Ná Hesai Pii yɛ Shiɛmɔ Nitsumɔ lɛ Mli​—Ŋmaa Mɛi ni Ná Wiemɔ lɛ he Miishɛɛ lɛ Ahe Saji

‘Ohiɛ ahi ohe nɔ kɛ onitsɔɔmɔ lɛ nɔ.’ (1 Tim. 4:16) Ŋaawoo ni jɛ mumɔŋ ni bɔfo Paulo kɛhã Timoteo nɛɛ tsɔɔ akɛ, kɛ́ wɔji mɛi hei yɛ asafo lɛ mli jio, wɔba mli etsɛ jio lɛ, esa akɛ wɔbɔ mɔdɛŋ ni wɔya wɔhiɛ. Bɔ ni afee ni wɔnyɛ wɔtsu enɛ he nii lɛ, akɛ sane hee ko ni yitso ji: “Ná Hesai Pii yɛ Shiɛmɔ Nitsumɔ lɛ Mli” lɛ baawo Wɔ Maŋtsɛyeli Sɔɔmɔ lɛ mli. Saji lɛ eko fɛɛ eko baatsɔɔ wɔ hesaa ko ni he hiaa, kɛ bɔ ni wɔɔfee wɔná nakai hesaa lɛ. Abaawo wɔ fɛɛ hewalɛ ni wɔkɛ nakai hesaa lɛ atsu nii waa yɛ nyɔɔŋ lɛ mli. Kɛ́ nyɔɔŋ lɛ gbo lɛ, abaatsu nifeemɔ ko he nii yɛ Sɔɔmɔ Kpee lɛ mli ni baahã wɔná hegbɛ ni wɔwie bɔ ni wɔná nakai hesaa lɛ ni wɔkɛtsu nii waa lɛ he sɛɛ wɔhã. Nyɔɔŋ nɛɛ nɔ lɛ, aawo wɔ hewalɛ ni wɔŋmala mɛi ni ná sane lɛ he miishɛɛ lɛ ahe saji wɔshwie shi.

Nɔ Hewɔ ni Ehe Hiaa: Kɛ́ wɔbaatsu nitsumɔ ni akɛwo wɔdɛŋ lɛ jogbaŋŋ lɛ, esa akɛ wɔfee babaoo fe ni wɔɔshiɛ kɛkɛ. Esa akɛ wɔku wɔsɛɛ wɔya mɛi ni ná wiemɔ lɛ he miishɛɛ lɛ aŋɔɔ ni wɔyatsɔɔ amɛ nii, no baatsɔɔ akɛ wɔmiishwie anɔkwale dumɔwui ni wɔtɛo lɛ anɔ nu. (Mat. 28:19, 20; 1 Kor. 3:6-9) Enɛ baabi ni wɔya mɔ lɛ ŋɔɔ ekoŋŋ, ni wɔkɛ lɛ ayagba nibii komɛi ni gbaa enáa lɛ ahe sane, ni wɔkɛ lɛ atsa sane ni wɔkɛ lɛ gba nyɛsɛɛ lɛ nɔ. No hewɔ lɛ, be fɛɛ be ni mɔ ko baaná wiemɔ lɛ he miishɛɛ lɛ, esa akɛ wɔŋma mɔ lɛ he saji wɔshwie shi.