɔ lɛ?
5 Ehe miihia ni wɔkwɛ jogbaŋŋ yɛ osharai ni wɔbaanyɛ wɔkɛkpe lɛ hu ahe. Kɛ nyɛmiiye odase beni duŋ ebɔi woo loo beni duŋ ewo lɛ, nilee yɛ mli akɛ nyɛaanyiɛ enyɔnyɔɔnyɔ loo ákɛ kui. Nyɛnyiɛa gbɛjegbɛi ní amɛnɔ kanei ekpɛ́ waa lɛ ni mɛi yɔɔ nɔ lɛ pɛ anɔ. Nyɛyea odase yɛ hei pɛ ni nyɛle akɛ jɛmɛ yɛ shweshweeshwe kɛha nyɛ lɛ. Nyɛkanyiɛa hei ni ekolɛ jɛmɛ bɛ shweshweeshwe beni duŋ ewo.—Abɛi 22:3.
6. Mɛɛ sɛɛnamɔi krokomɛi baanyɛ ajɛ odase ni wɔɔye beni eshwɛ fioo ni hulu baanyɔ shi kɛ beni jeŋ ebɔi namɔ lɛ mli kɛba?
6 Odase ni wɔɔye beni eshwɛ fioo ni hulu baanyɔ shi kɛ beni jeŋ ebɔi namɔ lɛ baanyɛ aha wɔkɛ gbɛgbalɔi awalɔi kɛ daa gbɛgbalɔi atsu shiɛmɔ nitsumɔ lɛ. (Rom. 1:12) Ani obaanyɛ otsake obe he gbɛjianɔtoo lɛ mli koni okɛ ohe awo shiɛmɔ nitsumɔ lɛ fã nɛɛ mli?