Okɛ Woji Tɛtrɛbii Memeji lɛ Ahã

Kɛ́ wɔkɛ woji tɛtrɛbii memeji lɛ to loo wɔshɛrɛ wɔshwie lɛ, amɛhe baaa sɛɛnamɔ, no hewɔ lɛ, esa akɛ wɔbɔ mɔdɛŋ ni wɔkɛhã. Wolo tɛtrɛɛ kome baanyɛ ahã mɔ ko aná anɔkwale lɛ he miishɛɛ, ni no ahã ebɔi Yehowa gbɛ́i lɛ tsɛmɔ. (Rom. 10:13, 14) Ŋaawoi ni nyiɛ sɛɛ nɛɛ tsɔɔ bɔ ni wɔɔfee wɔkɛ woji tɛtrɛbii memeji lɛ ahã.

• Kɛ́ ooshiɛ yɛ shikpɔŋkuku ko ni afɔɔɔ mli nitsumɔ lɛ mli lɛ, ekolɛ obaanyɛ okɛ ekome awo he ko ni mɛi krokomɛi enaŋ yɛ mɛi ni bɛ shĩa lɛ ashinai anaa.

• Kɛ́ ooye odase yɛ maŋ, ekolɛ yɛ he ni mɛi mɛɔ yɛ, tamɔ tsɔji adaamɔhei loo oketekei adaamɔhei lɛ, bi mɛi ni yɔɔ jɛmɛ lɛ kɛ́ amɛbaasumɔ ni amɛkane nɔ ko, okɛ woji tɛtrɛbii memeji srɔtoisrɔtoi atsɔɔ amɛ ni ohã amɛkɔlɔ nɔ ni amɛsumɔɔ.

• Kɛ́ otee helatsamɔhei loo hei ni tamɔ nakai ni yɔɔ nyɛsafo lɛ shikpɔŋkuku lɛ mli lɛ, okɛ woji tɛtrɛbii memeji lɛ ekomɛi ashwie hei ni mɛi taraa kɛmɛɔ yɛ lɛ. Bei pii lɛ, dani okɛ woji lɛ baashwie shi lɛ, ehi akɛ ooobi mɔ ni kwɛɔ jɛmɛ lɛ gbɛ, kɛ́ eyɛ jɛmɛ. Kɛ́ ona akɛ woji lɛ ekomɛi yɛ jɛmɛ momo lɛ, ofainɛ, okɛ eko akafata he.

• Kɛ́ oosaa ohe ni oyafee sɛɛkuu-kɛsaramɔ lɛ, susumɔ saji ni mɛi ni obaaya amɛŋɔɔ lɛ ateŋ mɔ fɛɛ mɔ ná he miishɛɛ lɛ he. Ani mɔ lɛ ebote gbalashihilɛ mli? Ani esumɔɔ gbɛfãa? Ani eyɛ abɔɔ? Kwɛmɔ woji tɛtrɛbii memeji lɛ amli akɛ obaana nɔ ko ni ebaanya ekanemɔ he waa lo, koni kɛ́ oku osɛɛ otee lɛ okɛyatsɔɔ lɛ.

• Kɛ́ oku osɛɛ otee mɔ ko ni ná wiemɔ he miishɛɛ lɛ ŋɔɔ shii abɔ shi oyanaaa lɛ, ni sɛɛ mli lɛ oyana lɛ lɛ, okɛ woji tɛtrɛbii memeji ni enáko eko lɛ ekomɛi atsɔɔ lɛ.