Okɛfee Oti akɛ Obaafee Mɛi Kaselɔi
1. Mɛni esa akɛ wɔfee koni mɛi ayi aná wala?
1 Afi 2014 sɔɔmɔ afi lɛ he amaniɛbɔɔ lɛ hãa wɔnaa akɛ Nyɔŋmɔ webii lɛ etswa amɛfai shi akɛ amɛkɛ hiɛdɔɔ baashiɛ Maŋtsɛyeli lɛ he sane kpakpa lɛ. (Mat. 24:14) Maŋ odaseyeli, shĩa fɛɛ shĩa shiɛmɔ nitsumɔ lɛ, kɛ tai krɛdɛi ni wɔfãa kɛjaa tratii kɛ ninefɔɔ woji lɛ ehã wɔmiishiɛ Biblia mli sane lɛ wɔmiihã mɛi babaoo fe bei fɛɛ ni eho. Shi ja wɔkɛ mɛi ekase Biblia lɛ ni wɔye wɔbua amɛ ni amɛbatsɔmɔ Yesu kaselɔi dani amɛyi baaná wala.—1 Tim. 2:4.
2. Mɛɛ saji kɛ́ wɔbi wɔhe lɛ ebaaye ebua wɔ koni wɔfee klalo daa akɛ wɔbaaje Biblia mli nikasemɔ shishi?
2 Feemɔ Klalo Daa akɛ Obaaje Biblia mli Nikasemɔ Shishi: Kɛ́ mɔ ko nya sane lɛ he lɛ, ani oheɔ enɔmba, obiɔ lɛ he ni eyɔɔ, ni oyataoɔ lɛ amrɔ nɔŋŋ koni okɛ lɛ aje Biblia mli nikasemɔ shishi? Mɛɛ be nɛ ni otee mɔ ko ŋɔɔ klɛŋklɛŋ kwraa ni obɔ mɔdɛŋ akɛ otsɔɔ lɛ bɔ ni wɔkɛ mɛi kaseɔ Biblia lɛ wɔhãa? Mɛɛ be nɛ ni okɛɛ mɔ ko ní ofɔɔ lɛ woji tɛtrɛbii lɛ hãmɔ akɛ okɛ lɛ baakase Biblia lɛ? Ani ojie vidioi ni ji Mɛni Hewɔ Esa akɛ Okase Biblia Lɛ? kɛ Mɛni Yaa Nɔ yɛ Biblia Nikasemɔ Feemɔ Mli? lɛ otsɔɔ mɛi ni okɛtsuɔ nii, mɛi ni okɛyaa skul, okutsoŋbii, owekumɛi, kɛ mɛi krokomɛi ni ole? Kɛ́ okɛ shwiili loo okpɔlɔ miitsu nii kɛmiishiɛ lɛ, ani okɛɔ mɛi ni bakɔlɔɔ woji ni akɛ mɛi kaseɔ lɛ akɛ wɔkɛ mɛi kaseɔ nakai wolo lɛ ni wɔheee shika ko?
3. Mɛni esa akɛ wɔná bɔ ni afee ni wɔnyɛ wɔtsɔɔ mɛi anɔkwale lɛ jogbaŋŋ ni ewo yibii?
3 Yehowa kɛ Yesu Yeɔ Amɛbuaa Wɔ: Wiemɔ ni ji “nyɛyaa” ni Yesu kɛje efamɔ akɛ ‘wɔyafee mɛi kaselɔi’ lɛ shishi lɛ tsɔɔ akɛ, esa akɛ wɔbɔ wɔhe mɔdɛŋ, ni agbɛnɛ hu wɔtsutsu wɔŋɔ hegbɛ lɛ kɛfee nakai. Shi eshiii wɔ efolo, moŋ lɛ ewo shi akɛ ekɛ wɔ yɛ. (Mat. 28:19, 20) Kɛfata he lɛ, Yehowa kɛ emumɔ krɔŋkrɔŋ lɛ ehã wɔ, ehã wɔ woji kɛ nibii krokomɛi, ni etsɔse wɔ hu koni wɔnyɛ wɔtsɔɔ mɛi anɔkwale lɛ. (Zak. 4:6; 2 Kor. 4:7) Wɔbaanyɛ wɔsɔle koni ehã ‘wɔná shwelɛ kɛ hewalɛ hu’ kɛtsu nitsumɔ ni he hiaa waa nɛɛ.—Fil. 2:13.
4. Mɛni hewɔ esa akɛ wɔkɛfee oti akɛ wɔbaafee mɛi kaselɔi lɛ?
4 Sane kpakpa lɛ shiɛmɔ hãa wɔnáa miishɛɛ waa. Shi kɛ́ wɔtsɔɔ mɔ ko anɔkwale lɛ ni wɔye wɔbua lɛ ni ebafata wɔhe kɛnyiɛ ‘gbɛ ni kɛ mɔ yaa wala mli lɛ’ nɔ lɛ, nakai miishɛɛ lɛ tekeɔ nɔ. (Mat. 7:14; 1 Tes. 2:19, 20) Nɔ ni fe fɛɛ lɛ, kɛ́ wɔkɛfee oti akɛ wɔbaafee mɛi kaselɔi lɛ, wɔhãa Yehowa, mɔ ni “sumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui” lɛ tsui nyɔɔ emli.—2 Pet. 3:9.