Okɛ Wɔ-Wɛb Saiti lɛ Atsu Nii Kɛtsɔɔ Obii lɛ Anii
1. Mɛɛ yiŋtoo hewɔ afee wɔ-Wɛb saiti lɛ fã ni yitso ji “Children” lɛ?
1 Afee wɔ-Wɛb saiti lɛ, ni ji jw.org lɛ bɔ ni mɛi baanya he ekɔɔɔ he eko afii ni amɛye. Wɛb saiti lɛ fã ni yitso ji “Children” lɛ (yaa Bible Teachings ni ogbele Children) yeɔ ebuaa gbekɛbii bibii kɛ amɛfɔlɔi ni amɛtsiɔ amɛbɛŋkɛɔ amɛhe kɛ Yehowa hu. (5 Mose 6:6, 7) Mɛɛ gbɛ nɔ obaanyɛ okɛ fã nɛɛ atsu nii kɛtsɔɔ obii lɛ anii?
2. Te ooofee tɛŋŋ ohala saji ni sa ni obaanyɛ okɛ obii lɛ akase yɛ afii ni amɛye lɛ naa?
2 Kwɛmɔ Nɔ ni Hi Kɛha Obii Lɛ: Gbekɛ fɛɛ gbekɛ kɛ ehiamɔ nii pɔtɛ̃ɛ. (1 Kor. 13:11) No hewɔ lɛ, te ooofee tɛŋŋ ohala saji ni sa ni obaanyɛ okɛ obii lɛ akase yɛ afii ni amɛye lɛ naa? Bi ohe akɛ: ‘Mɛɛ saji mibii lɛ baaná he miishɛɛ waa? Ani amɛbaanu shishi jogbaŋŋ? Be enyiɛ amɛbaanyɛ amɛkɛta shi diŋŋ ni amɛbo nɔ ni mitsɔɔ amɛ lɛ toi?’ Kɛ́ obii lɛ eye afii etɛ loo amɛshɛɛɛ nakai lɛ, obaanyɛ okɛ amɛ asusu saji ni obaana kɛ́ ogbele fã ni ji “My Bible Lessons” lɛ ahe. Wekui krokomɛi baanya Biblia mli saji ni yɔɔ fã ni ji “Teach Your Children” lɛ mli lɛ ahe. Susumɔ saji ni nyiɛ sɛɛ nɛɛ hu ahe okwɛ.
3. Mɛɛ gbɛ nɔ fɔlɔi baanyɛ amɛkɛ saji kɛ nifeemɔi ni yɔɔ “Family Worship Projects” (Nifeemɔi Kɛha Weku Jamɔ) lɛ shishi lɛ atsu nii jogbaŋŋ kɛmɔ shi?
3 Nifeemɔi Kɛha Weku Jamɔ: Nifeemɔi nɛɛ yeɔ ebuaa weku yitsei koni amɛkɛ amɛbii lɛ akase nii. Kɛ́ ootao ole bɔ ni ooofee okɛ saji kɛ nifeemɔi lɛ atsu nii lɛ, klikimɔ “download” (ŋɔɔ eko) lɛ nɔ, ni okane nifeemɔi lɛ eko fɛɛ eko he “Parents’ Guide” (Gbɛtsɔɔmɔ Kɛha Fɔlɔi) lɛ. Okɛ nifeemɔi ni kɔɔ mfonirii ahe, tamɔ mfonirii akɔlamɔ atsu nii kɛtsɔɔ obii bibii lɛ anii. Ye obua obii ni edara fioo lɛ ni amɛtsu nifeemɔi ni akɛkaseɔ nii lɛ ahe nii. Nifeemɔi bibii ni yɔɔ nifeemɔi lɛ ateŋ eko fɛɛ eko shishi lɛ fɛɛ kɔɔ Biblia mli sane loo nikasemɔ kome too lɛ nɔŋŋ he, bɔni afee ni gbekɛbii lɛ fɛɛ anyɛ amɛkɛ amɛhe awo weku jamɔ nifeemɔ kome too lɛ nɔŋŋ mli, ekɔɔɔ he eko afii ni amɛye.
4. Kɛ́ ogbele fã ni ji “Become Jehovah’s Friend” (Okɛ Yehowa Abɔ Naanyo) lɛ, mɛni obaana?
4 Okɛ Yehowa Abɔ Naanyo: Vidioi, lalai, kɛ nifeemɔi ni yɔɔ wɔ-Wɛb saiti lɛ fã nɛɛ nɔ lɛ yeɔ ebuaa fɔlɔi koni amɛnyɛ amɛdũ Nyɔŋmɔ Wiemɔ lɛ amɛwo amɛbii bibii lɛ amli. (5 Mose 31:12) Nikasemɔ ko ni he hiaa yɛ vidioi ni sɛɛ kɛlɛɛɛ nɛɛ ateŋ eko fɛɛ eko mli. Nifeemɔi kɛ shwɛmɔi ni yɔɔ mli lɛ maa bɔ ni nikasemɔi nɛɛ ahe yɔɔ sɛɛnamɔ lɛ nɔ mi. Gbekɛbii sumɔɔ lámɔ, ni lalai yeɔ ebuaa amɛ ni amɛkaiɔ nibii ni amɛkase lɛ. Enɛ hewɔ lɛ, akɛ Maŋtsɛyeli lalai kɛ lalai ni aje gbɛ afo aha gbekɛbii woɔ wɔ-Wɛb saiti lɛ nɔ be fɛɛ be.
5. Mɛni hewɔ esa akɛ fɔlɔi abi Yehowa ni eye ebua amɛ koni amɛnyɛ amɛtsɔɔ amɛbii lɛ anɔkwale lɛ?
5 Fɔlɔi, Yehowa miisumɔ ni nyɛye omanye akɛ nyɛmɛi kɛ tsɛmɛi. No hewɔ lɛ, nyɛbia edɛŋ yelikɛbuamɔ koni nyɛnyɛ nyɛtsɔɔ nyɛbii lɛ anɔkwale lɛ. (Koj. 13:8) Yɛ Yehowa yelikɛbuamɔ naa lɛ, nyɛbaanyɛ nyɛtsɔse nyɛbii lɛ ni ‘amɛle nii kɛha yiwalaheremɔ kɛtsɔ Kristo Yesu nɔ hemɔkɛyeli nɔ.’—2 Tim. 3:15; Abɛi 4:1-4.