‘Ye Nyɔŋmɔ Maŋtsɛyeli lɛ He Odase Kɛmɔ Shi’

1. Mɛni wɔbaakase yɛ Asafoŋ Biblia Nikasemɔ shishi kɛjɛ March 14, 2011 otsi lɛ nɔ kɛyaa?

¹ Kɛjɛ March 14, 2011 otsi lɛ nɔ kɛyaa lɛ, wɔbaabɔi ‘Ye Nyɔŋmɔ Maŋtsɛyeli lɛ He Odase Kɛmɔ Shi’ wolo lɛ kasemɔ yɛ Asafoŋ Biblia Nikasemɔ shishi. Wolo nɛɛ wieɔ Bɔfoi lɛ Asaji wolo lɛ mli amaniɛbɔi ni yɔɔ miishɛɛ lɛ he yɛ gbɛ ni baaha mɔ ni kaneɔ lɛ anya he waa lɛ nɔ. Ye Odase wolo lɛ gbalaaa Bɔfoi lɛ Asaji wolo lɛ mli kuku fɛɛ kuku mli, shi moŋ etsɔɔ nɔ ni wɔbaanyɛ wɔkase kɛjɛ amaniɛbɔi ni yɔɔ Bɔfoi lɛ Asaji lɛ mli lɛ amli, ni eyeɔ ebuaa wɔ koni wɔna bɔ ni wɔteŋ mɔ fɛɛ mɔ aaafee ekɛ nɔ ni ekaseɔ lɛ atsu nii aha.—Rom. 15:4.

2. Tsɔɔmɔ nibii komɛi ni yɔɔ Ye Odase wolo lɛ mli.

² Wolo lɛ Mli Nibii Komɛi: Hiɛkpamɔ wiemɔ ni yɔɔ baafa 2 lɛ ji wolo ni taa mɔ tsuiŋ ni jɛ Nɔyeli Kuu lɛ dɛŋ, ni tsɔɔ bɔ ni amɛsumɔɔ ni wɔná wolo nɛɛ he sɛɛ jogbaŋŋ. Kɛjɛ yitso 2 lɛ kɛyaa lɛ, akɛ sane ko ni tsɔɔ oti ni yɔɔ yitso fɛɛ yitso mli lɛ ekpa yitso lɛ hiɛ, ni atsɛ Bɔfoi lɛ Asaji lɛ mli ŋmalɛ ni sane ni abaasusu he lɛ damɔ nɔ lɛ yisɛɛ kɛfata he. Yitsei lɛ ateŋ babaoo yɛ akrabatsai ni haa wɔleɔ mɛi, hei, loo nibii komɛi ahe saji babaoo. Ashi gbɛi ni dara yɛ baafai lɛ anaabugbɛ ni wɔbaanyɛ wɔŋmala nibii yɛ jɛi. Yɛ wolo lɛ mli fɛɛ lɛ, obaana shihilɛi komɛi ni awie he yɛ Biblia lɛ mli lɛ ahe mfonirii ni yɔɔ faŋŋ, ni baaye abua wɔ koni wɔfee shihilɛi ni he hiaa nɛɛ ahe mfoniri yɛ wɔjwɛŋmɔŋ. Agbɛnɛ hu, ato mfonirii srɔtoi anaa yɛ naagbee baafa lɛ, ni atsɔɔ hei ni mfonirii nɛɛ yɔɔ yɛ wolo lɛ mli kɛ nɔ ni amɛtsɔɔ lɛ mli yɛ jɛmɛ. Obaana shikpɔŋ he mfonirii hu yɛ wolo lɛ sɛɛhaanɔ lɛ mligbɛ, ni enɛɛmɛi yeɔ ebuaa wɔ koni wɔfee hei ni wɔnanemɛi Yehowa jálɔi ni hi shi yɛ klɛŋklɛŋ afii 100 lɛ mli lɛ yanyiɛnyiɛɛ beni amɛgbɛɔ sanekpakpa lɛ amɛshwãa “kɛyashi shikpɔŋ lɛ naagbeehei lɛ.”—Bɔf. 1:8.

3. Mɛɛ sanebimɔi ni he hiaa wɔbaaná amɛhetoo yɛ Bɔfoi lɛ Asaji wolo lɛ ni wɔbaakase lɛ mli?

³ Sanebimɔi ni He Hiaa lɛ Ahetoo: Bɔfoi lɛ Asaji wolo lɛ ni wɔbaakase lɛ baaye abua wɔ ni wɔná sanebimɔi ni he hiaa ni kɔɔ wɔ-Kristofoi asɔɔmɔ nitsumɔ lɛ he lɛ ahetoo. Akɛ nɔkwɛmɔnɔ lɛ, mɛɛ nitsumɔ kɛ shɛɛ sane kadiɔ Yesu Kristo anɔkwa sɛɛnyiɛlɔi lɛ? Namɔ kwɛɔ jeŋ fɛɛ shiɛmɔ nitsumɔ lɛ nɔ, ni yɛ mɛɛ gbɛ nɔ? Mɛɛ hegbɛi yiwaa kɛ shiteekɛwoo haa shiɛlɔi náa? Mɛɛ gbɛfaŋnɔ mumɔ krɔŋkrɔŋ lɛ tsuɔ yɛ wɔsɔɔmɔ nitsumɔ lɛ mli?

4. Te wɔfee tɛŋŋ wɔná wolo nɛɛ ni wɔbaakase lɛ he sɛɛ kɛmɔ shi lɛ?

⁴ Bɔni afee ni oná nikasemɔ lɛ he sɛɛ kɛmɔ shi lɛ, tsɔ hiɛ okase sane ni abaasusu he lɛ, ni kɛ́ otee asafoŋ kpee lɛ, okɛ ohe awo nikasemɔ lɛ mli. Yaa kpeei lɛ daa, ni ojwɛŋ bɔ ni obaanyɛ okɛ nɔ ni okaseɔ lɛ atsu nii yɛ osɔɔmɔ nitsumɔ lɛ mli lɛ nɔ. Eba akɛ wolo ni mli ŋɔɔ nɛɛ ni wɔbaakase lɛ baakanya wɔ ni wɔye Nyɔŋmɔ Maŋtsɛyeli lɛ he odase kɛmɔ shi!—Bɔf. 28:23.