Lalai Hei Kɛhã Jamɔ!
1 Yɛ October 4, 2014 daa afi kpee ni Watch Tower Bible and Tract Society of Pennsylvania lɛ fee lɛ shishi lɛ, atswa adafi akɛ aato gbɛjianɔ ni afee tsakemɔi yɛ lala wolo ni wɔkɛtsuɔ nii amrɔ nɛɛ mli. Anɔkwa, eyɛ miishɛɛ waa! Akai mɛi fɛɛ ni eba kpee lɛ gbɛfaŋnɔ ni he hiaa ni esa akɛ wɔ-Maŋtsɛyeli lalai lɛ atsu yɛ wɔjamɔ lɛ mli.—Lala 96:2.
2 Ekolɛ obaabi ohe akɛ, ‘Mɛni hewɔ ehe hiaa ni atsake lala wolo lɛ?’ Yɛ yiŋtoi babaoo hewɔ. Klɛŋklɛŋ kwraa lɛ, aaya nɔ aatsake shishinumɔ ni wɔhiɛ yɛ Ŋmalɛi lɛ ahe lɛ, ni no baanyɛ asa lalai lɛ amli wiemɔi lɛ ahe. (Abɛi 4:18) Yiŋtoo kroko hu ji akɛ: Ajie lala wolo ni wɔkɛtsuɔ nii amrɔ nɛɛ mli wiemɔi lɛ kɛjɛ New World Translation momo lɛ mli. No hewɔ lɛ, esa akɛ atsake wiemɔi ni yɔɔ lala wolo lɛ mli lɛ koni ekɛ New World Translation hee lɛ mli wiemɔi lɛ akpã gbee. Akɛni ebaabi nitsumɔ babaoo dani abaanyɛ ahã lalai lɛ amli wiemɔi lɛ kɛ tsakemɔi ni afee yɛ Biblia lɛ mli lɛ akpã gbee hewɔ lɛ, akpɛ mli akɛ akɛ lalai hei fioo komɛi hu baafata he.
3 Ani ebaabi ni wɔmɛ kɛyashi abaajie lala wolo hee kpo dani wɔbɔi lalai hei lɛ alamɔ? Dabi. Wɔkɛ miishɛɛ miihã nyɛle akɛ, yɛ nyɔji ni baanyiɛ sɛɛ lɛ amli lɛ, akɛ lalai hei lɛ ekomɛi baawo wɔ-Wɛb saiti ni ji jw.org lɛ nɔ. Be fɛɛ be ni akɛ eko baawo nɔ yɛ nyɔɔŋ ko nɔ lɛ, abaato gbɛjianɔ ni alá yɛ Sɔɔmɔ Kpee ko naagbee, ni abaaŋma yɛ he akɛ “lala hee.”
4 Bɔ ni Ooofee Okase Lala Hee Lɛ: Ebɛ mlɛo akɛ aaakase lala hee. Shi taakɛ lalatsɛ lɛ fee lɛ, wɔmiisumɔ ni wɔlá yɛ asafoŋ kpeei ashishi, ‘ni wɔkabu wɔnaa.’ (Lala 30:13) Kɛ́ ootao okase lala hee ko lɛ, kɛ gbɛ ni nyiɛ sɛɛ nɛɛ atsu nii.
Bó lala ni akɛ sanku tswa ni akɛbaawo wɔ-Wɛb saiti lɛ nɔ lɛ toi shii abɔ. Kɛ́ obo toi shii abɔ lɛ, ebaafee mlɛo kɛhã bo akɛ obaakai.
Kasemɔ wiemɔi lɛ, ni obɔ mɔdɛŋ akɛ obaakpe owo oyitsoŋ.
Lá kɛnyiɛ nɔ ni akɛ saŋku tswa lɛ sɛɛ. Feemɔ nakai aahu kɛyashi obaale lala lɛ lamɔ jogbaŋŋ.
Kɛ́ nyɛmiifee Weku Jamɔ lɛ, nyɛláa lalai hei lɛ kɛyashi oweku lɛ baale lamɔ.
5 Kɛ́ akɛ lala hee baamu Sɔɔmɔ Kpee lɛ naa lɛ, abaatswa nɔ ni akɛ saŋku tswa lɛ shi kome ni asafo lɛ abo toi. No sɛɛ lɛ, toibolɔi lɛ baanyiɛ sɛɛ kɛlá, taakɛ wɔfeɔ kɛ́ aatswa lalai krokomɛi lɛ.
6 Lalai ni wɔláa yɛ wɔkpeei ashishi lɛ hãa wɔnáa hegbɛ kɛfataa wɔnyɛmimɛi lɛ ahe kɛjieɔ Yehowa yi, ni ehãa wɔnáa miishɛɛ. No hewɔ lɛ, kɛ́ atsɛ lala ko ni abaalá yɛ wɔ-Kristofoi akpeei lɛ ashishi lɛ, esaaa akɛ wɔkɛfeɔ wɔsu akɛ wɔbaaje kpo ni jeee yɛ yiŋtoo kpakpa ko hewɔ.
7 Gbɛ kroko hu yɛ ni wɔbaanyɛ wɔtsɔ nɔ wɔjie hiɛsɔɔ kpo kɛhã wɔlalai krɔŋkrɔŋi. Yɛ kpeei bibii kɛ kpeei wuji ashishi lɛ, atswaa lalai kɛjeɔ fã fɛɛ fã shishi. Daa afi lɛ, nyɛmimɛi hii kɛ yei ni jɛ je lɛŋ hei srɔtoi fãa gbɛ shii enyɔ kɛyaa Patterson, yɛ New York, ni amɛtswaa lalai ni ŋɔɔŋɔi ni akɛbaatsu nii yɛ wɔjamɔ lɛ mli ni arikɔdiɔ; amɛ diɛŋtsɛ amɛwoɔ amɛgbɛfãa lɛ he nyɔmɔ. No hewɔ lɛ, kɛ́ sɛinɔtalɔ lɛ bi ni wɔtao he ko wɔtara koni wɔbo lalai ni lalatsɛmɛi lɛ etswa lɛ atoi lɛ, esa akɛ wɔfee nakai. Nakai ni wɔɔfee lɛ baahã wɔsaa wɔtsui kɛhã wiemɔi ni baanyiɛ sɛɛ lɛ.—Ezra 7:10.
8 Wɔbaalá wɔlala hee ni yitso ji, “Kristo Miiye Maŋtsɛ—E-Maŋtsɛyeli lɛ Aba!” lɛ kɛmu ŋmɛnɛ kpee lɛ naa. Afo lala nɛɛ, ní alá yɛ daa afi kpee ni Watch Tower Bible and Tract Society of Pennsylvania lɛ feɔ ni afee nyɛsɛɛ nɛɛ shishi koni akɛye afii 100 ni ato Maŋtsɛyeli lɛ shishi lɛ he gbi jurɔ.
9 Anɔkwa, lalai hei nɛɛ ji ‘nibii kpakpai’ ni jɛ Yehowa ŋɔɔ. (Mat. 12:35a) Nyɛhãa wɔtswaa wɔfai shi akɛ wɔbaakase lalai hei nɛɛ, ni wɔjɛ wɔtsuiiaŋ wɔlá, koni ekɛ yijiemɔ kɛ woo ni sa lɛ ahã wɔ-Nyɔŋmɔ lɛ!—Lala 147:1.